ମୁମ୍ବାଇ: ଲକ୍ଡାଉନ୍ର ଦୁଇ ମାସ ପରେ ଆରମ୍ଭ ହେବାକୁ ଯାଉଛି ଲାଇଟ୍, କ୍ୟାମେରା ଆକ୍ସନ୍। ଅର୍ଥାତ୍ କରୋନା ମହାମାରୀ ଯୋଗୁ ଅଟକି ରହିଥିବା ଭାରତୀୟ ଫିଲ୍ମର ପୁଣି ଶୁଟିଂ ଆରମ୍ଭ ହେବା ପାଇଁ ଯାଉଛି। ଏଥିପାଇଁ ସରକାର ମଧ୍ୟ ଅନୁମତି ଦେଇସାରିଛନ୍ତି। ଅନୁମୋଦନ କ୍ରମେ ଟିଭି, ଫିଲ୍ମର ନିର୍ମାତା ଏବଂ ନିର୍ଦ୍ଦେଶକମାନେ ସେମାନଙ୍କ ସାଥୀମାନଙ୍କ ସହିତ ଅଧିକ କାମ ପାଇଁ ଆଲୋଚନା କରିଛନ୍ତି। ଯଦିଓ ଶୁଟିଂ ଶେଟ୍ରେ ପହଞ୍ଚିବା ପାଇଁ ଦୁଇ ସପ୍ତାହ ଲାଗିପାରେ। ଯେଉଁ ଫିଲ୍ମର ଶେଟ୍ ପ୍ରସ୍ତୁତ ହୋଇସାରିଛି ସେହି ଫିଲ୍ମ ଆସନ୍ତା ମାସର ପ୍ରଥମ ସପ୍ତାହରୁ ଶୁଟିଂ ଆରମ୍ଭ ହେବ।
ଯେଉଁ ଫିଲ୍ମଗୁଡ଼ିକ ପ୍ରଥମେ ଶୁଟିଂ ହେବ ବୋଲି ଆଶା କରାଯାଉଛି, ସେହି ତାଲିକାରେ ସଞ୍ଜୟ ଲୀଲା ଭନ୍ସାଲୀଙ୍କ ନିର୍ଦ୍ଦେଶିତ ‘ଗାଙ୍ଗୁବାଇ କାଠିଆଓ୍ବାଡି’ ହୋଇପାରେ। ଫେଡେରେଶନ ଅଫ୍ ଓ୍ବେଷ୍ଟର୍ନ ଇଣ୍ଡିଆ ସିନେ କର୍ମଚାରୀଙ୍କ ସାଧାରଣ ସମ୍ପାଦକ ଅଶୋକ ଦୁବେ କହିଛନ୍ତି, ସଞ୍ଜୟ ଲୀଲା ଭନ୍ସାଲୀ ଫିଲ୍ମ ସିଟିରେ ତାଙ୍କ ଫିଲ୍ମର ଶୁଟିଂ କରୁଥିଲେ। ଫିଲ୍ମ ସିଟିରେ ତାଙ୍କର ଶେଟ୍ ଏପର୍ଯ୍ୟନ୍ତ ଅକ୍ଷୁଣ୍ଣ ରହିଛି, ତେଣୁ ସଞ୍ଜୟ ପ୍ରଥମ ଫିଲ୍ମ ନିର୍ମାତା ହୋଇପାରନ୍ତି।
ତିନୋଟି ଫିଲ୍ମ ‘ଭୁଜ୍ – ଦ ପ୍ରାଇଡ୍ ଅଫ୍ ଇଣ୍ଡିଆ’, ‘ଝୁଣ୍ଡ୍’ ଏବଂ ‘ମୁମ୍ବାଇ ସାଗା’ ହିନ୍ଦୀ ଫିଲ୍ମ ନିର୍ମାତା ଭୂଷଣ କୁମାରଙ୍କ ଫିଲ୍ମ ଲକ୍ଡାଉନ୍ ଯୋଗୁ ଅଟକି ରହିଛି। ଭୂଷଣ କହିଛନ୍ତି, ସୁରକ୍ଷା ବ୍ୟବସ୍ଥା ଠିକ କରିବା ମାତ୍ରେ ତାଙ୍କ ଫିଲ୍ମର ଶୁଟିଂ ଆରମ୍ଭ କରିବେ। ସେ କହିଛନ୍ତି, ‘ଆମେ ସରକାରଙ୍କୁ ଧନ୍ୟବାଦ ଦେଉଛୁ ଯେ, ସେମାନେ ଫିଲ୍ମର ଶୁଟିଂ ଆରମ୍ଭ କରିବାକୁ ଅନୁମତି ଦେଇଛନ୍ତି। କିନ୍ତୁ ଆମ ପାଇଁ ଯେଉଁମାନେ କାମ କରୁଛନ୍ତି ସେମାନଙ୍କ ସୁରକ୍ଷା ସର୍ବାଧିକ। ଯେତେବେଳେ ଆମେ ସ୍ବାସ୍ଥ୍ୟ ସମ୍ବନ୍ଧୀୟ ସମସ୍ତ ସୁରକ୍ଷା ସୁବିଧା ସୁନିଶ୍ଚିତ କରିବୁ ସେତେବେଳେ ଶୁଟିଂ ଆରମ୍ଭ ହେବ।
ସେହିପରି ୟଶରାଜ ଫିଲ୍ମ ବ୍ୟାନରରେ ପ୍ରସ୍ତୁତ ଅକ୍ଷୟ କୁମାରଙ୍କ ଫିଲ୍ମ‘ଫୃଥ୍ବୀରାଜ’ ବି ଶୁଟିଂ ହେବାର ରହିଛି।