ସମ୍ବଲପୁର, ୧୩।୪ (ବ୍ୟୁରୋ)- କରୋନା ଭୂତାଣୁ ସମଗ୍ର ବିଶ୍ୱକୁ ଗ୍ରାସିଛି । ପ୍ରତିଷେଧକ ଭାବେ ଦେଶରେ ଲକ୍ ଡାଉନ ଚାଲିଛି । ସମସ୍ତ ଧାର୍ମିକ ପୀଠରେ ମଧ୍ୟ ତାଲା ଝୁଲୁଛି । ଏଣୁ ସମ୍ବଲପୁରର ପ୍ରସିଦ୍ଧ ହନୁମାନ ଜୟନ୍ତୀ ଶୋଭାଯାତ୍ରା କରୋନା କଟକଣା ଯୋଗୁ କେବଳ ପୂଜାର୍ଚ୍ଚନାରେ ହିଁ ସୀମିତ ରହିଛି। ସୋମବାର ସହରର ହନୁମାନ ମନ୍ଦିର ଗୁଡିକରେ ପଣା ସଂକ୍ରାନ୍ତି ଓ ହନୁମାନଙ୍କ ପୂଜାର୍ଚ୍ଚନା ନିଡାମ୍ବରରେ କରାଯାଇଛି। ବ୍ରୁକ୍ସହିଲ୍ ସ୍ଥିତ ପ୍ରସିଦ୍ଧ ହନୁମାନ ମନ୍ଦିରରେ ସକାଳେ ପରମ୍ପରା ଓ ରୀତିନୀତି ସହ ମୁଖ୍ୟ ପୂଜକ ହରିଶ୍ଚନ୍ଦ୍ର ମିଶ୍ର ପୂଜାର୍ଚ୍ଚନା କରିଥିଲେ । ଏହାପରେ ପଣ୍ଡିତ ବ୍ୟାସଦେବ ପଣ୍ଡା ହୋମଯଜ୍ଞ କରିଥିଲେ। ଅବଶ୍ୟ ଭକ୍ତମାନେ ମନ୍ଦିର ମୁଖ୍ୟ ଫାଟକରେ ଦୀପ ଜାଲୁଥିବା ଦେଖିବାକୁ ମିଳିଛି। ତେବେ ନେଇ ହନୁମାନ ଜୟନ୍ତୀ ସମନ୍ବୟ ସମିତି ସାଧାରଣ ସମ୍ପାଦକ ସୁଧୀର ରଞ୍ଜନ ବହିଦାର କହିଛନ୍ତି ଯେ, ସହରରେ ଥିବା ୩୫ଟି ହନୁମାନ ଜୟନ୍ତୀ କମିଟି ସିମିତିର କର୍ମକର୍ତ୍ତା ସନ୍ଧ୍ୟା ୫ଟା ୫୫ରେ ପୂଜାର୍ଚ୍ଚନା କରି ଦୀପ ପ୍ରଜ୍ୱଳନ କରିବେ । ବିଶ୍ୱ କିପରି ଏହି ମହମାରିରୁ ମୁକ୍ତି ମିଳିବ ସେ ନେଇ ହନୁମାନ ଚାଳିଶା ପାଠ ସହ ସେମାନେ ଦୀପ ଦାନ କରିବେ। ଜିଲା ପ୍ରଶାସନର ନିୟମ ପାଳନ କରାଯିବ । କେବଳ ୬ଟି କମିଟିର ସଭ୍ୟ ସଚେତନତା ସହ ଦୂରତ୍ୱ ପାଳନ କରି ପ୍ରସାଦବଣ୍ଟନ କରିବେ ବୋଲି ସୁଧୀର କହିଛନ୍ତି ।
