ଅନୁଗୋଳ ଅଫିସ, ୮।୬- ସୋସିଆଲ ମିଡିଆରେ ବୁଲୁଥିବା ଏକ ଗୁଜବକୁ ଜାଣି ନ ପାରି ଅଧିକ ଅର୍ଥ ପାଇବା ଆଶାରେ ଅନୁଗୋଳ ଜିଲା ମୁଖ୍ୟ କାର୍ଯ୍ୟାଳୟକୁ ସୋମବାର ଧାଇଁ ଆସିଥିବା ବଅଁରପାଳ ବ୍ଲକ କୁଶପଙ୍ଗି ଗାଁର ଭିନ୍ନକ୍ଷମ ଅରବିନ୍ଦ ନାଏକ(୪୮)ଙ୍କୁ ଶେଷରେ ତାଙ୍କର ପୁରୁଣା ନୋଟ୍ ଓ କଏନ୍ ସହ ଘରକୁ ଫେରିବାକୁ ପଡ଼ିଛି। ପୁରୁଣା ନୋଟ୍ ବଦଳରେ ଅଧିକ ଅର୍ଥ ମିଳିବା ସମ୍ପୂର୍ଣ୍ଣ ମିଥ୍ୟା ଓ ଏହା ଏକ ଗୁଜବ ବୋଲି ପ୍ରଶାସନିକ ଅଧିକାରୀମାନେ ତାଙ୍କୁ ବିଶ୍ୱାସ ଦେଇଥିବା ଅରବିନ୍ଦ କହିଛନ୍ତି।
ଅରବିନ୍ଦଙ୍କ କହିବା ଅନୁଯାୟୀ, ବୁଢ଼ୀ ମା’ ସହ ୫ ବର୍ଷର ଦୁଇ ଯାଆଁଳା ଶିଶୁପୁତ୍ରଙ୍କୁ ନେଇ ତାଙ୍କ ପରିବାର। କେବଳ ଭିନ୍ନକ୍ଷମ ଭତ୍ତା ଓ ରାଶନ ସାମଗ୍ରୀ ଛଡ଼ା ଅନ୍ୟ କିଛି ସରକାରୀ ସହାୟତା ମିଳୁନାହିଁ। ଫଳରେ ଅତି ଦୟନୀୟ ଅବସ୍ଥାରେ ସେ ପରିବାର ଚଳାଉଛନ୍ତି। ପୁରୁଣା ନୋଟ୍ ଓ କଏନ ଦେଲେ ଅଧିକ ଅର୍ଥ ମିଳୁଥିବା ସମ୍ପର୍କରେ ସେ ସୋସିଆଲ ମିଡିଆରୁ ଜାଣିବା ପରେ ମନରେ ଉତ୍ସାହ ଆସିଥିଲା। ଫଳରେ ଘରେ ଥିବା କିଛି ପୁରୁଣା ନୋଟ୍ ଓ କଏନ ଧରି ସେ ବହୁ ଆଶାରେ କୁଶପଙ୍ଗିରୁ ଜିଲା କାର୍ଯ୍ୟାଳୟକୁ ଧାଇଁ ଆସିଥିଲେ। ଏପରି କି ଜିଲାପାଳଙ୍କୁ ମଧ୍ୟ ଭେଟିଥିଲେ। ହେଲେ ପ୍ରଶାସନିକ ଅଧିକାରୀମାନେ ଏହା ଏକ ଗୁଜବ ବୋଲି ତାଙ୍କୁ ବିଶ୍ୱାସ ଦେବା ସହ ଆର୍ବିଆଇରେ ପୁରୁଣା ଟଙ୍କା ବଦଳାଇବାକୁ ପରାମର୍ଶ ଦେଇଥିଲେ। ହେଲେ ଏତେବାଟ ଯିବାକୁ ସକ୍ଷମ ନୁହନ୍ତି ବୋଲି କହି ଘରକୁ ଫେରି ଯାଉଥିବା ଅରବିନ୍ଦ ପ୍ରକାଶ କରିଛନ୍ତି। ଭିନ୍ନକ୍ଷମ ଅରବିନ୍ଦଙ୍କ ଅନ୍ୟ ସମସ୍ୟା ସମ୍ପର୍କରେ ଜଣେ ପ୍ରଶାସନିକ ଅଧିକାରୀ କହିଛନ୍ତି, ଭିନ୍ନକ୍ଷମଙ୍କ ପାଇଁ ସରକାରଙ୍କ ବିଭିନ୍ନ ଯୋଜନା ରହିଛି। ଅରବିନ୍ଦ ଏ ନେଇ ପ୍ରଶାସନକୁ ଅଭିଯୋଗ କଲେ କିଛି ବ୍ୟବସ୍ଥା କରାଯାଇପାରିବ।