ନୂଆଦିଲ୍ଲୀ,୨୫-୯: ସାରା ଦେଶର ୨୪ ରୁଟରେ ପ୍ରାଇଭେଟ ଟ୍ରେନ ଚଳାଇବା ନେଇ ରେଳ ମନ୍ତ୍ରଣାଳୟ ଯୋଜନା ରଖିଛି। ଏହି କ୍ରମରେ ରାଜ୍ୟରୁ ପୁରୀଠାରୁ ପଶ୍ଚିମବଙ୍ଗର ହଓଡା ମଧ୍ୟରେ ଏଭଳି ଏକ ଟ୍ରେନ ଗଡିପାରେ। ଚଳିତ ମାସ ୨୭ରେ ରେଳ ବୋର୍ଡ ପକ୍ଷରୁ ଏହାର ସବୁ ସଦସ୍ୟଙ୍କ ଲାଗି ଏକ ବୈଠକ ଆୟୋଜନ କରାଯାଉଛି। ଘରୋଇ ଯାତ୍ରୀବାହୀ ଟ୍ରେନ ଚଳାଚଳ ସମ୍ପର୍କୀତ ବିଭିନ୍ନ ପ୍ରସଙ୍ଗ ଉପରେ ଏଠାରେ ଆଲୋଚନା ହେବ। ଏହା ପୂର୍ବରୁ ରେଳ ବୋର୍ଡ ପକ୍ଷରୁ ସାଙ୍କେତିକ ରୁଟ ସମ୍ପର୍କରେ ପ୍ରସ୍ତାବ ଦିଆଯାଇଛି। ଏହା ମଧ୍ୟରେ ପୁରୀ-ହାଓଡା ସମେତ ମୁମ୍ବାଇ-ଅହମ୍ମଦାବାଦ, ମୁମ୍ବାଇ-ପୁଣେ, ହାଓଡା-ଟାଟା, ହାଓଡା-ପାଟଣା, ଦିଲ୍ଲୀ, ଚଣ୍ଡିଗଡ, ଅମୃତସର ଭଳି ପ୍ରମୁଖ ରୁଟ ସ୍ଥାନ ପାଇଛି। ଏହାବାଦ ଅନ୍ୟ ସାମ୍ଭାବ୍ୟ ଇଣ୍ଟରସିଟି ରୁଟଗୁଡିକରେ ଘରୋଇ ଟ୍ରେନ ଚଳାଚଳ ନେଇ ମଧ୍ୟ ଆଲୋଚନା କରାଯିବ। ସେହିଭଳି ଦିଲ୍ଲୀ-ମୁମ୍ବାଇ, ଦିଲ୍ଲୀ-ହାଓଡା , ସିକନ୍ଦରାବାଦ-ଦିଲ୍ଲୀ, ଦିଲ୍ଲୀ-ଚେନ୍ନାଇ, ହାଓଡା-ମୁମ୍ବାଇ ଭଳି ଓଭରନାଇଟ ଏବଂ ଦୀର୍ଘ ଦୂରତ୍ୱ ବିଶିଷ୍ଟ ଟ୍ରେନ ସେବା ସେବା ମଧ୍ୟ ଏହା ମଧ୍ୟରେ ସାମିଲ ହୋଇପାରେ। ଏହି ପଦକ୍ଷେପ ଅନ୍ତର୍ଗତ ଘରୋଇ ଅପରେଟରମାନେ ଭଡା ନିର୍ଦ୍ଧାରଣ ଏବଂ ଆଦାୟ ନେଇ ଅଧିକାର ଲାଭ କରିବେ। ଏଥି ଲାଗି କନସେସନ ଏଗ୍ରିମେଣ୍ଟ ମଧ୍ୟ ହେବ। ଘରୋଇ ଟ୍ରେନ ଚଳାଚଳ ଲାଗି ସାମ୍ଭାବ୍ୟ ଏବଂ ପରିଚାଳନା ସୁଗମ ହେଉଥିବା ରୁଟଗୁଡିକୁ ବାଛିବା ଲାଗି ଜୋନାଲ ରେଲଓ୍ବେର ମତାମତ ଲୋଡାଯାଇଛି। ରେଳ ଯାତ୍ରୀଙ୍କୁ ବିଶ୍ୱ ସ୍ତରୀୟ ସେବା ଯୋଗାଣ ଲକ୍ଷ୍ୟରେ ମନ୍ତ୍ରଣାଳୟ ପକ୍ଷରୁ ଏଭଳି ନିଷ୍ପତ୍ତି ହୋଇଛି। ରେଳଓ୍ବେ ଏହାର ୧୦୦ ଦିନିଆ ଆକ୍ସନ ପ୍ଲାନ ଅନ୍ତର୍ଗତ ଏନେଇ ଉଲ୍ଲେଖ କରିଛି। ବିଭିନ୍ନ ବର୍ଗରେ ଟ୍ରେନ ଚଳାଚଳ ନେଇ ଘରୋଇ ଅପରେଟରଙ୍କୁ ବିଡିଂ ଯୋଗେ ଚୟନ କରାଯିବ। ଏହା ଦ୍ୱାରା ଦେଶର ପ୍ରମୁଖ ସହରକୁ ସେବା ଯୋଗାଣ କରିବା ନେଇ ଯୋଜନା ରଖାଯାଇଛି।
