ବାଲେଶ୍ୱର ଅଫିସ, ୨୮।୪-ରାଜ୍ୟର ୧୬ତମ ବିଧାନସଭା ନିର୍ବାଚନ ୨୦୧୯ର ଚତୁର୍ଥ ପର୍ଯ୍ୟାୟରେ ବାଲେଶ୍ୱର ଜିଲାରେ ୨୯ତାରିଖରେ ଅନୁଷ୍ଠିତ ହେବ। ଜିଲାର ୧୨ଟି ବ୍ଲକରେ ୧୮୮୭ଟି ପୋଲିଂ ବୁଥ୍ ମଧ୍ୟରୁ ୧୦୪ଟି ଅତିସମ୍ବେଦନଶୀଳ ବୁଥ୍ ଏବଂ ୨୭୫ଟି ସମ୍ବେଦନଶୀଳ ବୁଥ୍ ଥିବା ଜିଲା ପ୍ରଶାସନ ଚିହ୍ନଟ କରିଛି। ଜିଲା ପ୍ରଶାସନର ପୋଲିଂ ଅଧିକାରୀ ଓ କର୍ମଚାରୀମାନେ ଶନିବାର ପୂର୍ବାହ୍ନ ୮ଟାରେ ସ୍ଥିର ହୋଇଥିବା ଭୋଟ ଗ୍ରହଣ କେନ୍ଦ୍ରରେ ପହଞ୍ଚିଥିଲେ। ସେଠାରୁ ବୁଥ୍ ପାଇଁ ଇଭିଏମ୍ ମେଶିନ୍, ସମସ୍ତ ଭୋଟ୍ ସାମଗ୍ରୀ ଗ୍ରହଣ କରି ଅଧିଗ୍ରହଣ ଚାରିଚକିଆ ଯାନରେ ପୋଲିଂ ବୁଥ୍ କେନ୍ଦ୍ରକୁ ଯାଇଛନ୍ତି।
ଆସନ୍ତା ୨୯ତାରିଖ ସୋମବାର ହେବାକୁ ଥିବା ମତଦାନ ନିମନ୍ତେ ଜିଲା ପ୍ରଶାସନ ସମସ୍ତ କ୍ଷେତ୍ରରେ ସମ୍ପୂର୍ଣ୍ଣ ପ୍ରସ୍ତୁତ ରହିଛି। ବସ୍ତା ଓ ବାଲେଶ୍ୱର ନିର୍ବାଚନମଣ୍ଡଳୀ ପାଇଁ ଉତ୍କଳ ବାଳାଶ୍ରମ, ଜଳେଶ୍ୱର ଓ ଭୋଗରାଇ ନିର୍ବାଚନମଣ୍ଡଳୀ ପାଇଁ ଖ୍ରୀଷ୍ଟିଆନ୍ ହାଇସ୍କୁଲ, ସୋର ଓ ରେମୁଣା ନିର୍ବାଚନମଣ୍ଡଳୀ ପାଇଁ କେନ୍ଦ୍ରୀୟ ବିଦ୍ୟାଳୟ, ସିମୁଳିଆ ନିର୍ବାଚନମଣ୍ଡଳୀ ପାଇଁ ବାଲେଶ୍ୱର ସରକାରୀ ଆଇଟିଆଇ, ନୀଳଗିରି ନିର୍ବାଚନମଣ୍ଡଳୀ ପାଇଁ ନୀଳଗିରି କେସି ହାଇସ୍କୁଲଠାରେ ବିତରଣ/ଗ୍ରହଣ କେନ୍ଦ୍ରରେ ପୋଲିଂ ଅଧିକାରୀ ଓ କର୍ମଚାରୀମାନେ ପହଞ୍ଚିଥିଲେ। ସେଠାରୁ ନିର୍ଦ୍ଧାରିତ ପୋଲିଂ ବୁଥ୍କୁ ସମସ୍ତ ନିବର୍ର୍ାଚନ ପରିଚାଳନା ସାମଗ୍ରୀ ସଂଗ୍ରହ କରି ପହଞ୍ଚାଇଥିଲେ। ପ୍ରତି ବୁଥ୍ରେ ପ୍ରିଜାଇଡ଼ିଂ ଅଫିସରଙ୍କ ସମେତ ୫ଜଣ ପୋଲିଂ ଅଫିସର ଆବଶ୍ୟକ ଥିବାବେଳେ ପ୍ରଶାସନ ପକ୍ଷରୁ ୧୪ହଜାର ୫ଶହ କର୍ମଚାରୀଙ୍କୁ ନିର୍ବାଚନ କାର୍ଯ୍ୟରେ ନିୟୋଜିତ କରାଯାଇଛି। ୧୨୧ଜଣ ଅଣୁ ପର୍ଯ୍ୟବେକ୍ଷକ, ଫ୍ଲାଇଂ ସ୍କ୍ବାଡ଼ ଷ୍ଟାଟିକ୍ ସର୍ଭିଲେନ୍ସ ଟିମ୍, ଭିଡ଼ିଓ ସର୍ଭିଲେନ୍ସ ଟିମ୍, ଭିଉଇଙ୍ଗ ଟିମ୍ ଶନିବାର ନିର୍ବାଚନ ପାଇଁ ଠିକଣା ସ୍ଥାନରେ ପହଞ୍ଚି ଥିବାର ଜଣାପଡ଼ିଛି।