ମୁମ୍ବାଇ,୨୩-୯: ଇତିହାସର ଛାତ୍ର ଥିବା ଶକ୍ତିକାନ୍ତ ଦାସ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ)ର ୨୫ତମ ଗଭର୍ନର ହେବା ପରେ ତାଙ୍କୁ ଅନେକ ଥଟ୍ଟା ପରିହାସର ସମ୍ମୁଖୀନ ହେବାକୁ ପଡ଼ୁଛି। ଏଠାରେ ଆୟୋଜିତ ଏକ ମିଡିଆ କାର୍ଯ୍ୟକ୍ରମରେ ଯୋଗ ଦେବା ଅବସରରେ ତାଙ୍କୁ ଦର୍ଶକ ମଣ୍ଡଳୀରୁ ଜଣେ ପ୍ରଶ୍ନ ପଚାରିଥିଲେ। ଶକ୍ତିକାନ୍ତ ଇତିହାସର ଛାତ୍ର ହେବା କାରଣରୁ ତାଙ୍କୁ ଆର୍ବିଆଇ ଗଭର୍ନର ଭଳି ଏକ ଶୀର୍ଷ ପଦବୀରେ କାର୍ଯ୍ୟ କରିବାରେ ଅସୁବିଧା ହେଉଛି କି ବୋଲି ସେ ପ୍ରଶ୍ନ ପଚାରିଛନ୍ତି। ତେବେ ଶକ୍ତିକାନ୍ତ ଏହାର ଉତ୍ତର ଦେଇ କହିଛନ୍ତି ଯେ, କେନ୍ଦ୍ରୀୟ ବ୍ୟାଙ୍କର ମୁଖ୍ୟଙ୍କ ଶିକ୍ଷାଗତ ଯୋଗ୍ୟତା ପ୍ରାସଙ୍ଗିକ ନୁହେଁ। କିନ୍ତୁ ତାଙ୍କର ଅର୍ଥନୀତି ଉପରେ ଗଭୀର ଜ୍ଞାନ ରହିବା ଜରୁରୀ। ଅର୍ଥନୀତିରେ ଦେଖାଦେଉଥିବା ସମସ୍ୟା ଉପରେ ତାଙ୍କର ସାଧାରଣ ଭାବେ ସଚେତନତା ରହିବା ଆବଶ୍ୟକ। ସବୁଠୁ ବଡ଼ କଥା ହେଲା ବ୍ୟକ୍ତିଙ୍କ ନିକଟରେ ପେସାଦାରୀ ଅଭିଜ୍ଞତା ରହିଥିବା ଜରୁରୀ। ଏହାହିଁ କାର୍ଯ୍ୟରେ ଲାଗିଥାଏ ବୋଲି ଶକ୍ତିକାନ୍ତ କହିଛନ୍ତି। ଦର୍ଶକଙ୍କ ପ୍ରଶ୍ନ ତାଙ୍କୁ ଅଡୁଆରେ ପକାଇ ଥିଲେ ମଧ୍ୟ ଶକ୍ତିକାନ୍ତ ଅତ୍ୟନ୍ତ ସହଜ ଭାବେ ଏହାର ଉତ୍ତର ଦେଇଥିଲେ। ସୂଚନାଥାଉ କି, କେନ୍ଦ୍ର ସରକାରରେ ଅର୍ଥ ମନ୍ତ୍ରଣାଳୟର ବିଭିନ୍ନ ଶୀର୍ଷ ପଦବୀରେ ରହିବା ପରେ ଅବସର ନେବାକୁ ଯାଉଥିବା ଶକ୍ତିକାନ୍ତଙ୍କୁ ହଠାତ ୨୦୧୮ ଡିସେମ୍ବର ୧୦ରେ ଆର୍ବିଆଇର ଗଭର୍ନର ଭାବେ ନିଯୁକ୍ତ କରାଯାଇଥିଲା। ଉର୍ଜିତ ପଟେଲଙ୍କ ଅଚାନକ ଇସ୍ତଫା ପରେ ତାଙ୍କୁ ଉକ୍ତ ଦାୟିତ୍ୱ ମିଳିଥିଲା। ଶକ୍ତିକାନ୍ତଙ୍କ ପୂର୍ବସୂରୀ ପଟେଲ ଓ ରଘୁରାମ ରାଜନଙ୍କର ଅର୍ଥନୀତିଜ୍ଞ ଭାବେ ଉଲ୍ଲେଖନୀୟ କ୍ୟାରିୟର ରହିଛି। ରାଜନ ଅନ୍ତର୍ଜାତୀୟ ସ୍ତରରେ ଜଣେ ଖ୍ୟାତିସମ୍ପନ୍ନ ଅର୍ଥନୀତିଜ୍ଞ,ଲେଖକ ଏବଂ ସାମାଜିକ-ରାଜନୈତିକ ଚିନ୍ତକ ହୋଇଥିବା ବେଳେ ପଟେଲ ମୁଦ୍ରାନୀତି ବିଶେଷଜ୍ଞ ଭାବେ ବେଶ୍ ଜଣାଶୁଣା। ଶକ୍ତିକାନ୍ତ ଉଦାହରଣ ଛଳରେ କହିଛନ୍ତି ଯେ, ଆମେରିକା ଫେଡେରାଲ ରିଜର୍ଭ ମୁଖ୍ୟ ଜେରମ ପାଓ୍ବେଲ ରାଜନୀତି ବିଜ୍ଞାନର ଛାତ୍ର ହୋଇଥିବା ବେଳେ ୟୁରୋପିୟାନ ସେଣ୍ଟ୍ରାଲ ବ୍ୟାଙ୍କର ମୁଖ୍ୟ ତଥା ପୂର୍ବତନ ଆଇଏମ୍ଏଫ୍ ପ୍ରେସିଡେଣ୍ଟ କ୍ରିଷ୍ଟିନ ଲାଗାର୍ଡ ଜଣେ ଆଇନ ଛାତ୍ରୀ। ସେହିପରି ବ୍ୟାଙ୍କ ଅଫ୍ ଜାପାନର ମୁଖ୍ୟ ହାରୁହିକୋ କୁରୋଡା ସିଭିଲ ସର୍ଭିସ ବ୍ୟାକ୍ଗ୍ରାଉଣ୍ଡରୁ ଆସିଛନ୍ତି ବୋଲି ଶକ୍ତିକାନ୍ତ କହିଛନ୍ତି।