ପୋଲସରା,୬।୬(ଡି.ଏନ୍.ଏ.): କୋଭିଡ-୧୯କୁ ନେଇ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଶନିବାର ପୋଲସରା ବ୍ଳକର ପ୍ରାୟ ୧୨ ପଞ୍ଚାୟତ ଗସ୍ତ କରିଛନ୍ତି। ମଥୁରା, କଳମ୍ବ, ହାତିଓଟ, ରୁମାଗଡ଼, ମନ୍ଦାର, କେନ୍ଦୁବାଡି, କଣଛାଇ, ଚିରିକିପଡାସାସନ, ମାଲତେନ୍ତୁଳିଆ ଆଦି ପଞ୍ଚାୟତ ବୁଲିଛନ୍ତି। ଏହି ଗସ୍ତ ସମୟରେ ସେ ସ୍ଥାନୀୟ ସରପଞ୍ଚ, ସମିତିସଭ୍ୟ, ସ୍ବାସ୍ଥ୍ୟ କର୍ମୀ, ଅଙ୍ଗନଓ୍ବାଡି, ଆଶା କର୍ମୀ ପ୍ରମୁଖଙ୍କ ସହ ଆଲୋଚନା କରିଛନ୍ତି। ଏହାଛଡ଼ା ସରକାର ଘୋଷଣା କରିଥିବା ଦୁଇ ଦିନିଆ ଶଟ୍ଡାଉନ୍ କିଭଳି ସଫଳ ହେବ। ଗ୍ରାମମାନଙ୍କରେ ସାମାଜିକ ଦୂରତା ସାଙ୍ଗକୁ ମାସ୍କ ପିନ୍ଧିବେ ସେ ନେଇ ବିସ୍ତୃତ ଆଲୋଚନା କରିଥିଲେ। ତତ୍ସହିତ ଆଗାମୀ ରଜ ପର୍ବ କିଭଳି ସରକାରୀ ନୀତି ନିୟମ ଅନୁସାରେ ପାଳନ କରିବାକୁ ହେବ ତାହା ସୂଚାଇ ଥିଲେ।
ଜିଲାପାଳଙ୍କ ଗ୍ରସ୍ତ ସମୟରେ ତହସିଲଦାର ସୁକାନ୍ତ ଚନ୍ଦ୍ର ମିଶ୍ର, ବିଡିଓ ଶମ୍ଭୁନାଥ ନନ୍ଦି, ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ, ସ୍ବାସ୍ଥ୍ୟାଧିକାରୀ ଗୋପବନ୍ଧୁ ବେହେରା ସାମାଜିକ କର୍ମୀ ପ୍ରଭାକର ପଣ୍ଡା, ପ୍ରମୁଖଙ୍କ ସମେତ କଲମ ସରପଞ୍ଚ ପ୍ରଶାନ୍ତ କୁମାର ସାହୁ, ରୁମାଗଡ଼ ସରପଞ୍ଚ ପ୍ରତିନିଧି, ପୁର୍ଣ୍ଣଚନ୍ଦ୍ର ଖଟୁଆ, ମନ୍ଦାର ସରପଞ୍ଚ କଲୁ ନାୟକ, କେନ୍ଦୁବାଡି ସରପଞ୍ଚ ବିଜୟ କୁମାର ସ୍ବାଇଁ ସମେତ ବହୁ ସରପଞ୍ଚ ଉପସ୍ଥିତ ଥିଲେ।