ଦେଶର ସୁରକ୍ଷା ଦାୟିତ୍ୱରେ ଥିବା ଯବାନମାନେ ପ୍ରତିକୂଳ ପରିସ୍ଥିତିରେ ଥାଇ ସୁଦ୍ଧା ଜନସାଧାରଣଙ୍କ ସେବା କରିବାକୁ ଭୁଲନ୍ତି ନାହିଁ। ହେଲେ ଜଣେ ଯବାନ ଶହୀଦ ହେବା ପରେ, ପରିବାର ଉପରେ ବିପଦ ମାଡ଼ିଆସେ। ଏହାକୁ ଦୃଷ୍ଟିରେ ରଖି ବର୍ତ୍ତମାନ ସମୟରେ ଯବାନମାନଙ୍କ ପରିବାରର ସୁରକ୍ଷା ଲାଗି ଅନେକ କାର୍ଯ୍ୟକ୍ରମ ହାତକୁ ନିଆଯାଉଛି। ଏତଦ୍ବ୍ୟତୀତ କଳାକାର, ଖେଳାଳିମାନେ ମଧ୍ୟ ଶହୀଦଙ୍କ ପରିବାରକୁ ସହାୟତାର ହାତ ବଢ଼ାଉଛନ୍ତି। ତେବେ ବିହାର ଶେଖପୁରା ଜିଲାର ଜିଲାପାଳ ପୁଲ୍ଓ୍ବାମା ଶହୀଦଙ୍କ ପିଲାଙ୍କ ଲାଳନପାଳନ ଖର୍ଚ୍ଚ ତୁଲାଇବେ ବୋଲି ଘୋଷଣା କରି ଚର୍ଚ୍ଚାକୁ ଆସିଛନ୍ତି। ସେ ହେଲେ ଇନାୟତ ଖାନ। ପ୍ରଥମେ ସେ ଜଣେ ଇଞ୍ଜିନିୟର ଥିବା ବେଳେ ୨୦୧୧ ମସିହାରେ ସିଭିଲ ସେବା ପରୀକ୍ଷାରେ ଉତ୍ତୀର୍ଣ୍ଣ ହୋଇ ବିହାରର ଉକ୍ତ ଜିଲାରେ ଜିଲାପାଳ ଭାବେ ଯୋଗ ଦେଇଥିଲେ। ଇନାୟତ ଜଣେ ଅନୁଶାସିତ ଅଫିସର ଭାବେ ସରକାରୀ ବ୍ୟବସ୍ଥାକୁ ସୁଧାରିବାକୁ ଅନେକ କାମ କରିଆସୁଛନ୍ତି। ଏଥିସହ ସେ ବିହାରର ଶହୀଦ ସିଆରପିଏଫ୍ ଯବାନ ରତନ କୁମାର ଠାକୁର ଏବଂ ସଞ୍ଜୟ ସିହ୍ନାଙ୍କୁ ଶ୍ରଦ୍ଧାଞ୍ଜଳି ଦେବାକୁ ଯାଇ ଉଭୟଙ୍କ ଗୋଟିଏ-ଗୋଟିଏ ଝିଅଙ୍କୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଛନ୍ତି। ସେ ଆଜୀବନ ଉଭୟଙ୍କ ପାଠପଢ଼ା ଏବଂ ଅନ୍ୟାନ୍ୟ ଖର୍ଚ୍ଚ ତୁଲାଇବେ ବୋଲି କହିଛନ୍ତି। ଏହାବ୍ୟତୀତ ଇନାୟତ ସର୍ବଦା ନିଜ ଦରମାର ଦୁଇ ଦିନର ବେତନ ଉଭୟ ପରିବାରକୁ ଦେବେ ବୋଲି ଘୋଷଣା କରିଛନ୍ତି। ସେ କୁହନ୍ତି, ଯଦି ଭଗବାନ ତୁମକୁ ସକ୍ଷମ କରିଛନ୍ତି, ତେବେ ଅନ୍ୟମାନଙ୍କ କାମରେ ଆସିବା ବୋଲି ସେ ବିଶ୍ୱାସ କରନ୍ତି। ଜିଲାପାଳଙ୍କ ଏଭଳି କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଉଛି।