ଭୁବନେଶ୍ୱର,୧୦।୧୧(ବ୍ୟୁରୋ): ପୁଣି ଥରେ ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ କରାଯାଇଥିବା ୫-ଟି କାର୍ଯ୍ୟକ୍ରମକୁ ସମାଲୋଚନା କରିଛନ୍ତି ଭାଜପା ନେତ୍ରୀ ତଥା ଏମ୍ପି ଅପରାଜିତା ଷଡ଼ଙ୍ଗୀ। ସମ୍ବଲପୁର ଗସ୍ତ ଅବସରରେ ସମାଲୋଚନା କରି ସେ କହିଛନ୍ତି, ଏହା କୌଣସି ଅଭିନବ ପଦକ୍ଷେପ ନୁହେଁ। ଗୋଟିଏ କିମ୍ବା ଦୁଇଟିରେ ନୁହେଁ ବରଂ ସବୁ ବିଭାଗରେ ୫-ଟି ଆସୁ। ଏକ ପାଓ୍ବାର କରିଡର ସୃଷ୍ଟି କରି ମନ୍ତ୍ରୀ, ସଚିବଙ୍କୁ ଦୁର୍ବଳ କରା ନ ଯାଉ ବୋଲି ସେ କହିଛନ୍ତି। ଅପରପକ୍ଷେ କର୍ମଚାରୀ ଓ ଡାକ୍ତରଙ୍କ ଉପରେ ନିଆଯାଉଥିବା କାର୍ଯ୍ୟାନୁଷ୍ଠାନ ଉଚିତ କି ପ୍ରଶ୍ନରେ ସେ କହିଥିଲେ, ସବୁ ଜିନିଷର ଏକ ତରିକା ରହିଛି। ସେମାନଙ୍କୁ ସମୟ ଦିଆଯାଉ। ସେହିଭଳି କନିଷ୍ଠ ସଚିବଙ୍କ ଗସ୍ତରେ ବରିଷ୍ଠ ସଚିବ ଉପସ୍ଥିତ ରହୁଥିବା ପ୍ରଶ୍ନରେ ସେ କହିଛନ୍ତି, ମୁଁ ଓଡ଼ିଶାରେ ୨୦ ବର୍ଷ ଓ ଦିଲ୍ଲୀରେ ୫ ବର୍ଷ ଚାକିରି କରିଛି। ହେଲେ କୌଣସି ସ୍ଥାନରେ ଏଭଳି କିଛି ଦେଖିନାହିଁ। ଏହା ଶାସନ ବ୍ୟବସ୍ଥାର ବିସଂଗତି। ବରିଷ୍ଠ ଅଧିକାରୀଙ୍କୁ ଗସ୍ତବେଳେ କନିଷ୍ଟ ଅଧିକାରୀ ସହାୟତା କରିବା କଥା। ବରିଷ୍ଠମାନେ କନିଷ୍ଠଙ୍କ ସହାୟତା ପାଇଁ ଯିବା ଏକ ପ୍ରଶାସନିକ ବିସଂଗତି। ଏଣୁ ପ୍ରଶାସନ ବ୍ୟବସ୍ଥାର ମଡେଲକୁ ପରିବର୍ତ୍ତନ କରିବାକୁ ହେବ ବୋଲି ଅପରାଜିତା କହିଛନ୍ତି।