ଲୋଇସିଂହା, ୧୩।୧୧(ଡି.ଏନ.ଏ.)-ବଲାଙ୍ଗୀର ଜିଲା ଲୋଇସିଂହା ବ୍ଲକ ବୁଢ଼ୀପଦର ପଁଚେତ୍ ସଦର ଗଁାର ବସନ୍ତ ବାରିକ(୩୭)। ସେ ପେଟ୍ ବେମାରିର ଚିକିଛାରେ ଲକ୍ଷାଧିକ୍ ଟଁକା ଖରଚ୍ କରି ସରବ୍ସୁଅଁାତ ହେଇଛନ୍। ହେଲେ ଦିହିପା ଠିକ୍ ନାଇଁ ରହିବାର ଲାଗି କୁଲିମଜୁରି ବି କରିଯାଇ ନାଇଁପାରବାର। ଏନ୍ତାଥି ୪ ପରାନୀ କୁଟୁମ ପୁଷ୍ବାର ତାକର ଲାଗି ଭିଡ଼ ହେଇଯାଉଛେ। ବସନ୍ତକୁଁ ଜିଲା ରେଡକ୍ରସ ଆର ମୁଖ୍ୟମନ୍ତ୍ରୀ ରିଲିଫ ପଁାଠିରୁ ସାହାଯ୍ ଯୁଗେଇ ଦେବାକେ ଦାବି ହେଉଛେ।
ସୂଚନା ହିସାବେ ବୁଢ଼ୀପଦର ହରିଜନ ପଡ଼ାର କଳାବତୀ ବାରିକ ଆର ସ୍ବର୍ଗତ ଚମରା ବାରିକକଁର ପୁଓ ବସନ୍ତ। ୩ ଭାଇର ଭିତରେ ସେ ମଝିଅଁା। ମାଏକିନା ବାସନ୍ତୀ, ପୁଓ ସାହିଲ(୫) ଆର ଦୁଇ ଝି’ ସନ୍ଧ୍ୟା(୧୧), ସୌମ୍ୟା(୧)କୁଁ ନେଇ ତାକର ସଁସାର। ମାଟ୍ରିକ ପାସ କରିଥିବାର ବସନ୍ତ କୁଲିମଜୁରି କରି କୁଟୁମ ପୁଷୁଥିଲେ। ହେଲେ ବାରବାର ତାକର ପେଟ୍ ବଥାବାର ସଂଗେ ଅସୁସ୍ତିଆ ହେଇ ଚାଲବୁଲ ନାଇଁ କରିପାରୁଥାଇ। ପରୀକ୍ଷା ନିରୀକ୍ଷା ଉତାରୁ ଜନାପଡ଼ଲା ଯେ, ତାକର ପାନ୍କ୍ରିଜରେ ପାଏନ୍ ଜମୁଥିଲା। ୨୦୧୫ରେ ଦେଢ଼ ଲାଖ୍ ଟଁକା ଖରଚ୍ କରି ରାଞ୍ଚତ୍ଥି ଅପରେଶନ କରିଥିଲେ। ହେଲେ ଅପରେଶନ ସଫଲ ନାଇଁ ହେଲା। ୪ ବଛର ଉତାରୁ ଫେନ୍ ସେ ସମାନ ଦଶା ଭୁଗ୍ବାକେ ପଡ଼ଲା। ଏନ୍ତାଥି ସେ ଆନ୍ଧ୍ର ପ୍ରଦେଶର ଭେଲୋର ସିଏମ୍ସି ଡାକ୍ତରଖାନାରେ ଫେନ୍ ଘାଏ ଅପରେଶନ କରେଇଥିଲେ। ବସନ୍ତ ସେଠାନେ ଦୁଇମାସ ତକ୍ ଚିକିଛା କରାଲେ। ହେଲେ ଏହେଦେ ଫେନ୍ ଘାଏ ତାକର ଦିହିପା ବିଗ୍ଡ଼ି ଯାଇଛେ। ଇଆଡ଼େ ଚିକିଛାରେ ଲକ୍ଷାଧିକ୍ ଟଁକା ଖରଚ୍ କରି ସରବ୍ସୁଅଁାତ ହେଇଥିବାର ବସନ୍ତ କେନ୍ଥେଇ ୪ ପରାନୀ କୁଟୁମ ପୁଷ୍ବାର ସଂଗେ ଚିକିଛା କରାବେ ସେ ଚିନ୍ତାରେ ଘାରି ହେଉଛନ୍। ଜିଲା ସୁଆସ୍ତିଅ ବିଭାଗ ଆର ଜିଲାପାଳ ଇ ଦିଗେ ଦୁରୁଷ୍ଟି ଦେଲେ ମୁଇଁ ଆର ମୋର ପରିବାର ଇ ବିପତିରୁ ମୁକ୍ଲି ପାରତୁଁ ବଲି ବସନ୍ତ କହିଛନ୍।