ଚମ୍ପୁଆ,୩୦ା୫(ଡି.ଏନ.ଏ.)-କେନ୍ଦୁଝର ଜିଲା ଚମ୍ପୁଆ ବ୍ଲକ ଅନ୍ତର୍ଗତ ପର୍ଶଳା ପଞ୍ଚାୟତରେ ଥିବା ପୂରାତନ ପର୍ଶଳା ରଜାବନ୍ଧ ଏବେ ପୋାତି ହୋଇ ସଙ୍କୁଚିତ ହୋଇଯାଇଥିବା ବେଳେ ଚାଷୀମାନେ କେବଳ ଇନ୍ଦ୍ର ଦେବତାଙ୍କ କୃପାରେ ଚାଷ କରୁଥିବା ସୂଚନା ଦେଇଛନ୍ତି। ଦୀର୍ଘ ଦିନ ଧରି ଏହି ବନ୍ଧର ପୁନରୁଦ୍ଧାର ହୋଇ ନଥିବା ବେଳେ ଉପରୁ ମୁଣ୍ଡରୁ ବୋହି ଆସୁଥିବା ବାଲି ଗୋଡି ଦ୍ୱାରା ବନ୍ଧଟି ନିଜ ସ୍ଥିତ ହଜାଇ ସାରିଲାଣି। ମାଛ ଚାଷ ପାଇଁ ପଞ୍ଚାୟତ ପକ୍ଷରୁ ଏହା ନିଲାମ କରାଯାଉଥିଲେ ମଧ୍ୟ ଏହାର ପୁନରୁଦ୍ଧାର ପାଇଁ ପଦକ୍ଷେପ ନିଆଯାଉ ନ ଥିବା ସ୍ଥାନୀୟବାସୀମାନେ ଅଭିଯୋଗ କରିଛନ୍ତି।
ସୂଚନା ଅନୁସାରେ ପର୍ଶଳା ପଞ୍ଚାୟତର ସୀମାରେ ଅବସ୍ଥିତ ଏହି ଦୀର୍ଘକାୟ ବନ୍ଧଟି କାହିଁ କେଉଁ କାଳରୁ ଖୋଳାଯାଇଥିଲା। ଉଭୟ ପଟରେ ଏକର ଏକର ଚାଷ ଜମିକୁ ଏହି ବନ୍ଧରୁ ପାଣି ମଡାଯାଇ ଚାଷ କାଯର୍ୟ କରାଯାଉଥିଲା। ଏହି ବନ୍ଧ ଉପରେ ନିକଟସ୍ଥ ମାଙ୍କିଡିଆ ସାହି, ପର୍ଶଳା, ସିଜୁକଳା, ଗୁମୁରା, ସରୁପତଳା ଆଦି ଅଞ୍ଚଳର ଲୋକମାନେ ନିର୍ଭର କରି ଆସୁଛନ୍ତି। ଚାଷ କାର୍ଯ୍ୟ ପାଇଁ ଏହି ବନ୍ଧର ପାଣିକୁ ବ୍ୟବହାର କରୁଥିଲେ ମଧ୍ୟ ମଣିଷ ବୁଡିଯିବା ଭଳି ପାଣି ରହୁଥିବା ବେଳେ ଆଜି କାଦୁଅ ଭର୍ତ୍ତି ହୋଇ ଆଣ୍ଠୁଏ ପାଣି ରହିଛି। କିଛି ଦିନ ପୂର୍ବେ ବେଆଇନ ଭାବେ ଏହି ବନ୍ଧ କଟାଯାଇ ପାଣି ବାହାର କରିବା ସହିତ ମାଛ ଧରାଯାଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ନିଲାମ ପ୍ରକ୍ରିୟା ଶେଷ କରି ପଞ୍ଚାୟତ ତାର କାର୍ଯ୍ୟ ନିର୍ବାହ କରୁଥିବା ବେଳେ ଏହାର ଉଦ୍ଧାର ପ୍ରତି ଦୃଷ୍ଟି ଦେଉନାହିଁ। ଏ ନେଇ ସ୍ଥାନୀୟ ସରପଞ୍ଚଙ୍କୁ ପଚାରିବାରୁ ସେ କହିଛନ୍ତି ଯେ, ଦୀର୍ଘ ୩୦ ବର୍ଷରୁ ଊର୍ଦ୍ଧ୍ୱ ହେବ ଏ ବନ୍ଧର ପୁନଃଉଦ୍ଧାର କାର୍ଯ୍ୟ କରାଯାଇ ନାହିଁ। ପଞ୍ଚାୟତ ପକ୍ଷରୁ ଏହାର ଉଦ୍ଧାର ପାଇଁ ପଦକ୍ଷେପ ନେବାକୁ ଉପରିସ୍ଥ ଅଧିକାରୀଙ୍କୁ ନିବେଦନ କରାଯାଇଥିଲା। ମାତ୍ର ଏହା ଆମ ଗାଁ ଆମ ବିକାଶ ଯୋଜନାରେ କରାଯିବାର ବ୍ୟବସ୍ଥା ରହିଛି ବୋଲି ଅଧିକାରୀମାନେ ସରପଞ୍ଚଙ୍କୁ ଜଣାଇଥିଲେ। ମେ ମାସ ଯାଇ ଜୁନ ମାସ ଆରମ୍ଭ ହେବାକୁ ବସିଲାଣି। ବର୍ଷା ଦିନେ ଏହାର ପୁନଃଉଦ୍ଧାର ଅସମ୍ଭବ ତେଣୁ ବର୍ଷା ଜଳ ସଂରକ୍ଷଣ ପାଇଁ ଏହାର ଉଦ୍ଧାର ଅତ୍ୟନ୍ତ ଆବଶ୍ୟକ ବୋଲି ସ୍ଥାନୀୟବାସୀ ଦାବି କରିଛନ୍ତି।