![](https://www.dharitri.com/wp-content/uploads/2019/09/images-14.jpg)
ଦିଗପହଣ୍ଡି,୧୫ା୯(ଡି.ଏନ.ଏ.)-ଦିଗପହଣ୍ଡି ବ୍ଲକ କଇଠଡ଼ା ପଞ୍ଚାୟତ ଗୁହାଳପୁର ଗ୍ରାମ ସୋଲ ପୋଖରୀ କାମ ଚାଲିଥିବା ବେଳେ ଏପ୍ରିଲ ୧ ତାରିଖ ସନ୍ଧ୍ୟାରେ ଅଖାରେ ଭର୍ତ୍ତି ଏକ ନରକଙ୍କାଳ ମିଳିଥିଲା। ପ୍ରାୟ ଦେଢ଼ବର୍ଷ ପୂର୍ବେ ଗାଁରୁ ନିଖୋଜ ହୋଇଯାଇଥିବା ଯୁବକ କାଳୁ ପ୍ରଧାନଙ୍କ ସ୍ତ୍ରୀ ସୁଲଭ ଏ ନେଇ ଥାନାରେ ଏତଲା ଦେଇଥିଲେ। ଘଟଣା ପରଦିନ ପୋଲିସ ପୋଖରୀ ନିକଟରେ ପହଞ୍ଚତ୍ ଉକ୍ତ କଙ୍କାଳ ଜବତ କରଥିଲା। ଏ ନେଇ ଅପମୃତ୍ୟୁ ମାମଲା (ନଂ.୨/୧୯) ରୁଜୁ କରାଯାଇ ଜବତ ହାଡ଼ଗୁଡ଼ିକର ଫେରେନସିକ୍ ଯାଞ୍ଚ ପାଇଁ ବ୍ରହ୍ମପୁର ବଡ଼ ମେଡିକାଲକୁ ପଠାଯାଇଥିଲା। ମେଡ଼ିକାଲ ରିପୋର୍ଟ ଆଧାରରେ ଉକ୍ତ ଅପମୃତ୍ୟୁ ମାମଲାଟି ହତ୍ୟା ମାମଲାରେ ରୂପାନ୍ତରିତ ହୋଇଛି । ପୋଲିସ ନିଜ ଆଡ଼ୁ ଏତଲା ଦେଇଛି। ଥାନା ଏସ୍ଆଇ ମଧୁସ୍ମିତା ପ୍ରଧାନଙ୍କ ଏତଲାକୁ ଭିତ୍ତିକରି ନଂ. ୧୮୨/୧୯ ଦଫା ୩୦୨/୧୦୧ ଅନୁଯାୟୀ ଆଇଆଇସି ବସନ୍ତ କୁମାର ସେଠୀ ମରମଲା ରୁଜୁ କରିଛନ୍ତି। ହତ୍ୟାକାଣ୍ଡରେ ଜଣେ ମହିଳାଙ୍କ ସମେତ ଏକାଧିକ ବ୍ୟକ୍ତି ପୋଲିସ ସ୍କାନରରେ ଅଛନ୍ତି। କାଳୁଙ୍କୁ ଯୋଜନାବଦ୍ଧ ଭାବେ ହତ୍ୟା କରି ମୃତଦେହକୁ ଏକ ଆଖରେ ପୁରାଇ ସେଥିରେ ପଥରଖଣ୍ଡ ବାନ୍ଧି ଘର ନିକଟ ସୋଲ ପୋଖରୀରେ ଫିଙ୍ଗି ଦିଆଯାଇଥିବା ପୋଲିସ ପ୍ରାଥମିକ ତଦନ୍ତରୁ ଜଣାପଡିଛି।
କାଳୁ ଗତ ପ୍ରାୟ ୩ ବର୍ଷ ପୂର୍ବେ ନଡ଼ିଆ ତୋଳିବା ବେଳେ ଅସାବଧାନତାରୁ ଗଛରୁ ଖସି ପଡ଼ି ଗୁରୁତର ହୋଇଥିଲେ। ତାଙ୍କ ଗୋଡ଼ ଭାଙ୍ଗି ଯାଇଥିବାରୁ ଅପରେଶନ କରାଯାଇ ଷ୍ଟିଲ ରଡ ଲାଗିଥିଲା। ପୋଖରୀରୁ ଉଦ୍ଧାର କଙ୍କାଳରେ ଷ୍ଟିଲ ରଡ଼ ଥିବା ଓ ଅଖାରୁ ମିଳିଥିବା ସାର୍ଟଟି କାଳୁଙ୍କର ବୋଲି ତାଙ୍କ ବାପା କାଶୀ ପ୍ରଧାନ ଚିହ୍ନଟ କରିଥିଲେ। ପଚରାଉଚରା ପରେ ପରକୀୟା ପ୍ରୀତିରୁ କାଳୁଙ୍କୁ ହତ୍ୟା କରାଯାଇଥିବା କେତେଜଣ ଗ୍ରାମବାସୀ କହିଛନ୍ତି। ଜବତ ହାଡ଼ ଓ ଖପୁରୀର ଫୋରେନସିକ୍ ଯାଞ୍ଚ ପରେ କାଳୁଙ୍କ ବୟସ ଓ ଉଚ୍ଚତା ପ୍ରାୟତଃ ସାମଞ୍ଜସ୍ୟ ରହୁଥିବା ବେଳେ ଭୁବନେଶ୍ୱରସ୍ଥିତ ରାଜ୍ୟ ଫୋରେନସିକ୍ ଲାବ୍ରୋଟେରୀର ଡିଏନଏ ପରୀକ୍ଷା ରିପୋର୍ଟକୁ ଅପେକ୍ଷା କରାଯାଇଛି। ହତ୍ୟକାଣ୍ଡର ସମସ୍ତ ତଥ୍ୟ ପ୍ରମାଣ ମିଳିବା ପରେ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଆଇଆଇସି କହିଛନ୍ତି। ବୁଧବାର ପୋଲିସ କାଳୁଙ୍କ ବାପା, ସ୍ତ୍ରୀ ଓ ପୁଅଙ୍କୁ ଥାନାକୁ ଡ଼କାଇ ପୃଥକ୍ ଭାବେ ପଚରାଉଚରା କରିଥିବା ବେଳେ ଗ୍ରାମର କେତେଜଣଙ୍କ ବୟାନ ମଧ୍ୟ ରେକର୍ଡ କରିଥିବା ସୂଚନା ମିଳିଛି ।