ପୋଲିସକୁ ଅଟକ ରଖିଲେ ଗ୍ରାମବାସୀ
2:11 amMay 31, 2019 / 21

ବାହାନଗା, ୩୧ା୫(ଡି.ଏନ.ଏ.)-ଗୁରୁବାର ରାତି ସାଢେ ୮ଟାରେ ବାଲେଶ୍ୱର ଜିଲା ବାହାନଗା ବ୍ଲକ ତାଳକୁରୁଣିଆଁ ଗ୍ରାମର ବାସିନ୍ଦା ଗୋପାଳପୁର ଫାଣ୍ଡିର ଜଣେ କନଷ୍ଟେବଳଙ୍କୁ ଅଟକ ରଖିଛନ୍ତି। ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ସମ୍ପୃକ୍ତ କନଷ୍ଟେବଳଙ୍କୁ ଛାଡିବେ ନାହିଁ ବୋଲି ଗ୍ରାମବାସୀ ଅଡି ବସିଛନ୍ତି ା
ବାଙ୍ଗାଲୋର ଜଣେ ନାବାଳିକାଙ୍କୁ ତାଳକୁରୁରିଆଁ ଅଞ୍ଚଳର ଜଣେ ଯୁବକ ଅପହରଣ କରିଆଣିଥିବା ସେଠାକାର ଥାନାରେ ଅଭିଯୋଗ ହୋଇଥିଲା। ଅଭିଯୋଗ ପରେ ବାଙ୍ଗାଲୋର ଥାନା ପୋଲିସ ଯୁବକଙ୍କ ମୋବାଇଲ ଟ୍ରାକିଂ କରି ବାଲେଶ୍ୱର ଜିଲା ଖନ୍ତାପଡା ଥାନା ତାଳକୁରୁଣିଆଁ ଗ୍ରାମର ପ୍ରଭାକର ଯେନାଙ୍କ ଘରେ ଉକ୍ତ ମୋବାଇଲ ଥିବା ଜାଣିବାକୁ ପାଇଥିଲା। ସେଠାରେ ଅପହରଣ ହୋଇଥିବା ନାବାଳିକା ସେଠାରେ ଥିବା ପୋଲିସ ସନ୍ଦେହ କରିଥିଲା। ବାଙ୍ଗାଲୋର ପୋଲିସ ସହିତ ଗୋପାଳପୁର ଫାଣ୍ଡି ପୋଲିସ ପ୍ରଭାକର ଯେନାଙ୍କ ଘରକୁ ସନ୍ଧ୍ୟାରେ ଆସି ତାଙ୍କ ପୁଅ ସରୋଜ କୁମାର ଯେନାଙ୍କୁ ଜବରଦସ୍ତ ଟାଣି ଫାଣ୍ଡିକୁ ନେଇଯାଇଥିଲେ। ସେଠାକାର ପୋଲିସ ଆଣିଥିବା ଫଟୋ ସହିତ ଅଳ୍ପବହୁତ ସରୋଜ ସହିତ ମିଶୁଥିବା ବେଳେ ପରେ ପୋଲିସ ଜାଣିବାକୁ ପାଇଲେ ଯେଉଁ ଯୁବକଙ୍କୁ ଆଣିଛନ୍ତି ସେ ଯୁବକ ନୁହନ୍ତି। ତେଣୁ କରି ତାକୁ ଛାଡି ଦେବା ପରେ ଗୋପାଳପୁର ପୋଲିସ ସହିତ ସ୍ଥାନୀୟ ହୋମଗାର୍ଡ ଜଗନ୍ନାଥ ବାରିକ ଓ କନଷ୍ଟେବଳ କିଶ୍ୱର ପାତ୍ର ପୁନର୍ବାର ତାଳକୁରୁଣିଆଁ ଗ୍ରାମକୁ ଆସିଥିଲେ। ମାତ୍ର ବିନା କାରଣରେ ଯୁବକଙ୍କୁ ନେଇ ଥାନାରେ ମାଡ ମାରିଥିବାରୁ ଗ୍ରାମବାସୀ ଦୁଇଜଣଙ୍କୁ ଅଟକ ରଖିଥିଲେ। ମାତ୍ର ମାଡ ମାରିଥିବା ହୋମ୍‌ଗାର୍ଡ ଜଗନ୍ନାଥ ସେଠାରୁ ଖସି ପଳାଇଯିବା କାରଣରୁ ଗ୍ରାମବାସୀ ଅଧିକ ଉତ୍ତ୍ୟକ୍ତ ହୋଇପଡିଥିଲେ। ଯେପର୍ଯ୍ୟନ୍ତ ଜଗନ୍ନାଥଙ୍କୁ ଏଠାକୁ ଅଣା ନ ଯିବ ଗ୍ରାମବାସୀ ଅଟକ କନଷ୍ଟେବଳଙ୍କୁ ଛାଡିବେ ନାହିଁ ଜିଦ୍‌ରେ ଖବର ଲେଖାହେବା ପର୍ଯ୍ୟନ୍ତ ଅଟକ ରଖିଛନ୍ତି। ମାତ୍ର ଫାଣ୍ଡି ଅଧିକାରୀ ପର୍ଶୁରାମ ଜେନା କହିଛନ୍ତି, ବାଙ୍ଗାଲୋର ପୋଲିସ କରିଥିବା ମୋବାଇଲି ଟ୍ରାକିଂ ସେହି ଘର ଦେଖାଇବାରୂୁ ସେଠାକୁ ପୋଲିସ ଯାଇଥିଲେ। ତେବେ ଧରିଆଣିଥିବା ଯୁବକ ସରୋଜ ନୁହେଁ ବୋଲି ଜଣାପଡିବା ପରେ ଛାଡିଦେଇଥିଲେ। ମାତ୍ର ଏହି ଘଟଣାକୁ ନେଇ ସେମାନେ ଜଣେ ପୋଲିସ୍‌କୁ ଅଟକ ରଖିଛନ୍ତି। ଏହି ଘଟଣା ପରେ ଖନ୍ତାପଡା ଥାନା ଅଧିକାରୀ ଶ୍ରୀବଲ୍ଲଭ ସାହୁ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରୁଛନ୍ତି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।