ହାଇଦ୍ରାବାଦ୍, ୨୩।୭: ତେଲେଙ୍ଗାନା ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓ(କେସିଆର୍) ନିଜ ପୈତୃକ ଗ୍ରାମ ଚିନ୍ତାମଡାକାର ରହୁଥିବା ୨ ହଜାର ପରିବାରକୁ ୧୦-୧୦ ଲକ୍ଷ ଟଙ୍କା ଲେଖାଏଁ ପୁରୁସ୍କାର ଦିଆଯିବ ବୋଲି ଘୋଷଣା କରିଛନ୍ତି। ଏହି ଟଙ୍କାରେ ଯାହା ଇଚ୍ଛା ଗ୍ରାମବାସୀ ତାହା କିଣିପାରିବେ ବୋଲି କେସିଆର୍ କହିଛନ୍ତି। ଚିନ୍ତାମଡାକାରରେ ଆୟୋଜିତ ଏକ କାର୍ଯ୍ୟକ୍ରମରେ ଭାଗ ନେଇ ମୁଖ୍ୟମନ୍ତ୍ରୀ କହିଛନ୍ତି, ମୁଁ ଏହି ଗାଁରେ ଜନ୍ମ ନେଇଛି। ଗାଁରେ ବାସ କରୁଥିବା ୨ ହଜାର ପରିବାରକୁ ଲାଭାନ୍ବିତ କରିବା ମୋର ଲକ୍ଷ୍ୟ। ଖୁବଶିଘ୍ର ଏହି ରାଶିକୁ ମଞ୍ଜୁରୀ ଦିଆଯିବ ବୋଲି କେସିଆର କହିଛନ୍ତି। ସୂଚନାଯୋଗ୍ୟ, କେସିଆରଙ୍କ ପକ୍ଷରୁ କରାଯାଇଥିବା ଏହି ଘୋଷଣା ଦ୍ୱାରା ରାଜ୍ୟ ରାଜଷ୍ବରୁ ଅତିରିକ୍ତ ୨ ହଜାର କୋଟି ଟଙ୍କା ବୋଝ ପଡିବ ବୋଲି ଜଣାପଡିଛି।