ପରଜଙ୍ଗ, ୨୫।୮(ଡି.ଏନ.ଏ.) – ଢେଙ୍କାନାଳ ବନଖଣ୍ଡ ମହାବିରୋଡ ରେଞ୍ଜ ଡିହଡୋଳ ଫରେଷ୍ଟ ସେକ୍ସନ ଅଧୀନରେ ତାଣ୍ଡବ ସୃଷ୍ଟି କରିଥିବା ନରହନ୍ତା ଦନ୍ତାର ହିଂସ୍ର ଆଚରଣ ବଢ଼ିବାରେ ଲାଗିଛି। ମୁଣ୍ଡେଇଲୋ ପଞ୍ଚାୟତ ଗେହ୍ଲେଇକାଟେଣୀ ଦଳିତ ସାହିରେ ଶୁକ୍ରବାର ରାତିରେ ହାତୀ ପଶି ଆତଙ୍କ ସୃଷ୍ଟି କରିଛି। ଦନ୍ତା ଉପଦ୍ରବରେ ମଙ୍ଗୁଳୁ ନାଏକଙ୍କ ଘର ଭାଙ୍ଗିଯାଇଛି। ଘର ତଳେ ଚାପିହୋଇ ମଙ୍ଗୁଳୁ ଏବଂ ତାଙ୍କ ସ୍ତ୍ରୀ ବାଳି ସାମାନ୍ୟ ଆହତ ହୋଇଛନ୍ତି। ହାତୀ ଫେରିବା ବେଳେ ଚେୟାର, ସାଇକେଲ ଏବଂ ଢୋଲ ଭାଙ୍ଗିଦେଇଥିଲା। ଏଥିସହ ଚାଉଳ ବସ୍ତା ବୋହି ନେଇଥିଲା। ପଡ଼ୋଶୀମାନେ ବୃଦ୍ଧ ଦମ୍ପତିଙ୍କୁ ଉଦ୍ଧାର କରିଥିଲେ। ତେବେ ଘର ସମ୍ପୂର୍ଣ୍ଣ ଭାଙ୍ଗି ଯାଇଥିବାରୁ ମଙ୍ଗୁଳୁ ଚିନ୍ତାରେ ପଡ଼ିଛନ୍ତି। ବର୍ଷାରେ ସ୍ତ୍ରୀସ୍ବାମୀ କେଉଁଠି ରାତ୍ରିଯାପନ କରିବେ ସେ ନେଇ ଚିନ୍ତାରେ ପଡ଼ିଛନ୍ତି। ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଉଭୟେ ନିବେଦନ କରିଛନ୍ତି।
ଦନ୍ତାହାତୀ ସାହିର ସଞ୍ଜୟ ନାଏକଙ୍କ ଛାତ ଘରେ ପଶିବାକୁ ଉଦ୍ୟମ କରିଥିଲା। ହେଲେ ତାଜା ବାଜିବାରୁ ଏଥିରେ ସଫଳ ହୋଇପାରି ନ ଥିଲା। ଏଥିରେ ଉତ୍ତ୍ୟକ୍ତ ହୋଇ ହାତୀ ତାଙ୍କ ଦାଣ୍ଡ ଦୁଆରେ ଥିବା ବାଇକ୍ (ନଂ. ଓଡ଼ି ୧୯ ବି ୬୦୨୯), ଗରା, ଡେକ୍ଚି ଭାଙ୍ଗି ପକାଇଛି। ସେହିପରି ସାହିର ଅନ୍ୟ କେତେଜଣଙ୍କ ଘର ମଧ୍ୟ ହାତୀ ଭାଙ୍ଗି ଦେଇଥିବା ଜଣାପଡ଼ିଛି।
ଏ ନେଇ ରେଞ୍ଜର ହରମୋହନ ନାୟକ କୁହନ୍ତି, ହାତୀପଲ ଧାନ ଖେତରେ ପଶି ଫସଲ ନଷ୍ଟ କରୁଛନ୍ତି। ଗୋଠରୁ ବାହାରି ଉକ୍ତ ଦନ୍ତା ଜନବସତିରେ ପଶି ବ୍ୟାପକ କ୍ଷୟକ୍ଷତି କରୁଛି। ଅନ୍ୟ ସେକ୍ସନରୁ କର୍ମଚାରୀଙ୍କୁ ଡକାଯାଇ ହାତୀ ଘଉଡ଼ାଇବା କାର୍ଯ୍ୟରେ ନିୟୋଜିତ କରାଯାଇଛି। ନରହନ୍ତା ହାତୀର ଗତିବିଧି ଉପରେ ନଜର ରଖାଯାଇଥିବା ସେ ସୂଚନା ଦେଇଛନ୍ତି।