ଢେଙ୍କିକୋଟ,୨୫।୯(ଡି.ଏନ୍.ଏ.): କେନ୍ଦୁଝର ଜିଲା ଢେଙ୍କିକୋଟ ଫାଣ୍ଡି ଅନ୍ତର୍ଗତ ମନହରପୁର ପଞ୍ଚାୟତ କଟରାବେଡା ଚତୁରି ସାହିରେ ବୁଧବାର ପୂର୍ବାହ୍ନରେ ପୋଖରୀରେ ବୁଡି ଜଣେ ଶିଶୁକନ୍ୟାର ମୃତ୍ୟୁ ଘଟିଛି। ସେ ହେଲେ ଜିଆର୍ଏସ୍ ଯୋଗେନ୍ଦ୍ର ମହାନ୍ତିଙ୍କ ଅଢ଼େଇ ବର୍ଷର ଝିଅ ଭୂମିଶ୍ରୀ ।
ସୂଚନାଯୋଗ୍ୟ, ସକାଳେ ଯୋଗେନ୍ଦ୍ର ଗାଧୋଇବାକୁ ଯିବା ସମୟରେ ଝିଅ ଭୂମି ତାଙ୍କ ପଛରେ ଯାଇଥିଲେ। କିନ୍ତୁ ଏହା ଯୋଗେନ୍ଦ୍ର ଜାଣିପାରି ନ ଥିଲେ । ସେ ଘରେ ପହଞ୍ଚିବା ପରେ ଝିଅକୁ ନ ପାଇ ମା’ ଜୟନ୍ତୀ ପଚାରିବାରୁ ଦେଖି ନ ଥିବା କହିଥିଲେ ଯୋଗେନ୍ଦ୍ର। ଏହା ପରେ ଜୟନ୍ତୀ ପୋଖରୀ ନିକଟକୁ ଯାଇଥିଲେ। ସେଠାରେ ଝିଅ ବୁଡିଯାଇଥିବା ଜାଣିବା ପରେ ଗ୍ରାମବାସୀଙ୍କ ସହାୟତାରେ ଉଦ୍ଧାର କରାଯାଇ କେନ୍ଦୁଝର ଡାକ୍ତରଖାନା ନିଆଯାଇଥିଲା। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି। ଖବରପାଇ ଢେଙ୍କିକୋଟ ଫାଣ୍ଡି ପୋଲିସ ଡାକ୍ତରଖାନାେରେ ପହଞ୍ଚି ମୃତଦେହ ବ୍ୟବଚ୍ଛେଦ କରାଇଥିଲା। ଏନେଇ ଘଟଗାଁ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
