ଷ୍ଟାର କିଡ୍ ଅମ୍ଳାନ କୁମାରଙ୍କ ଓଲିଉଡ୍ କ୍ୟାରିୟର ଆରମ୍ଭ ହୋଇଥିଲା ‘ଟାର୍ଗେଟ’ରୁ। ଏହାସହ ସୁଧାକର ବସନ୍ତଙ୍କ ନିର୍ଦ୍ଦେଶିତ ‘ପ୍ରେମ ଅଢ଼େଇ ଅକ୍ଷର’ରୁ ବାବୁସାନ୍ଙ୍କ ଅପୋଜିଟ୍ରେ ଡେବ୍ୟୁ କରିଥିଲେ ରିୟା। ପରବର୍ତ୍ତୀ ସମୟରେ ଅମ୍ଳାନ ଏବଂ ରିୟାଙ୍କୁ ‘ଗୋଲାପି ଗୋଲାପି’, ‘ତୁ ମୋ ଦେହର ଛାଇ’, ‘କଲେଜ ଟାଇମ୍’ରେ ଏକାଠି ଅଭିନୟ କରିସାରିଛନ୍ତି। ଏବେ ପୁଣି ଥରେ ଏହି ଯୋଡି ଏକତ୍ର ବଡ ପରଦାରେ ମୁହଁ ଦେଖାଇବେ। ମା’ ପାଣ୍ଡବାଶୁଣୀ ଏଣ୍ଟରଟେନମେଣ୍ଟ ବ୍ୟାନରରେ ନିର୍ମିତ ହେବାକୁ ଯାଉଥିବା ନୂଆ ଓଡ଼ିଆ ସିନେମା ‘ତୋ ପାଇଁ କିଛି ବି..’ ରେ ଦୁହେଁ ଅଭିନୟ କରିବେ। ନିକଟରେ ଏହାର ମହୁରତ ଅନୁଷ୍ଠିତ ହୋଇଯାଇଛି। ଫିଲ୍ମଟିର ନିର୍ଦ୍ଦେଶନା ଦେବା ସହ ଏହାର କାହାଣୀ, ଚିତ୍ରନାଟ୍ୟ ଏବଂ ସଂଳାପ ରଚନା କରିଛନ୍ତି ନିରଞ୍ଜନ ବେହେରା। ସଙ୍ଗୀତ ଦାୟିତ୍ୱରେ ଅଛନ୍ତି ଗୁଡଲି ରଥ। ଏ ସମ୍ପର୍କରେ ନିରଞ୍ଜନ କହନ୍ତି, ‘ଏହି ଫିଲ୍ମର କାହାଣୀରେ ଲଭ୍, ଇମୋଶନ, କମେଡି, ଆକ୍ସନ ଏବଂ ଫ୍ୟାମିଲି ଡ୍ରାମା ରହିଛି। ଦର୍ଶକ ଏଥିରୁ ଏକ ଡିଫରେଣ୍ଟ ଲଭ ଷ୍ଟୋରୀର ବାସ୍ନା ପାଇବେ।’ ଏହାପୂର୍ବରୁ ନିରଞ୍ଜନ ‘ଆଣ୍ଟି ନମସ୍କାର’, ‘ଯୋଗୀ’, ‘ପ୍ରେମ ପାଇଁ ମହାଭାରତ’, ‘ହୀରୋ ନଂ ଜିରୋ’ ‘ପ୍ରେମଲୀଲା’ ଏବଂ ବବି ମିଶ୍ରଙ୍କ ପ୍ରଯୋଜିତ ‘ଫ୍ଲପ ସିନେମା’ର ନିର୍ଦ୍ଦେଶନା ଦେଇସାରିଛନ୍ତି।