ସମ୍ବଲପୁର,୯ା୫(ବ୍ୟୁରୋ): ସମ୍ବଲପୁର ଜିଲା ଧମା ଥାନା ଅଞ୍ଚଳରେ ମଦ କାରବାର ଦିନକୁ ଦିନ ବଢି ଚାଲିଛି । ସମ୍ବଲପୁର ଜିଲା ପ୍ରଶାସନ ଓ ପୋଲିସ ପ୍ରଶାସନ ପାଖରେ ବାରମ୍ବାର ଅଭିଯୋଗ କଲା ପରେ ବି କୌଣସି ସୁଫଳ ମିଳିନାହିଁ। ଶନିବାର ପୂର୍ବାହ୍ନରେ ଏହି ଥାନା ଅଧୀନ ଗଏନପୁରା ଗ୍ରାମର ମହିଳା ଓ ଗ୍ରାମବାସୀ ଏକଜୁଟ ହୋଇ ବହୁ ପରିମାଣର ମଦ ପୋଚ ନଷ୍ଟ କରି ଦେଇଛନ୍ତି । ପ୍ରଥମେ ଗ୍ରାମ ନିକଟରେ ଥିବା ଏକ ନିଛାଟିଆ ସ୍ଥାନକୁ ଯାଇ ସେଠାରେ ମାଟି ଭିତରେ ଥିବା ମଦ ପୋଚ ଠାବ କରିଥିଲେ । ପରେ ଧମା ପୋଲିସକୁ ଖବର ଦେଇଥିଲେ । ପୋଲିସ କର୍ମଚାରୀ ଆସିଲା ପରେ ମାଟି ଭିତରୁ ପୋଚ ବାହାର କରାଯାଇଥିଲା । ବିଭିନ୍ନ ସ୍ଥାନରେ ପୋତା ଯାଇଥିବା ପ୍ରାୟ ୧ କୁଇଣ୍ଟାଲରୁ ଊର୍ଦ୍ଧ୍ୱ ପୋଚ ହେବ ବୋଲି ଜଣେ ଗ୍ରାମବାସୀ କହିଛନ୍ତି । ହେଲେ ଏହି ଘଟଣାରେ ମୁଖ୍ୟ ଅଭିଯୁକ୍ତଙ୍କୁ ପୋଲିସ ଗିରଫ କରିନାହିଁ । ତେଣୁ ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି । ଗ୍ରାମବାସୀଙ୍କ କହିବା କଥା ଗ୍ରାମର ଜଣେ ଲୋକ ରନ୍ଧାମଦ ତିଆରି କରି ବିକ୍ରି କରୁଛନ୍ତି । ଏଥିନେଇ ସ୍ଥାନୀୟ ପୋଲିସ ଓ ଅବକାରୀ ବିଭାଗକୁ ବାରମ୍ବାର ଅବଗତ କରାଗଲେ ମଧ୍ୟ କୌଣସି କାଯର୍ୟନୁଷ୍ଠାନ ଗ୍ରହଣ କରାଯାଉ ନାହିଁ । ଉକ୍ତ ବ୍ୟକ୍ତିଙ୍କୁ ବିରୋଧ କଲେ ସେ ମାରଣାସ୍ତ୍ର ଧରି ମାରିବାକୁ ଗୋଡାଉଛନ୍ତି । ଏଭଳି ଅନେକ ଥର ଘଟିଛି। ଶେଷରେ ଗତ ୫ ତାରିଖରେ ଜିଲାପାଳ ଅଫିସକୁ ମହିଳାମାନେ ଯାଇ ଅଭିଯୋଗ କରିଥିଲେ । ଶୀଘ୍ର ଏହାର ସମାଧାନ କରାଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। କିନ୍ତୁ ୪ ଦିନ ବିତି ଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନ ହେବାରୁ ବାଧ୍ୟ ହୋଇ ଏଭଳି ପଦକ୍ଷେପ ଗ୍ରହଣ କରିଥିବା ମହିଳାମାନେ କହିଛନ୍ତି।