ବଅଁରପାଳ, ୧୧।୧୦ (ଡି.ଏନ୍.ଏ.)-କୁମାର ପୂର୍ଣ୍ଣିମା ତିଥିରୁ ଆରମ୍ଭ ହେବ ମା’ ଲକ୍ଷ୍ମୀଙ୍କ ପୂଜା। ଢେଙ୍କାନାଳ ପରି ଅନୁଗୋଳ ଜିଲା ବଅଁରପାଳ ବ୍ଲକ କୁଲାଡ଼ ଗ୍ରାମରେ ଏହି ପୂଜାର ସ୍ବତନ୍ତ୍ରତା ରହିଛି। କୁଲାଡ଼ ଗ୍ରାମବାସୀ ମା’ ଲକ୍ଷ୍ମୀଙ୍କ ପୂଜାକୁ ଗଣପର୍ବ ଭାବେ ପାଳନ କରିଥାନ୍ତି। ଏହି ସମୟରେ ଘରେ ଘରେ ଅରୁଆ ରନ୍ଧାଯିବା ସହ ୭ ଦିନ ଯାଏ ଗଁାରେ ଆମିଷ ଦ୍ରବ୍ୟ ପଶି ନ ଥାଏ। ଚଳିତବର୍ଷ ମା’ଙ୍କ ଏହି ପୂଜା ପାଇଁ ଜୋରଦାର ପ୍ରସ୍ତୁତି ଗଁାରେ ଆରମ୍ଭ ହୋଇଯାଇଛି।
୧୯୮୪ ମସିହାରେ ପ୍ରଥମେ କୁଲାଡ଼ ଛକ ସାହିରେ ଲକ୍ଷ୍ମୀ ପୂଜା ଆରମ୍ଭ ହୋଇଥିଲା। ଏବେ ଏହା ୯ଟି ମଣ୍ଡପକୁ ବୃଦ୍ଧି ପାଇଛି। ଚଳିତ ବର୍ଷ ଗ୍ରାମର ଛକ ସାହି ପୂଜା କମିଟି, ବ୍ରାହ୍ମଣୀଦେଈ ପୂଜା କମିଟି, ବିକିଫଣ୍ଡ ପୂଜା କମିଟି, ସାହାରା କ୍ଲବ, ଫ୍ରେଣ୍ଡ କ୍ଲବ, ପ୍ରିନ୍ସ କ୍ଲବ, ଆଲୁମିନିୟମ ସ୍କୁଲ ପୂଜା କମିଟି, ବଣିକ ସଂଘ ପୂଜା କମିଟି, ବାବସ୍ କ୍ଲବ ପୂଜା କମିଟି ଆଦି ୯ଟି ମଣ୍ଡପରେ ଦେବୀଙ୍କ ପୂଜା ପାଳନ କରାଯିବ। ପ୍ରତି ମଣ୍ଡପ ଓ ତୋରଣ କିପରି ଅଧିକ ଆକର୍ଷଣୀୟ କରାଯିବ ସେଥିପାଇଁ ଏବେଠାରୁ ପ୍ରସ୍ତୁତି କାର୍ଯ୍ୟ ଚାଲିଛି। ଗଁାକୁ ରଙ୍ଗବେରଙ୍ଗର ଆଲୋକମାଳାରେ ସାଜସଜ୍ଜା କରାଯାଉଛି। ମିନା ବଜାର, ଦୋଳି, ଖାଦ୍ୟ ସାମଗ୍ରୀ ଦୋକାନମାନ ପାଇଁ ସ୍ଥାନ ଚିହ୍ନଟ କରାଯାଉଛି। ଚଳିତବର୍ଷ କୁଲାଡ଼ ବିଗ୍ପଣ୍ଡ ସମସ୍ତ ଆକର୍ଷଣର କେନ୍ଦ୍ର ହେବ ବୋଲି ପୂଜା କମିଟି ଆଶା ବାନ୍ଧିଛି। କାରଣ ଏଥର ଜଳାଶୟ ଭିତରୁ ହିଁ ମା’ ପଦ୍ମାଳୟା ଭକ୍ତଙ୍କୁ ଦର୍ଶନ ଦେବେ। ପୋଖରୀ ଭିତରେ ସ୍ବତନ୍ତ୍ର ଭାବେ ପାଇପ ସାହାଯ୍ୟରେ ଏଥିପାଇଁ ନିର୍ମାଣ କରାଯାଉଛି।