ବଦୋଦରା,୧୧।୧୨- ଭାରତୀୟ ଦଳ ପାଇଁ ଟେଷ୍ଟ ଖେଳିସାରିଥିବା ପୃଥ୍ବୀ ଶ’ ସମ୍ପୂର୍ଣ୍ଣ ଷ୍ଟାଇଲରେ ଘରୋଇ କ୍ରିକେଟକୁ ପ୍ରତ୍ୟାବର୍ତ୍ତନ କରିଛନ୍ତି। ଏଠାରେ ବରୋଦା ବିପକ୍ଷରେ ଚାଲିଥିବା ରଣଜୀ ମ୍ୟାଚ୍ର ଦ୍ୱିତୀୟ ଇନିଂସରେ ପୃଥ୍ବୀ ବିସ୍ଫୋରକ ଦ୍ୱିଶତକ ହାସଲ କରିଛନ୍ତି। ମାତ୍ର ୧୭୯ ବଲ ଖେଳି ସେ ୨୦୨ ରନ୍ର ଇନିଂସ ଖେଳିଛନ୍ତି। ତାଙ୍କ ଇନିଂସରେ ୧୯ ଚୌକା ଓ ୭ ଛକା ସାମିଲ ଥିଲା। ଏହା ତାଙ୍କ ପ୍ରଥମ ଶ୍ରେଣୀ କ୍ୟାରିୟରର ପ୍ରଥମ ଦ୍ୱିଶତକ। ମ୍ୟାଚ୍ର ପ୍ରଥମ ଇନିଂସରେ ମଧ୍ୟ ଡାହାଣ ହାତୀ ବ୍ୟାଟ୍ସaମ୍ୟାନ ବିସ୍ଫୋରକ ବ୍ୟାଟିଂ କରିଥିଲେ। ୬୧ବଲରେ ୧୨ ଚୌକା ଓ ଏକ ଛକା ସହାୟତାରେ ୬୬ ରନ୍ର ଇନିଂସ ଖେଳିଥିଲେ। ମ୍ୟାଚ୍ ୩ୟ ଦିନ ଚା’ ପାନ ବିରତି ସୁଦ୍ଧା ମୁମ୍ବାଇ ଦ୍ୱିତୀୟ ଇନିଂସରେ ୪ ଉଇକେଟ ହରାଇ ୪୦୯ ରନ୍ କରିଛି। ପ୍ରଥମ ଇନିଂସରେ ମୁମ୍ବାଇ ୪୩୧ ରନ୍ କରିଥିବାବେଳେ ଘରୋଇ ବରୋଦା ୩୦୭ ରନ୍ କରି ଅଲଆଉଟ୍ ହୋଇଯାଇଥିଲା। ପ୍ରଥମ ଇନିଂସରେ ୧୨୪ ରନ୍ରେ ଅଗ୍ରଣୀ ହାସଲ କରିଥିବା ମୁମ୍ବାଇ ଏବେ ୫୩୩ ରନ୍ରେ ଆଗରେ ରହିଛି। ଉଲ୍ଲେଖଥାଉ କି, ପୃଥ୍ବୀ ଡୋପ ଟେଷ୍ଟରେ ବିଫଳ ହୋଇ ବିସିସିଆଇ ଦ୍ୱାରା ୮ ମାସ ପାଇଁ ବାସନ୍ଦ ହୋଇଥିଲେ। ବାସନ୍ଦାଦେଶ ଶେଷ କରିବା ପରେ ସେ ମୁମ୍ବାଇ ପାଇଁ ସୟଦ ମୁସ୍ତାକ ଅଲି ଟୁର୍ନାମେଣ୍ଟରେ ଅନ୍ତିମ ଦୁଇ ଲିଗ୍ ମ୍ୟାଚ୍ ଖେଳିଥିଲେ।
