କେନ୍ଦୁଝର, ୨୧ା୮- ଅବହେଳିତ ପୂଜା ସ୍ଥଳୀଗୁଡିକର ପୁନରୁଦ୍ଧାର କରିବା ସହ ପୁରାତନ ସଂସ୍କୃତିର ସୁରକ୍ଷା ପାଇଁ ସରକାର ବହୁ ଅର୍ଥ ଖର୍ଚ୍ଚ କରୁଛନ୍ତି। ହେଲେ ବିକାଶ ହୋଇପାରୁନାହିଁ। ପ୍ରତ୍ୟେକ ଜିଲାରେ ସ୍ବତନ୍ତ୍ର ଉନ୍ନୟନ କାଉନସିଲ ଗଠନ କରାଯାଇ ଏହି ସବୁ ପୂଜାସ୍ଥଳୀ ଗୁଡିକର ସୁରକ୍ଷା କରିବା ସହ ବିକାଶ କରିବା ପାଇଁ ପଦକ୍ଷେପ ନିଆଯାଇଛି। କେନ୍ଦୁଝର ଜିଲାରେ ସମୁଦାୟ ୪୨୭ ପୂଜାସ୍ଥଳୀ ଚିହ୍ନଟ କରାଯାଇ ସେସବୁର ବିକାଶ କରାଯାଉଛି। ତେବେ ଏବେ ମଧ୍ୟ ବହୁ ପୂଜାସ୍ଥଳୀ ଏପରି ଅଛି ଯାହାର ଚିହ୍ନଟ ହୋଇ ପାରିନାହିଁ କିମ୍ବା ବିକାଶ ହୋଇ ପାରୁ ନାହିଁ। ଏମିତି କେତେକ ମନ୍ଦିର ଅଛି ଯାହାକୁ ନେଇ ଲୋକଙ୍କ ପ୍ରଗାଢ଼ ବିଶ୍ୱାସ ମଧ୍ୟ ରହିଛି। କୌଣସି ସୁବିଧା ନ ଥିବାରୁ ଲୋକେ ସେଠାକୁ ଯାଇ ହଇରାଣ ହରକତ ହେଉଛନ୍ତି। ଏନେଇ ସାଧାରଣରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ହରିଚନ୍ଦନପୁର ବ୍ଲକର ତଅଁଳାହୋତା ଓ ଖୁଦପଶି ଗ୍ରାମରେ ଥିବା ମା ରଙ୍ଗାପାଟ ଶାଳ ସମେତ ଜିଲାର ଅନେକ ପୂଜାସ୍ଥଳୀର ବିକାଶ ହୋଇପାରିନାହିଁ। ଲୋକ ଦେଖାଣିଆ ଭାବେ କେତେକ ପୂଜା ସ୍ଥଳୀର ବିକାଶ କରାଯାଇ ଏଭଳି ଅନେକ ପୂଜାସ୍ଥଳୀକୁ ଅଣଦେଖା କରାଯାଇଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି।
ହୁଣ୍ଡା ପଞ୍ଚାୟତ ଅଧୀନ ତଅଁଳାହୋତାଠାରେ ଥିବା ପୂଜାସ୍ଥଳୀରେ ବହୁ କାଳରୁ ସ୍ଥାନୀୟ ଲୋକ ମାନଙ୍କ ଆସ୍ଥାବିଶ୍ୱାସର ଦେବୀ ରଙ୍ଗାପାଟ ପୂଜାପାଇ ଆସୁଛନ୍ତି। ଅଶ୍ୱତଥ ବୃକ୍ଷ ମୂଳରେ ଦେବୀ ପୂଜାପାଇ ଆସୁଥିବା ବେଳେ ଆମ୍ବ, କୁସୁମ,ସାହାଡା,ବେଲ ଆଦି ଗଛ ଘେରି ରହିଛି