ଲାଠୋର, ୧୬ା୫ (ଡି.ଏନ.ଏ): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ଲାଠୋର ତଲିପଡ଼ାର ଜୟଧର ଭୁଏ(୩୨)। ସେ ବହୁତ୍ ଦିନୁ ଯକ୍ଷ୍ମା ରୋଗ୍ରେ ପୀଡ଼ିତ ଅଛନ୍, ଉଷୋକଷା ବି ଖାଉଛନ୍। ହେଲେ ସେ ନିହାତି ଗରିବ୍ ଆର ବାହା ଜାଂଗଲ ମାଜଲେ ଯାଇ ପେଟକେ ଦାନା ମିଲୁଥିଲା। ଏନ୍ତାଥି ତାହାକୁ ଯକ୍ଷ୍ମା ରୋଗ୍ ଅମରାଲା। ଡାକ୍ତରଖାନାରେ ଦେଖେଇ ମାହାଲିଆ ଉଷୋ ଖାଉଛନ୍। ହେଲେ ଯକ୍ଷ୍ମା ରୁଗୀ ଯେନ୍ହିସାବେ ପୁଷ୍ଟିସାର ଖାଏଦ୍ ଖାଏବାର କଥା, ସେ ଖାଏବାକେ ନାଇଁପାଏବାର। ଇଥିରଲାଗି ଦିନୁଦିନ୍କେ ଉଷୋକଷା ଖାଉଥିଲେ ବି ସୁରକୁଟେଇ ଯାଉଛନ୍।
ସୂଚନା ହିସାବେ ଲାଠୋର ତଲିପଡ଼ାର ଜୟଧର ଭୁଏ ଝନେ ନିହାତି ଗରିବ ଲୋକ୍। ତାକର ପରିବାର କହେଲେ ମାଏକିନା କ୍ଷୀର, ଦୁଇ ବଛର୍ର ପୁଓ ଶିବା ଆର ବିଧବା ବୁଢ଼ି ମା’ ଦେମତିକୁଁ ନେଇ ତାକର ସଁସାର। ତାକର ମାଲଭଟା କରି ଦୁଇ ଟୁକ୍ରି ଜମି ରହିଛେ। ହେଲେ ଜମିଟା ଚାଷବାସ୍ କରବାର କାଟଛାଟର ନୁହେ। ଯେନ୍ଥିରଲାଗି ଫିବଛର ପେଟପାଟନାର ଲାଗି ଜୟଧର କୁଟୁମବସିଆ ବାହାର ରାଏଜକେ ଦାଦନ ଖଟି ଯାଉଥିଲେ। ଚଲତି ବଛର ବି ସେ ଆନ୍ଧ୍ରପ୍ରଦେଶ ଦାଦନ ଖଟିଯାଇଥିଲେ। ସେଠାନେ ମାସକେତେ କାମ କଲାଉତାରୁ ତାକର ଦିହିପା ଖରାପ ହେଇଥିଲା। ୩ ମାସ ଆଗରୁ ଲାଗେଲେସରମାନେ ତାହାକୁ ସେଠାନୁ ଉଧାର କରି ଗଁାକେ ଆନିଥିଲେ। ସେ ପହେଲା ଖପ୍ରାଖୋଲ ପଛେ ବାଟଣାଗଡ଼, ବଲାଙ୍ଗୀର ଆର ଶେଷେ ବୁର୍ଲାରେ ଯାଇ ଦିହିପା ଦେଖାଲେ। ସେଠାନେ ଡାକ୍ତର ତାହାକୁ ଯକ୍ଷ୍ମା ରୋଗ୍ ହେଇଥିବାର କହିଥିଲେ। ଜୟଧର ବୁର୍ଲାରେ ଦିନାକେତେ ଚିକିସତ୍ିତ ହେଲା ଉତାରୁ ଟଁକା ପଏସା ଅଭାବୁ ଘରକେ ପଲେଇ ଆସିଥିଲେ। ସୁଆସ୍ତିଅ ବିଭାଗ ତରଫୁ ତାହାକୁ ମାହାଲିଆ ଉଷୋ ଯୁଗେଇ ଦିଆଯାଉଛେ। ମଝିରେ ମଝିରେ ବିଭାଗ ତରଫୁ କରମଚାରୀମାନେ ଯାଇ କେନ୍ଥେଇ ଦିହିପାର ଯତନ୍ ନେବେ ପରାମଶ ଦେଉଛନ୍। ହେଲେ ଖାଲି ମାହାଲିଆ ଉଷୋ ଆର ପରାମଶରେ ଝନେ ରୁଗୀ ଭଲ ନାଇଁ ହେଇଯାଏ। ରୁଗୀକେ ଉଷୋକଷାର ସଂଗେ ପୁଷ୍ଟିକର ଖାଏଦ ନିହାତି ଦରକାର। ହେଲେ ଜୟଧର ନିହାତି ଗରିବ୍, ଏହେଦେ ସେ ପଡ଼ି ରହେଲାବେଲେ ବୁଢ଼ି ମା’ ଆର ମାଏକିନା ପରହର କାମ୍ବୁତା କରି ଯାହା ରୁଜଗାର କରୁଛନ୍ ସେଥ୍ରେ ପରିବାରର ଚୁଲି ଜଲୁଛେ। ଏନ୍ତାଥି ଜୟଧରକେ ସେମାନେ ଯେତ୍କିକର ପୁଷ୍ଟିକର ଖାଏଦ୍ ଦେଇପାରୁଥିବେ ଇଥ୍ରୁ ବୁଝାପଡ଼ୁଛେ। ଇଆଡ଼େ ଜୟଧର ଉଷୋକଷା ଖାଏଲେ ବି ଖାଏଦ୍ ଅଭାବୁ ଦିନୁଦିନ୍କେ ଶୁଖିଟାଟି ଯାଉଛନ୍। ଇ ବାବ୍ଦେ ଲାଠୋର ସ୍ବାସ୍ଥ୍ୟ କେନ୍ଦ୍ର ଅଧ୍କାରୀ ଡା.ରାଜ୍ୟଶ୍ରୀ ସାହୁକୁଁ ପଚରାଲାରୁ ଇ ବାବ୍ଦେ ଉପରି ଅଧ୍କାରୀକଁର ସଂଗେ ଆଲୋଚନା କରି ଯେନ୍ଟା ହେବା ସୁବିଧା କରାଯିବା ବଲି ସେ କହିଥିଲେ।