ଭୁବନେଶ୍ୱର,୧୦।୨(ବ୍ୟୁରୋ): ପୂର୍ବାଞ୍ଚଳ ପରିଷଦ ବୈଠକ ଚଳିତ ମାସ ଶେଷସୁଦ୍ଧା ଓଡିଶା ଲୋକସେବା ଭବନରେ ଅନୁଷ୍ଠିତ ହେବ ବୋଲି ଶୁଣିବାକୁ ମିଳୁଛି। ଉକ୍ତ ବୈଠକ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବ। ଦୀର୍ଘ ୨୯ବର୍ଷ ପରେ ଏହି ବୈଠକ ଓଡିଶାରେ ହେବାକୁ ଯାଉଛି। ବୈଠକରେ ଝାଡ଼ଖଣ୍ଡ, ମଧ୍ୟପ୍ରଦେଶ, ଛତିଶଗଡ଼ ଆଦି ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗଦେବେ। ଆସନ୍ତା ୨୮ରେ ଏହି ବୈଠକ ବସିବ ବୋଲି ଚର୍ଚ୍ଚା ଜୋର୍ ଧରିଛି। ମାତ୍ର ଏନେଇ କୌଣସି ବିଧିବଦ୍ଧ ସୂଚନା ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଦିଆଯାଇନାହିଁ। ଫେବୃୟାରୀ ୧୨ରେ ଏହି ବୈଠକ ବସିବା ପୂର୍ବରୁ କାର୍ଯ୍ୟକ୍ରମ ରହିଥିଲା। କିନ୍ତୁ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଶାହାଙ୍କ ଗସ୍ତ ସମ୍ପର୍କିତ କୌଣସି ସୂଚନା ନ ମିଳିବାରୁ ଏହା ବାତିଲ ହୋଇଥିଲା। ସେହିପରି ଏଥର ମଧ୍ୟ ବୈଠକ ସମ୍ପର୍କରେ ସେପରି କୌଣସି ସଠିକ୍ ସୂଚନା ଆସିନାହିଁ। ସରକାରୀ କାର୍ଯ୍ୟକ୍ରମରେ ଶାହା ଓଡିଶା ଆସିବାକୁ ଥିବାବେଳେ ଦୁଇଟି ଭିନ୍ନଭିନ୍ନ କାର୍ଯ୍ୟକ୍ରମରେ ଯୋଗଦେବେ। ଏକ ଘରୋଇ କଲେଜର କାର୍ଯ୍ୟକ୍ରମରେ ତାଙ୍କର ଯୋଗଦେବାର କାର୍ଯ୍ୟକ୍ରମ ରହିଛି। ରାଜ୍ୟ ଭାଜପା ମଧ୍ୟ ଏକ ବିଶାଳ ସାଧାରଣ ସଭାର ଆୟୋଜନ କରିବାକୁ ସମସ୍ତ ପ୍ରକାର ଦଳୀୟ ମହଲ ଭିତରେ ପ୍ରସ୍ତୁତି ସରିଥିବା ଜଣେ ବରିଷ୍ଠ ନେତାଙ୍କଠାରୁ ସୂଚନା ମିଳିଛି।