ଭୁବନ, ୩ା୧୨(ଡି.ଏନ.ଏ)
ପେଟ୍ରୋଲ ଟାଙ୍କି କରାଇଦେବା ନାଁରେ ଢେଙ୍କାନାଳ ଜିଲା ଭୁବନ ଏନ୍ଏସି ୩ନଂ ୱାର୍ଡର ଓମ ପ୍ରକାଶ ମିଶ୍ରଙ୍କଠାରୁ ୪୦ ଲକ୍ଷ ୪୫ ହଜାର ଟଙ୍କା ଠକେଇ ଅଭିଯୋଗରେ କ୍ରାଇମବ୍ରାଞ୍ଚ ୩ ଜଣ ଯୁବକଙ୍କୁ ବିହାରରୁ ଗିରଫ କରିଛି। ଅଭିଯୁକ୍ତମାନେ ହେଲେ ବିହାର ରାଜ୍ୟ ନାଳନ୍ଦା ଜିଲା କଟରିସରାଇ ଥାନା ଅଞ୍ଚଳ ଗଙ୍ଗପୁର ଗ୍ରାମର ଆକାଶ କୁମାର(୨୧), ବୁଦ୍ଧଗୟା ସିଜୁଆ ଥାନା ଅଞ୍ଚଳର ଶୁଭମ ପ୍ରିୟଦର୍ଶୀ(୧୯) ଓ ୱାରିସିଲିଗଞ୍ଜ ଥାନା ଚାଲୁୱାଇ ଗ୍ରାମର କୌଶଳେନ୍ଦ୍ର କୁମାର(୨୩)। ସେମାନଙ୍କ ନିକଟରୁ ୧୬ଟି ମୋବାଇଲ, ୮ ଲକ୍ଷ ୬୫ହଜାର ଟଙ୍କା, ୪୭ଟି ଏଟିଏମ୍, ଗୋଟିଏ ଲାପଟପ୍ ଜବତ କରାଯାଇଛି।
ମିଳିଥିବା ସୂଚନା ମୁତାବକ, ବର୍ଷକ ତଳେ ଗିରଫ ଅଭିଯୁକ୍ତମାନେ ପେଟ୍ରୋଲ ଟାଙ୍କି କରାଇଦେବା ନାମରେ ଓମ୍ ପ୍ରକାଶଙ୍କଠାରୁ ୪୦ ଲକ୍ଷ ୪୫ହଜାର ଟଙ୍କା ଠକି ନେଇଥିଲେ। ଓମ୍ ପ୍ରକାଶ ଟଙ୍କା ଫେରସ୍ତ ପାଇବାକୁ ଉଦ୍ୟମ କରି ନିରାଶ ହେବାପରେ କଟକ ସାଇବର କ୍ରାଇମବ୍ରାଞ୍ଚରେ ଅଭିଯୋଗ କରିଥିଲେ। ଅଭିଯୋଗ କ୍ରମେ କ୍ରାଇମବ୍ରାଞ୍ଚ କେସ୍ ନଂ. ୧/୧୯ ଏବଂ ଭୁବନ କୋର୍ଟ ଜିଆର କେସ୍ ନଂ. ୪/୨୦୧୯ରେ ମାମଲା ରୁଜୁ ହୋଇଥିଲା। କଟକ କ୍ରାଇମବ୍ରାଞ୍ଚ ଇନ୍ସପେକ୍ଟର ବିଷ୍ଣୁଚରଣ ସୁନ୍ଦରାୟ ମାମଲାର ତଦନ୍ତ କରି ଆକାଶ, ଶୁଭମ ଏବଂ କୌଶଳେନ୍ଦ୍ରଙ୍କୁ ୨୯ା୧୧ା୨୦୧୯ରେ ଗିରଫ ପରେ ପାଟନା ଜେଏମ୍ଏଫ୍ସି କୋର୍ଟରେ ହାଜର କରାଇଥିଲେ। ଏ ସମ୍ପର୍କରେ ଭୁବନ କୋର୍ଟରେ ମାମଲା ଥିବାରୁ ସୋମବାର ସେମାନଙ୍କୁ ଭୁବନ କୋର୍ଟରେ ହାଜର କରାଯାଇଥିଲା। ଜେଏମ୍ଏଫ୍ସି ଶ୍ରୀଚନ୍ଦନ ଦାସ ଜାମିନକୁ ନାମଞ୍ଜୁର କରିଥିଲେ। କ୍ରାଇମବ୍ରାଞ୍ଚ ପକ୍ଷରୁ ପୁନର୍ବାର ଅଭିଯୁକ୍ତଙ୍କୁ ରିମାଣ୍ଡରେ ନିଆଯାଇଥିଲା। ଗିରଫ ସମୟରେ ଏସ୍ଆଇ ବିି ପି ରାଉତଙ୍କ ସମେତ କ୍ରାଇମବ୍ରାଞ୍ଚ କର୍ମଚାରୀମାନେ ସହଯୋଗ କରିଥିଲେ।