ଚମ୍ପୁଆ, ୨୦ା୬ (ଡି.ଏନ.ଏ.)-କେନ୍ଦୁଝର ଜିଲା ଚମ୍ପୁଆ ଏନଏସି ଅନ୍ତର୍ଗତ ୨ ନଂ. ୱାର୍ଡ ପାଞ୍ଚପୋଖରିଆଠାରେ କେନାଲ ପୋତି ହୋଇପଡିଥିବାରୁ ଚାଷଜମିକୁ ପାଣି ମାଡିପାରୁନାହିଁ। ଏପରିକି ପାଣି ରହୁଥିବା ପୋଖରୀରୁ ପଙ୍କ ଉଦ୍ଧାର କରାଯାଉ ନ ଥିବାରୁ ବର୍ଷାଜଳ ଠିକ୍ ଭାବେ ଗଚ୍ଛିତ ହୋଇପାରୁନାହିଁ। ଫଳରେ ଚାଷୀଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି।
ଦୀର୍ଘ ବର୍ଷ ପୂର୍ବରୁ ଚାଷ ଜମିକୁ ପାଣି ମଡାଇବା ନିମନ୍ତେ କ୍ଷୁଦ୍ର ଜଳ ସେଚନ ପ୍ରକଳ୍ପ ଦ୍ୱାରା ଗାଁ ମଝିରେ ଏକ ବଡ ପୋଖରୀ ଖୋଳାଯାଇଥିଲା। ଏହି ପୋଖରୀରୁ କେନାଲ ମାଧ୍ୟମରେ ପ୍ରାୟ ୨୫ହେକ୍ଟର ଚାଷ ଜମିକୁ ପାଣି ମଡାଇ ଚାଷୀମାନେ ଚାଷକାମ କରୁଥିଲେ। ମାତ୍ର ୨ବର୍ଷ ହେବ ଏହି କେନାଲ ପୋତି ହୋଇପଡ଼ିଛି। ଏପରିକି ଚାଷ ବାବଦକୁ ଜଳ କର ଚାଷୀମାନେ ଦେଇ ଆସୁଥିଲେ ମଧ୍ୟ ଏହାର ପ୍ରତିକାର ଦିଗରେ ଦୃଷ୍ଟି ଦିଆଯାଉନାହିଁ। ଏ ବିଷୟରେ ଚାଷୀମାନେ ଏନଏସି କାର୍ଯ୍ୟାଳୟରେ ବାରମ୍ବାର ଅଭିଯୋଗ କଲେ ମଧ୍ୟ ଏହାର କୌଣସି ସମାଧାନ ହେଉ ନ ଥିବା ପ୍ରକାଶ କରିଛନ୍ତି। ଚାଷୀମାନେ ନାନା ଅସୁବିଧାର ସମ୍ମୁଖୀନ ହୋଇଆସୁଛନ୍ତି। ଏ ସମ୍ପର୍କରେ ଏନଏସି ଯନ୍ତ୍ରୀ ସୁଶୀଲ ମୁର୍ମୁଙ୍କୁ ପଚାରିବାରୁ ଉକ୍ତ ପାଣି ଯିବା ରାସ୍ତାରେ ଏକ ନୂତନ କଲଭର୍ଟ ହୋମ୍ପାଇପ୍ ଦ୍ୱାରା କରାଯାଇଛି। ଏହି ହୋମ୍ପାଇପ୍ରେ ମାଟି ଭର୍ତ୍ତି ହୋଇ ଜାମ୍ ହୋଇଯାଇଥିବାରୁ ପାଣି ଯାଇପାରୁନାହିଁ। ୨ରୁ ୪ଦିନ ମଧ୍ୟରେ ଏହାକୁ ସଫା କରି ଦିଆଯିବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।