ଗଞ୍ଜାମ,୧୮ା୩(ଡି.ଏନ.ଏ.) – ଗଞ୍ଜାମ ଜିଲା ରମ୍ଭା ଥାନା ହୁମ୍ମା ଫାଣ୍ଡି ପୋଲିସ କଳାଯମୁନା ଗ୍ରାମ ନିକଟସ୍ଥ କୁକୁଡ଼ାଫାର୍ମ ସମ୍ମୁଖ ଏକ ପୋଖରୀରୁ ମଙ୍ଗଳବାର ଜଣେ ଛାତ୍ରଙ୍କ ମୃତଦେହ ଉଦ୍ଧାର କରିଛି। ସେ ହେଲେ କଳାଯମୁନାସ୍ଥିତ ସାଇ ସରସ୍ବତୀ ବିଦ୍ୟା ମନ୍ଦିରର ନବମ ଶ୍ରେଣୀ ଛାତ୍ର ଶକ୍ତିପ୍ରସାଦ ତ୍ରିପାଠୀ (୧୪)। ବିଦ୍ୟାଳୟ ହଷ୍ଟେଲରେ ରହି ସେ ପାଠ ପଢୁଥିଲେ। ମୃତ ଛାତ୍ରଙ୍କ ଅଜା ସନ୍ତୋଷପୁରର ନିରଞ୍ଜନ ତ୍ରିପାଠୀ ଓ ମାମୁ ହରେକୃଷ୍ଣ ଶକ୍ତିପ୍ରସାଦଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି।
ପ୍ରକାଶ ଯେ, ସ୍କୁଲଠାରୁ କିଛି ଦୂର ଏକ ପୋଖରୀରେ ଅପରାହ୍ନ ପ୍ରାୟ ୧ଟାରେ ମୃତଦେହ ପଡ଼ିଥିବା ସ୍ଥାନୀୟ ଅଞ୍ଚଳର ଛେଳି ଚରାଳିମାନେ ଦେଖି ରମ୍ଭା ଥାନାକୁ ଖବର ଦେଇଥିଲେ। ଥାନା ଅଧିକାରୀ କୃଷ୍ଣଚନ୍ଦ୍ର ସେଠୀ ପହଞ୍ଚତ୍ ଅଗ୍ନିଶମ ବାହିନୀ ସହାୟତାରେ ପୋଖରୀରୁ ମୃତହେଦ ବାହାର କରିଥିଲେ। ପରେ ସେ ନିକଟସ୍ଥ ସାଇ ସରସ୍ବତୀ ବିଦ୍ୟାମନ୍ଦିର ଛାତ୍ର ଶକ୍ତିପ୍ରସାଦ ବୋଲି ଜଣାପଡ଼ିଥିଲା। ପାରିପାର୍ଶ୍ୱିକ ସ୍ଥିତିରୁ ଏହାଏକ ହତ୍ୟାକାଣ୍ଡ ବୋଲି ପୋଲିସ ଅନୁମାନ କରୁଛି। ମୃତ ଛାତ୍ର ହଷ୍ଟେଲରେ ରହି ପାଠ ପଢୁଥିଲେ। ଶନିବାର ଗଣିତ ପରୀକ୍ଷା ଦେଇଥିବାବେଳେ ମଙ୍ଗଳବାର ପରବର୍ତ୍ତୀ ପରୀକ୍ଷା ଥିଲା। ମାତ୍ର ସୋମବାର କରୋନା ପାଇଁ ପ୍ରଶାସନ ପକ୍ଷରୁ ପରୀକ୍ଷା ବାତିଲ କରିଦିଆଯାଇଥିଲା। ବିଦ୍ୟାଳୟ କର୍ତ୍ତୃପକ୍ଷ ହଷ୍ଟେଲରେ ଥିବା ଛାତ୍ରମାନଙ୍କୁ ଘରକୁ ପଠାଇ ଦେଇଥିଲେ ବୋଲି ସ୍କୁଲ ନିର୍ଦ୍ଦେଶକ ସୁରେଶ ଚନ୍ଦ୍ର ଗୌଡ଼ କହିଛନ୍ତି। ମାତ୍ର ଶକ୍ତିପ୍ରସାଦ ଘରକୁ ଯାଇ ନ ଥିବା ଅଜା କହିଛନ୍ତି। ସୋମବାର ତାଙ୍କୁ ହତ୍ୟା କରାଯାଇଥିବା ଅନୁମାନ କରାଯାଉଛି। ନଂ.୪/୨୦ରେ ଏକ ଅପମୃତ୍ୟୁ ମାମଲା ରୁଜୁକରି ପୋଲିସ ତନ୍ତ ଚଳାଇଛି।
ସୂଚନାଯୋଗ୍ୟ, ଶକ୍ତିପ୍ରସାଦଙ୍କ ବାପାଙ୍କ ଦେହାନ୍ତ ପରେ ମା’ ଅନ୍ୟତ୍ର ବିବାହ କରିଥିଲେ। ୭/୮ ବର୍ଷ ହେବ ସେ ଭୁବନେଶ୍ୱରରେ ରହୁଛନ୍ତି। ଶକ୍ତିପ୍ରସାଦ ଅଜାଘର ରହି ପାଠ ପଢୁଥିଲେ।