ମୁମ୍ବାଇ,୧୩।୮(ପି.ଟି.): ଜାତୀୟ କ୍ରିକେଟ ଏକାଡେମୀ (ଏନ୍ସିଏ) ହେଡ୍ କୋଚ୍ ରାହୁଲ ଡ୍ରାଭିଡ୍ ଭାରତୀୟ କ୍ରିକେଟ କେଣ୍ଟ୍ରୋଲ ବୋର୍ଡ (ବିସିସିଆଇ) ଦ୍ୱାରା ଆୟୋଜିତ ଓ୍ବେବିନାରରେ ଯୋଗ ଦେଇ ରାଜ୍ୟ ଆସୋସିଏଶନଗୁଡିକୁ ବହୁ ମୂଲ୍ୟ ଉପଦେଶ ଦେଇଛନ୍ତି। ପୂର୍ବତନ କ୍ରିକେଟରମାନଙ୍କ ଅଭିଜ୍ଞତାର ଫାଇଦା ଯେତେ ସମ୍ଭବ ଉଠାଇବାକୁ ସେ ପରାମର୍ଶ ଦେଇଛନ୍ତି। ଏହି ଖେଳାଳିମାନଙ୍କ ଅଭିଜ୍ଞତାକୁ ବେକାର ହେବାକୁ ଦିଅନି ବୋଲି ସେ କହିଛନ୍ତି।
ଏହି ଓ୍ବେବିନାରରେ ବିଭିନ୍ନ ରାଜ୍ୟ ୟୁନିଟ୍ଗୁଡିକର ସମ୍ପାଦକ ଓ କ୍ରିକେଟ ଅପରେଶନ ମୁଖ୍ୟମାନେ ଯୋଗ ଦେଇଥିଲେ। ଡ୍ରାଭିଡ୍ଙ୍କୁ ବାଦ୍ ଦେଲେ ବିସିସିଆ- ଏନ୍ସିଏ ହେଡ୍ ଅଫ୍ ଏଜୁକେଶନ ତଥା ପୂର୍ବତନ ଦିନିକିଆ ଓପନର ସୁଜିତ୍ ସୋମସୁନ୍ଦର ଓ ଟ୍ରେନର ଆଶିଷ କୌଶିକ୍ ମଧ୍ୟ ଏହି ଓ୍ବେବିନାରରେ ସାମିଲ ହୋଇଥିଲେ। ଆଜିର କୋଭିଡ୍-୧୯ ମହାମାରୀ ପରିସ୍ଥିତିରେ ଫିଟ୍ନେସ୍ ଡାଟା କଲେକ୍ସନ ଓ ଫିଟ୍ନେସ ଟ୍ରେନିଂର ପୁନଃଆରମ୍ଭ ନେଇ ଚର୍ଚ୍ଚା ହୋଇଥିଲା। ଅସୁବିଧା ସମୟରେ ପ୍ରଶାସକମାନେ ଯେପରି ବିଭିନ୍ନ ପରିସ୍ଥିତିର ସମ୍ନା କରି ତା’ର ସମାଧାନ କରୁଛନ୍ତି ତାହାକୁ ଡ୍ରାଭିଡ୍ ପ୍ରଶଂସା କରିଥିଲେ। ଭିତ୍ତିଭୂମି ସହିତ ଜଡିତ ରହି ପୂର୍ବତନ ଖେଳାଳିମାନେ ନିଜର ବହୁମୂଲ୍ୟ ଅଭିଜ୍ଞତା ଦ୍ୱାରା କ୍ରିକେଟର ଆହୁରି ଉନ୍ନତି କରିପାରିବେ ବୋଲି ସେ ମତ ଦେଇଛନ୍ତି। ବର୍ତ୍ତମାନ ପରିସ୍ଥିତିରେ ୨୫ କିମ୍ବା ୩୦ଜଣ ଖେଳାଳି ଏକାଠି ଟ୍ରେନିଂ କରିବା କଷ୍ଟକର। ତେଣୁ ରାଜ୍ୟ ଟ୍ରେନର ଓ ଫିଜିଓମାନେ ପର୍ଯ୍ୟାୟକ୍ରମେ ଭର୍ଚୁଆଲ ଟ୍ରେନିଂ ଉପରେ ଗୁରୁତ୍ୱ ଦେବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ସେହିପରି ଷ୍ଟ୍ରେନ୍ଥ ଟ୍ରେନିଂ ଓ ସ୍କିଲ୍ସ ଟ୍ରେନିଂ ମଧ୍ୟରେ ସନ୍ତୁଳନ ରକ୍ଷା କରିବା ଉପରେ କୌଶିକ ପ୍ରାଧାନ୍ୟ ଦେଇଥିଲେ। ସ୍କିଲ୍ସ ଟ୍ରେନିଂ କରିବା ବେଳେ ଷ୍ଟ୍ରେନ୍ଥ ଟ୍ରେନିଂ କମ୍ କରିବାକୁ ଏହାର ଠିକ୍ ଓଲ୍ଟା କରିବାକୁ ସେ ପରାମର୍ଶ ଦେଇଥିଲେ। ସେହିପରି ଟିମ୍ ଫିଜିଓମାନେ ଡାଇଭର୍ସ ଡାଟା କଲେକ୍ଶନ ଉପରେ ସେ ଗୁରୁତ୍ୱ ଦେବା ଉଚିତ ଓ ରିହାବିଲିଟେଶନ ଅବସରରେ ଏହାର ପ୍ରାସଙ୍ଗିକତା ରହିଛି ବୋଲି କୌଶିକ କହିଥିଲେ।
