ଧରାକୋଟ,୬ା୧୧(ଡି.ଏନ.ଏ.)-ଧରାକୋଟ ବ୍ଲକର ଜାହାଡ଼ା ଗ୍ରାମରେ ସୋମବାର ରାତିରେ ପୋଖରୀରେ ବୁଡ଼ି ଜଣେ ନିଶାସକ୍ତ ଯୁବକଙ୍କ ମୃତ୍ୟୁ ଘଟିଛି। ସେ ହେଲେ ବିଶ୍ୱନାଥ ନାୟକ (୨୭)। ଅଗ୍ନିଶମ କର୍ମଚାରୀମାନ ପହଞ୍ଚତ୍ ମୃତଦେହ ଉଦ୍ଧାର କରିବା ପରେ ଧରାକୋଟ ପୋଲିସ ବ୍ୟବଚ୍ଛେଦ ପାଇଁ ପଠାଇଥିଲା। ଏଥିରେ ଉତ୍ତେଜିତ ହୋଇ ମଦ ବିକ୍ରିକୁ ବନ୍ଦ କରିବା ପାଇଁ ମଙ୍ଗଳବାର ମହିଳାମାନେ ଗ୍ରାମରେ ଥିବା ଦେଶୀ ମଦଭାଟିକୁ ଭଙ୍ଗାରୁଜା କରିବା ସହ ପୋଡ଼ି ଦେଇଛନ୍ତି।
ପ୍ରକାଶ ଯେ, ରାତିରେ ବିଶ୍ୱନାଥ ଏକ ମଦ ଦୋକାନକୁ ଆସି ପ୍ରଚୁର ମଦ୍ୟପାନ କରି ବେହୋସ ହୋଇଯାଇଥିଲେ। ଅସାବଧାନତା କାରଣରୁ ଠାକୁରାଣୀ ମନ୍ଦିର ପୋଖରୀରେ ଖସିଯାଇ ମୃତ୍ୟୁ ଘଟିଥିଲା। ନିଶାସକ୍ତ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବାରୁ ମଧ୍ୟାହ୍ନରେ ଗୋପୀନାଥ ସାହି, ଠାକୁରାଣୀ ସାହି, ନୂଆସାହିର ମହିଳାମାନେ ସାମିଲ ହୋଇ ମଦ ବିକୁଥିବା ଯୁବକ ଓ ସ୍ଥାନୀୟ ସରପଞ୍ଚଙ୍କ ଘର ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ଏଥିସହ ଝଗଡ଼େଇ-ସିଙ୍ଗପୁର ରାସ୍ତାକୁ ଦୀର୍ଘ ସମୟ ଧରି ଅବରୋଧ କରି ରଖିଥିଲେ। ଖବର ପାଇ ଧରାକୋଟ ପୋଲିସ ଘଟଣାସ୍ଥଳରେ ପହଞ୍ଚତ୍ ଉତ୍ତ୍ୟକ୍ତ ମହିଳାଙ୍କୁ ବୁଝାଶୁଝା କରିବା ସହ ସ୍ଥିତାବସ୍ଥା ଫେରାଇ ଆଣିବା ଉଦ୍ୟମ ଜାରି ରଖିଛିି। ଏଥିସହ ଅଞ୍ଚଳରେ ଶାନ୍ତିଶୃଙ୍ଖଳା ପାଇଁ ଗ୍ରାମର ବରିଷ୍ଠ ନାଗରିକ, ମହିଳା ଓ ଯୁବକମାନଙ୍କୁ ନିବେଦନ କରିବା ସହ ଆଇନ ଶୃଙ୍ଖଳା ହାତକୁ ନ ନେବା ପାଇଁ ପୋଲିସ ପରାମର୍ଶ ଦେଇଛିି।