ବରଗଡ଼ ଅଫିସ,୨୧।୨: ବରଗଡ଼ ସହରରେ ରହିଥିବା ପୁରୁଣା ଜିଲା ମୁଖ୍ୟ ଡାକ୍ତରଖାନାରେ ପୂର୍ଣ୍ଣାଙ୍ଗ ସ୍ବାସ୍ଥ୍ୟସେବା ଯୋଗାଇଦେବା ଦାବିରେ ବରଗଡ଼ ହସ୍ପିଟାଲ ବଞ୍ଚାଅ ଅଭିଯାନ ପକ୍ଷରୁ ଶୁକ୍ରବାରରୁ ଅଭିନବ ଶୈଳୀରେ ଦାବି ଉପସ୍ଥାପନ କରାଯାଇଛି। ପୂର୍ବାହ୍ନ ପ୍ରାୟ ୧୦ଟାରୁ ଏହି ଅଭିଯାନର ସଭ୍ୟାସଭ୍ୟବୃନ୍ଦ ଡାକ୍ତରଖାନା ପରିସରରେ ହାତରେ ଝାଡୁ ଧରି ସମବେତ ହୋଇଥିଲେ। ଏହାପରେ ସେମାନେ ଡାକ୍ତରଖାନା ସଫେଇ କରିଥିଲେ। ଆସନ୍ତା ୧୫ଦିନ ଧରି ଏଠାରେ ଏଭଳି ସଫେଇ କାର୍ଯ୍ୟ ଜାରି ରଖି ମାର୍ଚ୍ଚ ୮ତାରିଖ ଆନ୍ତର୍ଜାତିକ ମହିଳା ଦିବସରେ ଜିଲାପାଳ ଅଫିସ ଆଗରେ ଏକ ବିଶାଳ ମହିଳା ସମାବେଶର ଦାବି ଉପସ୍ଥାପନ କରାଯିବ ବୋଲି ବରଗଡ଼ ହସପିଟାଲ ବଞ୍ଚାଅ ଅଭିଯାନ ନିଷ୍ପତ୍ତି ନେଇଛି।
ସୂଚନାଯୋଗ୍ୟ, କିଛିଦିନ ଧରି ସନ୍ଧ୍ୟାରେ ଏହି ଅଭିଯାନ ପକ୍ଷରୁ ମହମବତି ଶୋଭାଯାତ୍ରା ମାଧ୍ୟମରେ ଉପରୋକ୍ତ ଦାବି ଉପସ୍ଥାପନ କରାଯାଉଥିଲା। ତେବେ ଗୁରୁବାର ଏହି ଡାକ୍ତରଖାନାକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର (ସିଏଚ୍ସି) ମାନ୍ୟତା ପ୍ରଦାନ ନେଇ ସରକାରୀ ବିଜ୍ଞପ୍ତି ପ୍ରକାଶ ପାଇବା ପରେ ବରଗଡ଼ ହସପିଟାଲ ବଞ୍ଚାଅ ଅଭିଯାନ ମହମବତି ଶୋଭାଯାତ୍ରା ବଦଳରେ ଡାକ୍ତରଖାନା ସଫେଇ କରି ପୂର୍ଣ୍ଣାଙ୍ଗ ସ୍ବାସ୍ଥ୍ୟସେବା ଦାବି ଉପସ୍ଥାପନ କରୁଛି। ଏଥିରେ ଚାଷୀନେତା ଲିଙ୍ଗରାଜଙ୍କ ସମେତ ପବିତ୍ର ଦେହୁରୀ, ଭବାନୀ ପ୍ରସାଦ ସାହୁ, ଅସିତ ସାହୁ, ଅମିତାଭ ପାତ୍ର, ରମେଶ ପତିଙ୍କ ସମେତ ବହୁସଂଖ୍ୟକ ମହିଳା ସାମିଲ ହୋଇଛନ୍ତି।