ନୂଆଦିଲ୍ଲୀ,୧୪।୭: ପାକିସ୍ତାନର ଓ୍ବାଘା ସୀମାରେ ଭାରତ-ପାକିସ୍ତାନ ମଧ୍ୟରେ କରତାରପୁର କରିଡରକୁ ନେଇ ଆରମ୍ଭ ହୋଇଥିବା ବୈଠକରେ ଉପସ୍ଥିତ ଥିବା ମହିଳାଙ୍କୁ ନେଇ ପୁଣି ଥରେ ଚର୍ଚ୍ଚା ଆରମ୍ଭ ହୋଇ ଯାଇଛି। ଅତିତରେ ବାଲାକୋଟ ଆକ୍ରମଣ ପରେ ଭାରତୀୟ ବାୟୁସେନାର ଓ୍ବିଙ୍ଗ କମାଣ୍ଡର ଅଭିନନ୍ଦନ ବର୍ଥମାନଙ୍କୁ ପାକିସ୍ତାନ ମୁକୁଳାଇବା ପରେ ତାଙ୍କୁ ଓ୍ବାଘା ସୀମା ପର୍ଯ୍ୟନ୍ତ ଛାଡିବାକୁ ଆସି ଚର୍ଚ୍ଚାକୁ ଆସିଥିବା ମହିଳା ଜଣଙ୍କ ହି ଁ ଏହି ବୈଠକରେ ଉପସ୍ଥିତ ଅଛନ୍ତି। ସେତେବେଳେ ତାଙ୍କ ଉପସ୍ଥିତିକୁ ନେଇ ନାନା ପ୍ରଶ୍ନ ଉଙ୍କି ମାରିଥିବା ବେଳେ ଏବେ ମଧ୍ୟ ତାଙ୍କ ଉପସ୍ଥିତି ଆସିଛି ଚର୍ଚ୍ଚାକୁ। ତେବେ ଏହି ମହିଳା ଜଣଙ୍କ ହେଉଛନ୍ତି ପାକିସ୍ତାନର ବୈଦେଶିକ କାର୍ଯ୍ୟାଳୟରେ ନିର୍ଦ୍ଦେଶକ ଥିବା ଡା. ଫରିହା ବୁଗତି। ସେ ଜଣେ ଏଫ୍ଏସ୍ପି(ଭାରତର ଆଇଏଫ୍ଏସ୍) ଅଧିକାରୀ। ସେ ପାକିସ୍ତାନ ବୈଦେଶିକ କାର୍ଯ୍ୟାଳୟର ପ୍ରଭାରି ଭାବେ ଭାରତ ସମ୍ବନ୍ଧୀୟ ମାମଲା ବୁଝାସୁଝା କରୁଛନ୍ତି। ସୂଚନାଯୋଗ୍ୟ, ପାକିସ୍ତାନ ଜେଲରେ ବନ୍ଦୀ ଥିବା କୁଲଭୂଷଣ ଯାଦବ ମାମଲାରେ ଥିବା ମୁଖ୍ୟ ଅଧିକାରୀଙ୍କ ମଧ୍ୟରେ ସେ ହେଉଛନ୍ତି ଜଣେ। ତେବେ କରତାରପୁର କରିଡରକୁ ନେଇ ବସିଥିବା ବୈଠକରେ ସେ ହେଉଛନ୍ତି ଜଣେ ମୁଖ୍ୟ ସଦସ୍ୟ। ବିଶେଷ ସୂତ୍ରର ସୂଚନା ମୁତାବକ ବୁଗତି ହିଁ ଏହି ବୈଠକରେ ଅଧ୍ୟକ୍ଷତା କରୁଛନ୍ତି। କାରଣ ସାମ୍ନାକୁ ଆସିଥିବା ଏକ ଫଟୋରେ ଦେଖିବାକୁ ମିଳିଛି ଦୁଇ ଦେଶର ପ୍ରତିନିଧି ମଣ୍ଡଳୀଙ୍କ ମଝିରେ ସେ ବସିଛନ୍ତି। ତେବେ ପାକସ୍ତାନ ପକ୍ଷରୁ ତାଙ୍କ ବିଦେଶ ମନ୍ତ୍ରଣାଳୟର ପ୍ରବକ୍ତା ଡା. ମହମ୍ମଦ ଫୈସଲ କରୁଥିବା ବେଳେ ଭାରତର ପ୍ରତିନିଧି ମଣ୍ଡଳର ନେତୃତ୍ୱ ନେଇଛନ୍ତି ସ୍ବରାଷ୍ଟ୍ର ମନ୍ତ୍ରଣାଳୟର ଯୁଗ୍ମ ସଚିବ ଏସ୍ ସିଏଲ୍ ଦାସ ଓ ବୈଦେଶିକ ମନ୍ତ୍ରଣାଳୟର ଯୁଗ୍ମ ସଚିବ ଦିପକ ମିତ୍ତଲ।