ମୁମ୍ବାଇ: ବଲିଉଡ୍ର ଖିଲାଡି ବୟ ଅକ୍ଷୟ କୁମାର ଏବଂ ଆୟୁଷ୍ମାନ ଖୁରାନାଙ୍କ ପ୍ରଶଂସକଙ୍କ ପାଇଁ ଖୁସି ଖବର। କଥା କ’ଣ କି, ଅକ୍ଷୟ କୁମାର ଏବଂ ତାଙ୍କ ସାଥୀ କଳାକାର କରୀନା କପୁର, ଦିଲଜିତ ଦୋସାଞ୍ଜ ଏବଂ କିଆରା ଆଡଭାଣୀଙ୍କ କମେଡି ଭିତ୍ତିକ ଡ୍ରାମା ଫିଲ୍ମ ‘ଗୁଡ୍ ନ୍ୟୁଜ୍’ ପୁଣି ଥରେ ସିନେମା ଘରେ ମୁକ୍ତିଲାଭ କରିବ। ଏଥିସହ ଆୟୁଷ୍ମାନ ଖୁରାନାଙ୍କ ଗତବର୍ଷ ମୁକ୍ତିଲାଭ କରିଥିବା ଫିଲ୍ମ ‘ଡ୍ରିମ୍ ଗର୍ଲ’ ମଧ୍ୟ ଏଥିରେ ସାମିଲ ହୋଇଛି। ତେବେ ଏହା ଭାରତରେ ନୁହେଁ ବରଂ ୟୁଏଇରେ ମୁକ୍ତିଲାଭ କରିବ। କରୋନା ମହାମାରୀ ପାଇଁ ସାରା ବିଶ୍ୱରେ ଲକ୍ଡାଉନ୍ ଯୋଗୁ ସର୍ବାଧିକ ପ୍ରଭାବିତ ହୋଇଥିବା ସ୍ଥାନ ମଧ୍ୟରେ ସାଉଦୀ ଆରବ ମଧ୍ୟ ଗୋଟିଏ। ଦୁବାଇରେ ଧୀରେ ଧୀରେ ଜନଜୀବନ ସାମାନ୍ୟ ହୋଇଥିବା ବେଳେ ମେ’ ୨୭ ତାରିଖରୁ ସେଠାରେ ସିନେମା ଘର ଗୁଡ଼ିକ ଖୋଲାଯାଇଛି। ଏବେ ଏହି ସିନେମା ଘରେ ଉଭୟ ହଲିଉଡ୍ ଏବଂ ବଲିଉଡ୍ ଫିଲ୍ମ ଧୁମ୍ ମଚାଇବା ଲାଗି ପ୍ରସ୍ତୁତ ଅଛି। ଗତବର୍ଷ ରିଲିଜ୍ ହୋଇଥିବା ବଲିଉଡ୍ ଫିଲ୍ମ ‘ଗୁଡ ନ୍ୟୁଜ୍’ ଏବଂ ‘ଡ୍ରିମ୍ ଗର୍ଲ’ ଭାରତୀୟ ସିନେମା ଘରେ ୧୦୦ କୋଟିରୁ ଊର୍ଦ୍ଧ୍ୱ ଟଙ୍କାର ବ୍ୟବସାୟ କରିଥିଲା। ଗୁଡ୍ ନ୍ୟୁଜ୍ର ମୁଖ୍ୟ ଭୂମିକାରେ ଅଭିନୟ କରିଥିବା ଅଭିନେତା ଅକ୍ଷୟ କୁମାର କହିଛନ୍ତି ଯେ, ଦୁବାଇରେ ତାଙ୍କର ଫିଲ୍ମ ଗୁଡ଼ିକ ସର୍ବଦା ଦର୍ଶକ ପସନ୍ଦ କରିଥାନ୍ତି। ତେବେ ଏହି ଘଡିସନ୍ଧି ମୁହୂର୍ତ୍ତରେ ତାଙ୍କ ଅଭିନୀତ ଫିଲ୍ମ ଦର୍ଶକଙ୍କୁ ବେଶ୍ ମନୋରଞ୍ଜନ ଯୋଗାଇବ ବୋଲି ସେ ଆଶ କରିଛନ୍ତି।