ଭୁବନେଶ୍ୱର, ୧୬ା୧୨(ବ୍ୟୁରୋ): ରାଜ୍ୟରେ ପୁଣି ପିଆଜ ଦର ବଢ଼ିଲା। ପାଖାପାଖି ଦୁଇମାସ ଧରି ପିଆଜ ଦର ଆକାଶଛୁଆଁ ରହିଥିବାବେଳେ କିଛିଦିନ ହେବ ଦର ହ୍ରାସ ପାଇଥିଲା। ଅଳ୍ପ ଦିନର ସାମାନ୍ୟ ଆଶ୍ୱସ୍ତି ପରେ ଏବେ ପୁଣିଥରେ ଦର ବୃଦ୍ଧି ଖାଉଟିଙ୍କ ଚିନ୍ତା ବଢ଼ାଇଦେଇଛି। ଅନିୟମିତ ବର୍ଷା ଓ ନାଗରିକତ୍ୱ ସଂଶୋଧନ ଆଇନ ଯୋଗୁ ଯୋଗାଣ ବାଧାପ୍ରାପ୍ତ ହୋଇ ପିଆଜ ଦର ବୃଦ୍ଧି ପାଇଥିବା ଓଡ଼ିଶା ବ୍ୟବସାୟ ମହାସଂଘ ସାଧାରଣ ସମ୍ପାଦକ ସୁଧାକର ପଣ୍ଡା କହିଛନ୍ତି। ସୋମବାର ପିଆଜ ୮୦ରୁ ୧୦୦ଟଙ୍କା ପର୍ଯ୍ୟନ୍ତ ବିକ୍ରି ହୋଇଛି। ଯେତିକି ପରିମାଣର ପିଆଜ ରାଜ୍ୟକୁ ଆସିବା କଥା, ସେତିକି ପରିମାଣର ଆସିନାହିଁ। ସେପଟେ ଦୁଇ-ତିନିଦିନ ହେବ ବର୍ଷା ମଧ୍ୟ ଲାଗି ରହିଥିଲା। ତେଣୁ ଅମଳ ବାଧାପ୍ରାପ୍ତ ହୋଇଥିଲା। ଏହାସହ ନାଗରିକତ୍ୱ ସଂଶୋଧନ ଆଇନ ବିରୋଧରେ ସବୁ ସ୍ଥାନରେ ପ୍ରତିବାଦ ହେଉଛି, ଯାହା ଫଳରେ ଆବଶ୍ୟକ ସଂଖ୍ୟକ ଗାଡ଼ି ଯୋଗାଡ଼ ହୋଇପାରୁ ନାହିଁ। ଯେଉଁ ଗାଡ଼ି ବି ଆସୁଛି ତା’ର ଭଡ଼ା ଅଧିକ ହୋଇଯାଇଛି। ପୂର୍ବରୁ ପ୍ରତିଦିନ ୧୨-୧୩ ଗାଡ଼ିରେ ପ୍ରାୟ ୪୦୦ ଟନ୍ ପିଆଜ ଆସୁଥିଲା। ହେଲେ ଗତ ଶୁକ୍ରବାର ଦୁଇଟି ଗାଡ଼ି ଆସିଥିବାବେଳେ ଶନିବାର ମାତ୍ର ଗୋଟିଏ ପିଆଜ ଗାଡ଼ି ଆସିଥିଲା। ଏହାଛଡ଼ା ଏହି ସମୟରେ ପିଆଜର ଅଧିକ ଡିମାଣ୍ଡ ମଧ୍ୟ ରହିଛି। କାରଣ ପିକ୍ନିକ୍ ଋତୁ ସହ ଖ୍ରୀଷ୍ଟମାସ୍ ଓ ନୂଆବର୍ଷ ପାଇଁ ଲୋକେ ଅଧିକ ପରିମାଣରେ ପିଆଜ ନେବାକୁ ଚାହୁଁଛନ୍ତି। ଏହି ସବୁ ସମସ୍ୟା ଲାଗି ପିଆଜ ଦର ଅସ୍ଥାୟୀ ଭାବେ ବୃଦ୍ଧି ପାଇଛି। ତେବେ ଆସନ୍ତା ତିନି-ଚାରିଦିନ ଭିତରେ ପିଆଜ ଦର ପୁଣି ଖସି ଆସିବ। ତେଣୁ ସାଧାରଣ ଖାଉଟି ବ୍ୟସ୍ତ ବିବ୍ରତ ନ ହେବାକୁ ପଣ୍ଡା କହିଛନ୍ତି। ସୂଚନାଯୋଗ୍ୟ, ଗତ ଅକ୍ଟୋବର ମାସରେ ଅନିୟମିତ ବର୍ଷା ଫଳରେ ଦେଶରେ ପିଆଜ ଉତ୍ପାଦନ ପ୍ରଭାବିତ ହୋଇଥିଲା। ତେଣୁ ବଜାରରେ ପିଆଜର ଅଭାବ ସୃଷ୍ଟି ହୋଇଥିଲା। ବେଙ୍ଗାଲୁରୁ, ମହାରାଷ୍ଟ୍ରର ନାସିକ, ଆନ୍ଧ୍ରର କର୍ନୁଲରୁ ଓଡ଼ିଶାକୁ ମୁଖ୍ୟତଃ ପିଆଜ ଆସିଥାଏ। ତେଣୁ ଏହି ସମୟରେ ପିଆଜ ଦର ୧୬୦ ଟଙ୍କା ପର୍ଯ୍ୟନ୍ତ ବଢ଼ିଯାଇଥିଲା।