ପ୍ୟାରିସ,୧୮।୬(ପିଟି)- ପୂର୍ବତନ ୟୁରୋପିଆନ ଫୁଟ୍ବଲ ଆସୋସିଏଶନ ମୁଖ୍ୟ ମାଇକେଲ ପ୍ଲାଟିନିଙ୍କୁ ଫ୍ରାନ୍ସ ପୋଲିସ ଗିରଫ କରିବା ସହ କାତାରରେ ହେବାକୁ ଯାଉଥିବା ପରବର୍ତ୍ତୀ ଫିଫା ବିଶ୍ୱକପ୍ ଆୟୋଜନ ଅଧିକାର ଦେବା ନେଇ ମଙ୍ଗଳବାର ପଚରାଉଚରା କରିଛି। ପୂର୍ବତନ ଫ୍ରାନ୍ସ ଅଧିନାୟକଙ୍କୁ ପୋଲିସ ପ୍ୟାରିସର ନାନଟେରେଠାରୁ ପଚରାଉଚରା କରି ଆସୁଛି। ଏ ନେଇ ଫ୍ରେଞ୍ଚ ତଦନ୍ତକାରୀ ଓ୍ବେବସାଇଟ୍ ତଥା ଲେ ମୋଣ୍ଡେ ଖବରକାଗଜ ପକ୍ଷରୁ ସୂଚନା ଦିଆଯାଇଛି। ପ୍ଲାଟିନି ୨୦୦୭ରେ ୟୁଫା ସଭାପତି ପଦରେ ନିର୍ବାଚିତ ହୋଇଥିଲେ। ୨୦୧୫ ପର୍ଯ୍ୟନ୍ତ ଅଧ୍ୟକ୍ଷ ପଦରେ ଥିଲେ। ଏହାପରେ ତାଙ୍କୁ ଫିଫା ଏଥିକ୍ସ କମିଟି ୬ ବର୍ଷ ପାଇଁ ବାସନ୍ଦ କରିଥିଲା। ପରେ ବାସନ୍ଦାଦେଶ ସମୟ ୪ ବର୍ଷକୁ କମାଇ ଦିଆଯାଇଥିଲା। କିନ୍ତୁ ତଦନ୍ତକାରୀ ସଂସ୍ଥା କ୍ରୀଡ଼ାରେ ଦୁର୍ନୀତି ବିରୋଧରେ ଲଢ଼େଇ କରୁଛି। ୬୩ ବର୍ଷୀୟ ପ୍ରଶାସକଙ୍କୁ ଆଣ୍ଟି କରପ୍ଶନ କାର୍ଯ୍ୟାଳୟକୁ ନିଆଯାଇଛି। ଲାଞ୍ଚ ନେଇ ୨୦୨୨ ଫିଫା ବିଶ୍ୱକପ୍ ଆୟୋଜନ ଅଧିକାର କାତାରକୁ ପ୍ରଦାନ କରିଥିବା ପ୍ଲାଟିନିଙ୍କ ବିରୋଧରେ ଅଭିଯୋଗ ହୋଇଛି।