ମୁମ୍ବାଇ,୧ା୯(ପି.ଟି.): ମହାରାଷ୍ଟ୍ରର ବହୁକୋଟି ଟଙ୍କାର ଘରକୁଲ୍ ହାଉସିଂ ଦୁର୍ନୀତି ମାମଲାର ବିଚାର କରି ଧୁଲେ ଜିଲାର ସେସନ୍ସ କୋର୍ଟ ପୂର୍ବତନ ମନ୍ତ୍ରୀ ସୁରେଶ ଜୈନ ଏବଂ ଏନ୍ସିପି ନେତା ଗୁଲାବ୍ରାଓ ଦେଓକରଙ୍କ ସମେତ ୪୮ ଜଣଙ୍କୁ ଦୋଷୀସାବ୍ୟସ୍ତ କରିବା ସହ ବିଭିନ୍ନ ଦଣ୍ଡାଦେଶ ଦେଇଛନ୍ତି। ସ୍ବତନ୍ତ୍ର ବିଚାରପତି ସୃଷ୍ଟି ନୀଳକଣ୍ଠ ପୂର୍ବତନ ମନ୍ତ୍ରୀ ଜୈନଙ୍କୁ ୭ ବର୍ଷ ଜେଲ୍ଦଣ୍ଡାଦେଶ ସମେତ ୧୦୦ କୋଟି ଟଙ୍କା ଅର୍ଥଦଣ୍ଡରେ ଦଣ୍ଡିତ କରାଯାଇଛି। ସେହିପରି ଦେଓକରଙ୍କୁ ୫ ବର୍ଷ ଓ ଅନ୍ୟମାନଙ୍କୁ ୩ରୁ ୭ ବର୍ଷ ମଧ୍ୟରେ ଜେଲ୍ଦଣ୍ଡାଦେଶ ହୋଇଛି। ଅନ୍ୟମାନଙ୍କ ମଧ୍ୟରେ ମ୍ୟୁନିସିପାଲିଟିର କେତେଜଣ କାଉନସିଲର ଓ ଅଫିସର ଅଛନ୍ତି। କୋର୍ଟ ରାୟ ପ୍ରକାଶ ପାଇବା ପରେ ସେଠାରେ ଉପସ୍ଥିତ ଥିବା ଅପରାଧୀମାନଙ୍କୁ ଜେଲ୍ ପଠାଇଦିଆଯାଇଛି। ୯୦ ଦଶକରେ ଶିବସେନା ନେତା ଜୈନ ରାଜ୍ୟ ଗୃହମନ୍ତ୍ରୀ ଥିବାବେଳେ ୨୯ କୋଟି ଟଙ୍କାର ହାଉସିଂ ଦୁର୍ନୀତି ହୋଇଥିଲା। ଏହି ମାମଲାରେ ତାଙ୍କୁ ୨୦୧୨ ମାର୍ଚ୍ଚରେ ଗିରଫ କରାଯାଇଥିଲା। ବର୍ଷେ ପରେ ସେ ସୁପ୍ରିମକୋର୍ଟରୁ ଜାମିନ ପାଇଥିଲେ। ସେହିପରି ଏନ୍ସିପି ନେତା ଦେଓକରଙ୍କୁ ୨୦୧୨ ମେ’ରେ ଗିରଫ କରାଯାଇଥିଲା ଓ ସେ ୩ ବର୍ଷ ଜେଲ୍ କାଟିସାରିଛନ୍ତି। ଦୁର୍ନୀତି ସମୟରେ ସେ ଜଲଗାଓଁ ମ୍ୟୁନିସିପାଲିଟିର କାଉନସିଲର ଥିଲେ। ଟେଣ୍ଡର ପ୍ରକ୍ରିୟାରେ ଅନିୟମିତତା କରି ଜଣେ ବିଲ୍ଡରଙ୍କୁ ଉକ୍ତ ହାଉସିଂ ପ୍ରୋଜେକ୍ଟ କାମ ଦିଆଯାଇଥିଲା।