କ.ନୂଆଗାଁ,୧୮ା୧୧(ଡି.ଏନ୍.ଏ.)-କନ୍ଧମାଳ ଜିଲା କ.ନୂଆଗାଁ ବ୍ଲକ ସାରଙ୍ଗଗଡ଼ ଥାନା ଅନ୍ତର୍ଗତ ପିପଳପଙ୍ଗା ଗ୍ରାମରେ ଶନିବାର ସନ୍ଧ୍ୟାରେ ଏକ ହତ୍ୟାକାଣ୍ଡ ଘଟିଛି। ହତ୍ୟାର ଶୀକାର ହୋଇଛନ୍ତି ଯୋଗେଶ୍ୱର ପ୍ରଧାନ। ଯୋଗେଶ୍ୱର ଓ ତାଙ୍କ ସ୍ତ୍ରୀ ମାଳତୀ ଘର ବାରଣ୍ଡାରେ ବସିଥିଲେ। ନୋଜରା ପ୍ରଧାନଙ୍କ ସହ କେତେଜଣ ବ୍ୟକ୍ତି ଆସି ତାଙ୍କ ସହ ପାଟିତୁଣ୍ଡ ସହ ମାରପିଟ କରିଥିଲେ। ସେମାନେ ଯୋଗେଶ୍ୱରଙ୍କୁ ମାରି ତଳେ ପକାଇ ବେକ ଉପରେ ଠିଆ ହୋଇଯାଇଥିଲେ। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ତାଙ୍କ ସ୍ତ୍ରୀ ମାଳତୀ ଚିତ୍କାର କରିବାରୁ ସାହିଲୋକ ରୁଣ୍ଡ ହୋଇଯାଇଥିଲେ। ପରେ ଅଭିଯୁକ୍ତମାନେ ଘଟଣାସ୍ଥଳରୁ ପଳାଇ ଯାଇଥିଲେ। ଯୋଗେଶ୍ୱରଙ୍କ ପୁଅ ସାରଙ୍ଗଗଡ଼ ଥାନାରେ ଅଭିଯୋଗ କରିଥିଲେ। ନଂ. ୭୯/୧୯ରେ ମାମଲା ରୁଜୁକରି ପୋଲିସ ମୃତଦେହ ଜବତ କରି ବାଲିଗୁଡ଼ା ସ୍ବାସ୍ଥ୍ୟକେନ୍ଦ୍ରକୁ ବ୍ୟବଚ୍ଛେଦ ପାଇଁ ପଠାଇଥିଲା। ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ପୋଲିସ ନୋଜରା ପ୍ରଧାନଙ୍କୁ ଗିରଫ କରିଥିବା ଥାନାଅଧିକାରୀ ଅନୀତା କିଡ଼ୋ କହିଛନ୍ତି। ପୂର୍ବ ଶତ୍ରୁତାରୁ ଏହି ହତ୍ୟାକାଣ୍ଡ ଘଟିଥିବା ପୋଲିସ ପ୍ରାଥମିକ ତଦନ୍ତରୁ ଜଣାପଡିଛି।