ଜୟପୁର,୨୧।୭: ପରିବେଶ ସୁରକ୍ଷା ପ୍ରତି ଜଣେ ଶିକ୍ଷକ ଗତ ୯ ବର୍ଷ ଧରି ପ୍ରତିଦିନ ଗୋଟିଏ ଗଛ ଲଗାଇବା ଜାରି ରଖିଛନ୍ତି। ୨୦୧୦ ଜୁଲାଇ ୧ରୁ ସେ ଏପରି ମହତ୍ କାର୍ଯ୍ୟ ଆରମ୍ଭ କରିଥିଲେ। ରାଜସ୍ଥାନ ଅଜମେର ରୋଡ୍ ସ୍ଥିତ ଗଜସିଂହପୁରାରେ ବାସ କରୁଥିବା ଶିକ୍ଷକ ସୁରେନ୍ଦ୍ର ଅଓ୍ବାନା ଏଭଳି କାର୍ଯ୍ୟ ଜାରି ରଖିଛନ୍ତି। ସେ ଇତିମଧ୍ୟରେ ଏଠାକାର ୨୫ଟି କଲୋନୀରେ ୧୦ ହଜାର ପାଖାପାଖି ଗଛ ଲଗାଇଲେଣି। ପ୍ରତି ଦିନ ସକାଳୁ ଉଠି ନିତ୍ୟକର୍ମ ସାରି ସୁରେନ୍ଦ୍ର ପ୍ରଥମେ ଗଛଟିଏ ଲଗାଇଥାନ୍ତି। ଏହାପରେ ଦିନର ଅନ୍ୟ କାମ କରନ୍ତି। ସୁରେନ୍ଦ୍ରଙ୍କ କାର୍ଯ୍ୟ ଏବେ ସୋସିଆଲ୍ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି।