ନୂଆଦିଲ୍ଲୀ,୧-୧୦: ଦେଶର ଅଣୁ,କ୍ଷୁଦ୍ର ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଗୁଡିକ ନିଜକୁ ପୁଞ୍ଜି ବଜାରରେ ସୂଚୀଭୁକ୍ତ କରାଇବା ଲାଗି କେନ୍ଦ୍ର ଏମ୍ଏସ୍ଏମ୍ଇମନ୍ତ୍ରୀ ନୀତିନ ଗଡକରୀ ସୋମବାର ପରାମର୍ଶ ଦେଇଛନ୍ତି। ଏପରିସ୍ଥଳେ ସଂସ୍ଥାଗୁଡିକରୁ ସରକାର ଇକ୍ୱିଟି କ୍ରୟ କରିବେ। ଏଥି ଲାଗି ୧୦,୦୦୦ କୋଟି ଟଙ୍କାର ଏକ ପାଣ୍ଠି ଯୋଗାଇ ଦେବାକୁ ଅର୍ଥମନ୍ତ୍ରଣାଳୟକୁ ଅନୁରୋଧ କରିଥିବା ଗଡକରି କହିଛନ୍ତି। ଷ୍ଟକ ବଜାରରେ ପଞ୍ଜୀକରଣ ଦ୍ୱାରା ସଂସ୍ଥାଗୁଡିକ ସେମାନଙ୍କ ଲାଗି ପୁଞ୍ଜି ଯୋଗାଡ କରିପାରିବେ। ନ୍ୟାଶନାଲ ଷ୍ଟକ ଏକ୍ସଚେଞ୍ଜରେ ବର୍ତ୍ତମାନ ସୁଦ୍ଧା ୨୦ ଏମ୍ଏସ୍ଏମ୍ଇ ସୁଚୀଭୁକ୍ତ ହୋଇଥିବା ପିଏଚ୍ଡି ଚାମ୍ବର ଅଫ କମର୍ସର ଏକ କାର୍ଯ୍ୟକ୍ରମରେ ଗଡକରୀ ସୂଚନା ଦେଇଛନ୍ତି।
ଏମ୍ଏସ୍ଏମ୍ଇ କମ୍ପାନୀଗୁଡିକରେ ସରକାର ୧୦% ଇକ୍ୱିଟି କ୍ରୟ କଲେ ଏହାର ମୂଲ୍ୟ ବଢିଲେ ଏହା ୧୦ ହଜାର କୋଟି ପରିବର୍ତ୍ତେ ୧ ଲକ୍ଷ କୋଟି ଛୁଇଁବ। ରପ୍ତାନି କ୍ଷେତ୍ରରେ ଭଲ କାରବାର ଏବଂ ବାଲାନ୍ସ ସିଟ ଭଲ ଥିବା ଏମ୍ଏସ୍ଏମ୍ଇ ପୁଞ୍ଜି ବଜାରରୁ ଟଙ୍କା ଉଠାଣ କରିବା ନେଇ ଗଡକରୀ ଆହ୍ବାନ ଦେଇଛନ୍ତି। ଏହା ହେଲେ ସଂସ୍ଥାଗୁଡିକ ପୁଞ୍ଜି ଲାଭ କରିବା ସହ ଦେଶର ବିକାଶ ଦିଗରେ କାର୍ଯ୍ୟ କରିପାରିବେ। ଦେଶର ମୋଟ୍ ଜିଡିପିକୁ ଏମ୍ଏସ୍ଏମ୍ଇଗୁଡିକର ଯୋଗଦାନ ବର୍ତ୍ତମାନ ୨୯% ରହିଛି। ଏହାକୁ ୫୦% ବଢାଇବା ଦିଗରେ ସରକାର ଲକ୍ଷ୍ୟ ରଖିଥିବା ସେ ସ୍ପଷ୍ଟ କରିଛନ୍ତି। ଏହାବାଦ ରପ୍ତାନି କ୍ଷେତ୍ରରେ ସଂସ୍ଥାଗୁଡିକର ଯୋଗଦାନକୁ ୪୯%ରୁ ବଢାଇ ୬୦% କରିବା ଯୋଜନା ରଖାଯାଇଛି। ଏକ୍ଷେତ୍ରରେ ବିଭିନ୍ନ ନିଷ୍ପତ୍ତି ଶୀଘ୍ର ନିଆଯିବ ବୋଲି ଗଡକରୀ ପ୍ରକାଶ କରିଛନ୍ତି।