କଣିହାଁ,୧୩।୮(ଡି.ଏନ.ଏ.)
କଣିହାଁ ବ୍ଲକ ସ୍ଥିତ ଏନଟିପିସି ବିଦ୍ୟୁତ୍ ପ୍ରକଳ୍ପର ଆଶପଣ୍ଡ ପାଣି ସାମାନ୍ୟ ବର୍ଷାରେ ରାସ୍ତାରେ ପ୍ରବାହିତ ହେଉଛି। ଏଥିଯୋଗୁ ପିଚୁ ରାସ୍ତା କ୍ଷୟକ୍ଷତି ହୋଇ ଖାଲଖମାରେ ପରିଣତ ହୋଇଛି। ଫଳରେ ପଥଚାରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। କଣିହାଁ-ଡେରଙ୍ଗ ରାସ୍ତାରେ ଏପରି ଦେଖିବାକୁ ମିଳିଛି। ଡ୍ରେନେଜ ଅଭାବରୁ ଏପରି ସମସ୍ୟା ସୃଷ୍ଟି ହୋଇଥିବା ଅଭିଯୋଗ ହୋଇଛି। ରାସ୍ତା ମରାମତି ନାମରେ ଏନଟିପିସି କର୍ତ୍ତୃପକ୍ଷ, ପୂର୍ତ୍ତବିଭାଗ ସଲାସୁତୁରା ଯୋଗୁ ଶ୍ରମିକଙ୍କ ନାମରେ ବିଲ୍ କରୁଥିବା ଅଭିଯୋଗ ହେଉଛି। ମାଡ଼ୁଆ ମନ୍ଦିର ରାସ୍ତାରେ ୩ ଶହ ମିଟର ଧରି ତାଳିପକା, ମାଟି ହୁଡ଼ା କାର୍ଯ୍ୟ ଡ୍ରେନ ନ ଥିବାରୁ ଧୋଇ ହେଉଛି। ପିଚୁ ରାସ୍ତାରେ ଆଶପଣ୍ଡ ଶିଖର ଜଳ ପ୍ରବାହିତ ହେଉଛି। ଏହାର ପ୍ରତିକାର କରାଯିବ ବୋଲି ବହୁ ସମୟରେ ପୂର୍ତ୍ତ ବିଭାଗ ଓ ଏନଟିପିସି କର୍ତ୍ତୃପକ୍ଷ କହୁଥିଲେ ମଧ୍ୟ ଏହା କରାଯାଉ ନ ଥିବାର କାରଣର ତଦନ୍ତ ଉଚ୍ଚ କର୍ତ୍ତୃପକ୍ଷ କରିବାକୁ ସ୍ଥାନୀୟ ସାମାଜିକ କର୍ମୀ ପୂର୍ଣ୍ଣଚନ୍ଦ୍ର ପ୍ରଧାନ, ପୀତାମ୍ବର ସାହୁ, ନରେଶ ବେହେରା ଦାବି କରିଛନ୍ତି। ଏ ନେଇ ଏନଟିପିସି ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇପାରି ନାହିଁ। ତାଳଚେର ପୂର୍ତ୍ତ ବିଭାଗ ଏସଡିଓ ଦାମୋଦର ରାଉତ କହିଛନ୍ତି, ସମସ୍ୟା ନେଇ ସମସ୍ତଙ୍କୁ ଜଣାଇଛୁ। ଖୁବଶୀଘ୍ର ଏହାର ସମାଧାନକୁ ନେଇ କଲଭଟ ଦ୍ୱାରା ଜଳ ନିଷ୍କାସନ ଓ ଗାଇଡ ଓ୍ବାଲକୁ ନେଇ ରାସ୍ତାର ଉନ୍ନତିକରଣ ହେବ।
