ଭଦ୍ରକ ଅଫିସ, ୨୨।୬ – ଭଦ୍ରକ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ଶୁକ୍ରବାର ପୁତୁରାକୁ ମରଣାନ୍ତକ ଆକ୍ରମଣ ମାମଲାର ବିଚାର କରି ଦାଦା ବାସୁଦେବପୁର ଥାନା ଅଧୀନ ବୈକୁଣ୍ଠପୁର ଗ୍ରାମର ବିପିନ ବାରିକଙ୍କୁ ଦୋଷୀ ସାବ୍ୟସ୍ତ କରି ୬ ବର୍ଷ ଜେଲ୍ ସହ ୧୦ ହଜାର ଟଙ୍କା ଜରିମାନା ଦଣ୍ଡାଦେଶ ଶୁଣାଣି କରିଛନ୍ତି।
ପ୍ରକାଶ ଯେ, ବୈକୁଣ୍ଠପୁର ଗ୍ରାମର ନରେନ୍ଦ୍ର ବାରିକଙ୍କ ପୁଅ ଦେବେନ୍ଦ୍ର ସେହି ଗ୍ରାମର କାମିନୀମଣି ଯେନାଙ୍କୁ ପ୍ରେମବିବାହ କରିଥିଲେ। ଦେବେନ୍ଦ୍ରଙ୍କ ପରିବାର ଏହି ବିବାହକୁ ବିରୋଧ କରି ଉଭୟଙ୍କୁ ଘରେ ପୁରାଇ ଦେଉ ନ ଥିଲେ। ଦେବେନ୍ଦ୍ର ତାଙ୍କ ଶ୍ୱଶୁରଘରେ ରହୁଥିଲେ। ୨୦୧୧ ଜୁନ୍ ୪ ତାରିଖ ସକାଳେ ଦେବେନ୍ଦ୍ର କୌଣସି କାମରେ ବ୍ରାହ୍ମଣୀଗଁା ବଜାରକୁ ଯାଇଥିବା ବେଳେ ବିପିନ ତାଙ୍କୁ ଡାକି ଅଟକାଇଥିଲେ। ସେ ଏକ ଛୁରୀରେ ତାଙ୍କ ପେଟକୁ ଭୁଷି ଦେବାରୁ ଦେବେନ୍ଦ୍ର ଗୁରୁତର ଭାବେ ଆହତ ହୋଇ ଚିକିତ୍ସିତ ହୋଇଥିଲେ। ଏହି ଘଟଣାରେ ଦେବେନ୍ଦ୍ରଙ୍କ ସ୍ତ୍ରୀ କାମିନୀମଣି ବାସୁଦେବପୁର ଥାନାରେ ଏତଲା ଦେଇଥିଲେ। ଏନେଇ ଥାନାରେ ମାମଲା (ନଂ.୧୮୬/୨୦୧୧) ରୁଜୁ ହୋଇ ବିପିନଙ୍କ ବିରୋଧରେ କୋର୍ଟରେ ଚାର୍ଜଶିଟ୍ ଦାଖଲ କରାଯାଇଥିଲା। ଭଦ୍ରକ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ଅମିୟ ରଞ୍ଜନ ଯେନା ସମସ୍ତ ସାକ୍ଷ୍ୟ ବୟାନକୁ ଭିତ୍ତିକରି ଏହି ଦଣ୍ଡାଦେଶ ଶୁଣାଣି କରିଛନ୍ତି। ସରକାରଙ୍କ ତରଫରୁ ଅତିରିକ୍ତ ପବ୍ଲିକ ପ୍ରସିକ୍ୟୁଟର ଯତିକାନ୍ତ ନାୟକ ମାମଲା ପରିଚାଳନା କରୁଥିଲେ।