ା ଏହି ଦେବୀଙ୍କ ଉପରେ ଲୋକଙ୍କ ଅଗାଢ ବିଶ୍ୱାସ ରହିଛି ା ଏଠାରେ ମାନସିକ କଲେ ମନସ୍କାମନା ପୂର୍ଣ୍ଣ ହୋଇଥାଏ ବୋଲି ଲୋକମତ ରହିଛି। ଏହି ପୂଜାସ୍ଥଳୀରେ ଲୋକେ ୭ ଦିନ ବା ୨୧ ଦିନ ମାନସିକ କରି ଅଧିଆ ପଡିରହିଥାନ୍ତି ବୋଲି ସ୍ଥାନୀୟ ନିବାସୀ ପ୍ରକାଶ ନାୟକ କହିଛନ୍ତି। କିନ୍ତୁ ଏହି ପୂଜାସ୍ଥଳୀରେ ପାଚେରୀ ନାହିଁ କିମ୍ବା ପାଣି ବ୍ୟବସ୍ଥା ନାହିଁ ା ପାଖରେ ଘର ନ ଥିବାରୁ ଭକ୍ତ ମାନେ ବହୁ ଅସୁବିଧା ଭୋଗନ୍ତି। ତେନ୍ତଳାପଶି ପଞ୍ଚାୟତର ଖୁଦପଶି ଗ୍ରାମରେ ରହିଥିବା ମା’ ରଙ୍ଗପାଟ ଠାକୁରାଣୀ ସ୍ଥାନରେ ମଧ୍ୟ ପାଚେରି ଓ ଅନ୍ୟାନ୍ୟ ବ୍ୟବସ୍ଥା ନ ଥିବାରୁ ଅବହେଳିତ ହୋଇ ରହିଛି ା
ସବୁଆଡେ ଜଙ୍ଗଲ ପଦା ହେବାକୁ ବସିଥିବା ବେଳେ ଏହି ପୂଜାସ୍ଥଳୀ ଗୁଡିକରେ ଥିବା ବିଭିନ୍ନ ପ୍ରକାରର ବୃକ୍ଷଲତା ଜଙ୍ଗଲ ପରିବେଶର ସୁରକ୍ଷା କରୁଛି ା ଏସବୁ କେବଳ ଧାର୍ମିକ ଦୃଷ୍ଟି କୋଣରୁ ସମୃଦ୍ଧ ନୁହେଁ। ଏହା ଗ୍ରାମରେ ଲୋକଙ୍କ ମଧ୍ୟରେ ଏକତା ରକ୍ଷା କରିବା ସହ ଏକ ସୁସ୍ଥ ପରିବେଶ ସୃଷ୍ଟି କରିଥାଏ। ଏଣୁ ଏସବୁର ବିକାଶ ଓ ସୁରକ୍ଷା ହେବା ଜରୁରୀ ବୋଲି ପରିବେଶବିତ ଡ. ବିମ୍ବାଧର ବେହେରା କହିଛନ୍ତି। ପୂର୍ବତନ ଅଧ୍ୟକ୍ଷ ସ୍ବତନ୍ତ୍ର ଉନ୍ନୟନ କାଉନସିଲ ରାମରାୟ ମୁଣ୍ଡିଆ କହିଛନ୍ତି ଯେ ଯେଉଁ ସବୁ ପୂଜାସ୍ଥଳୀ ଚିହ୍ନଟ କରାଯାଇଥିଲା ଓ ଅର୍ଥ ଅନୁମୋଦିତ ହୋଇଥିଲା ସେସବୁର ଉନ୍ନତି କରଣ ଓ ବିକାଶ କରାଯାଇଛି ା ଯେଉଁ ସବୁ ରହିଯାଇଛି ସେସବୁ ପରବର୍ତ୍ତୀ ସମୟରେ ନୂତନ କାଉନସିଲ ନିଷ୍ପତ୍ତି କ୍ରମେ କରାଯିବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
(ନରେଶ ଚନ୍ଦ୍ର ପଟ୍ଟନାୟକ)