ବ୍ରହ୍ମପୁର ଅଫିସ,୩ା୧- ବ୍ରହ୍ମପୁର ଆଇଟିଆଇ ପୁଣି ବିଶ୍ୱସ୍ତରରେ ରେକର୍ଡ କରିବାକୁ ଯାଉଛି। ପୂର୍ବରୁ ସ୍କ୍ରାପ୍ ତଥା ଆବର୍ଜନାରେ ଏସିଆର ସର୍ବ ବୃହତ୍ ଗିଟାର ଏସିଆ ବୁକ ଅଫ ରେକର୍ଡ ଓ ଜିରାଫ ଇଣ୍ଡିଆ ବୁକ ଅଫ ରେକର୍ଡରେ ସ୍ଥାନ ପାଇଥିଲା। ଏବେ ଛାତ୍ରୀଛାତ୍ରଙ୍କ ଦ୍ୱାରା ସ୍କ୍ରାପ୍ରେ ନିର୍ମିତ ୨୨ଫୁଟ ଉଚ୍ଚତାର ବନିଶୀ କଣ୍ଟାଯୁକ୍ତ ମାଛ କଳାକୃତି ଗିନିଜ ବୁକ ଅଫ ରେକର୍ଡରେ ସ୍ଥାନୀତ ହେବାକୁ ଯାଉଥିବା ଅନୁଷ୍ଠାନ ଅଧ୍ୟକ୍ଷ ଡ. ରଜତ ପାଣିଗ୍ରାହୀ ସୂଚାଇଛନ୍ତି। ଆଇଟିଆଇର ପୁରୁଣା ହଷ୍ଟେଲ କୋଠାରୁ ବାହାରିଥିବା ଲୁହା ରଡ, ସିଟ୍ରେ ନିର୍ମିତ ଏହି ମାଛ ବନିଶୀ କଣ୍ଟାକୁ ଫିଟର, ଓ୍ବଲ୍ଡର, ପେଣ୍ଟର ଟ୍ରେଡର ଛାତ୍ରୀଛାତ୍ରମାନେ ଦୀର୍ଘ ୪୦ ଦିନ ମଧ୍ୟରେ ପ୍ରସ୍ତୁତ କରିଛନ୍ତି। ଏହାର ଓଜନ ୪୦୦ କେଜିରୁ ଊର୍ଦ୍ଧ୍ୱ ରହିଛି। ଏହାକୁ ବର୍ତ୍ତମାନ ଗିନିଜ୍ ବୁକ ଅଫ ରେକର୍ଡସ୍ ପାଇଁ ଆବେଦନ କରାଯାଇଛି। ଏବେ ସୁଦ୍ଧା ଗିନିଜ୍ ବୁକ ଅଫ ରେକର୍ଡସ୍ରେ ୟୁଏସଏର ଆବର୍ଜନାରେ ପ୍ରସ୍ତୁତ ୧୦.୧୦ ଫୁଟ ଉଚ୍ଚ ଓ ୧୫.୬ ଫୁଟ ଉଚ୍ଚତାର ଦୁଇଟି ବନିଶୀକଣ୍ଟାଯୁକ୍ତ ମାଛ ରହିଛି। ତେଣୁ ଏହି କଳାକୃତି ଆଗାମୀ ଦିନରେ ଗିନିଜ୍ ବୁକ ଅଫ ରେକର୍ଡସ୍ରେ ସ୍ଥାନିତ ହେବା ନେଇ ଆଶା ରହିଥିବା ଅଧ୍ୟକ୍ଷ ଡ. ପାଣିଗ୍ରାହୀ କହିଛନ୍ତି।