ଭୁବନେଶ୍ୱର,୨୨-୧: ଅନୁଗୋଳରେ ସ୍ଥାପନ ହେବାକୁ ଥିବା ଆଲୁମିନିୟମ ପାର୍କର ଭିତ୍ତିଭୂମି କାର୍ଯ୍ୟ ପୁଣି ଆରମ୍ଭ ହେବ। ଏଥି ଲାଗି କେନ୍ଦ୍ର ସରକାର ସମ୍ମତି ଜଣାଇଥିବା କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଙ୍ଗଳବାର ସୂଚନା ଦେଇଛନ୍ତି। ପ୍ରକଳ୍ପକୁ ପୁଣି ଥରେ ଆରମ୍ଭ କରିବା ଲାଗି ପ୍ରଧାନ ଡିସେମ୍ବର ୪ରେ କେନ୍ଦ୍ର ବାଣିଜ୍ୟ ମନ୍ତ୍ରୀ ପୀୟୂଷ ଗୋୟଲଙ୍କୁ ଚିଠି ଲେଖି ହସ୍ତକ୍ଷେପ ଲୋଡି ଥିଲେ। ନୂଆ ନିଷ୍ପତ୍ତି ପାଇଁ ପ୍ରଧାନ ଗୋୟଲଙ୍କୁ ଧନ୍ୟବାଦ ଜଣାଇଛନ୍ତି। ଉକ୍ତ ପ୍ରକଳ୍ପ ନ୍ୟାଶନାଲ ଆଲୁମିନିୟମ କମ୍ପାନୀ ଲିମିଟେଡ(ନାଲ୍କୋ) ଏବଂ ଇଡ୍କୋ ସହଭାଗିତାରେ ସ୍ଥାପନ ହେବ। ୨୦୨୦ ସୁଦ୍ଧା ପ୍ରକଳ୍ପ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଥିବା ସେ ସୂଚନା ଦେଇଛନ୍ତି।
ସେ କହିଛନ୍ତି, ଆଲୁମିନିୟମ ପାର୍କ ପ୍ରକଳ୍ପରେ ଥିବା ସମସ୍ତ ପ୍ରତିବନ୍ଧକକୁ ଦୂର କରିବା ଏବଂ ଏହାକୁ ତ୍ୱରିତ ଭାବେ ଶେଷ କରିବା ଲାଗି ଧ୍ୟାନ ରଖାଯାଇଛି। ଏହି ପ୍ରକଳ୍ପରେ ମୋଟ ୯୯.୬୦ କୋଟି ଟଙ୍କା ନିବେଶ ହେବ। ଏଥି ଲାଗି କେନ୍ଦ୍ର ସରକାର ୩୩.୪୪ କୋଟି ଟଙ୍କା ପୁଞ୍ଜି ବ୍ୟବସ୍ଥା କରିଛନ୍ତି। ପ୍ରକଳ୍ପ କାର୍ଯ୍ୟକ୍ଷମ ହେଲେ ରାଜ୍ୟର ଆଲୁମିନିୟମ ଶିଳ୍ପରେ ଅଭିବୃଦ୍ଧି ସାଧନ ହେବ ବୋଲି ଆଶାବାଦୀ ଥିବା ସେ ମତ ରଖିଛନ୍ତି। ସୂଚନା ଯୋଗ୍ୟ, ଏହି ପ୍ରକଳ୍ପ କେନ୍ଦ୍ର ସରକାରଙ୍କ ଶିଳ୍ପ ଏବଂ ଅନ୍ତର୍ଦେଶୀୟ ଶିଳ୍ପ ବିକାଶ (ଏଆଇଆଇୟୁଏସ୍) ଯୋଜନା ଅନ୍ତର୍ଗତ ମଞ୍ଜୁର ହୋଇଥିଲା। ଏଥି ଲାଗି କାର୍ଯ୍ୟାନ୍ବୟନ ସଂସ୍ଥା ଭାବେ ଅନୁଗୋଳ ପାର୍କ ପ୍ରାଇଭେଟ ଲିମିଟେଡ (ଏଏପିପିଏଲ୍) ଗଠନ କରାଯାଇଥିଲା। ମାତ୍ର ନଭେମ୍ବର ୨୦୧୮ରେ ପ୍ରକଳ୍ପ କାର୍ଯ୍ୟାନ୍ବୟନରେ ବିଳମ୍ବ ଦର୍ଶାଇ ଏହାକୁ ବନ୍ଦ କରାଯାଇଥିଲା। ପ୍ରକଳ୍ପ କାର୍ଯ୍ୟକୁ ପୁନଃ ଚାଲୁ କରିବା ଲାଗି ପ୍ରଧାନ ହସ୍ତକ୍ଷେପ ଲୋଡିଥିଲେ।