ବ୍ରହ୍ମପୁର ଅଫିସ,୧୪ା୭-ଜଣେ କାର୍ଯ୍ୟରତ ପୋଲିସ କନଷ୍ଟେବଳ ବି. ସୀମାଦ୍ରି ରାଓଙ୍କୁ ଦୁର୍ବ୍ୟବହାର କରିବା ଅଭିଯୋଗରେ ଟାଉନ ଥାନା ପୋଲିସ ୨ ଜଣ ଠିକାଦାରଙ୍କୁ ଗିରଫ କରିଛି। ସେମାନେ ହେଲେ ଛତ୍ରପୁର ବି. ଲିଙ୍ଗରାଜ ପାତ୍ର (୪୦) ଓ ବି. ଦଣ୍ଡପାଣି ପାତ୍ର (୩୮)। ଅଭିଯୁକ୍ତମାନେ ୨ ଭାଇ ଅଟନ୍ତି। ସେମାନେ ଗାନ୍ଧୀନଗରରେ ଘର ଭଡାନେଇ ରହୁଛନ୍ତି। ଘଟଣା ବେଳେ ସେମାନେ ବ୍ୟବହାର କରିଥିବା କାର (ନଂ. ଓଡି୦୭ଟି୮୧୧୮)କୁ ଜବତ କରାଯାଇଥିବା ଥାନାଧିକାରୀ ସନ୍ତୋଷିନୀ ଓରାମ ସୂଚନା ଦେଇଛନ୍ତି। ନଂ.୧୩୮/୧୯ରେ ସେମାନଙ୍କୁ ଶନିବାର କୋର୍ଟ ଚାଲାଣ କରାଯାଇଛି ବୋଲି ସେ କହିଛନ୍ତି।
ପ୍ରକାଶ ଯେ, ଶୁକ୍ରବାର ସନ୍ଧ୍ୟାରେ ବିଶାଲ ମେଗା ମାର୍କେଟ ଛକରେ ଟ୍ରାଫିକ ଦାୟିତ୍ୱରେ କନଷ୍ଟେବଳ ବି. ସୀମାଦ୍ରୀ ରାଓ ଥିଲେ। ଉକ୍ତ ରାସ୍ତାଟି ଯାନବାହନ ଯାତାୟାତ ପାଇଁ ଏକ ପାଖିଆ ରହିଛି। ହେଲେ ଉପରୋକ୍ତ ୨ ଭାଇ ନିଜ କାରରେ ସେଠାରେ ପହଞ୍ଚି ଉକ୍ତ ରାସ୍ତା ଦେଇ ଯିବା ପାଇଁ କହିଥିଲେ। ଟ୍ରାଫିକ ପୋଲିସ ମନା କରିଥିଲେ। ୨ ଭାଇ କାର ମଝି ରାସ୍ତାରେ ରଖି ପୋଲିସ ସହିତ ଝଗଡା କରିବା ସହ ତାଙ୍କୁ ଦୁର୍ବ୍ୟବହାର କରିଥିଲେ। ଏପରିକି ପୋଲିସ ସୀମାଦ୍ରିକଙ୍କ ସାର୍ଟ ଧରି ଟଣାଓଟରା କରିଥିଲେ। ପୋଲିସ ଓ ଠିକାଦାରଙ୍କ ମଧ୍ୟରେ ଧସ୍ତାଧସ୍ତି ହେବା ଫଳରେ ରାସ୍ତା ଅବରୋଧ ହୋଇଥିଲା। ଖବରପାଇ ଟାଉନ ଥାନା ପୋଲିସ ସେଠାରେ ପହଞ୍ଚି ଯାଇଥିଲେ। ପରେ ଉଭୟ ପୋଲିସ ଓ ଠିକାଦାର ଭାଇଙ୍କୁ ଟାଉନ ଥାନାକୁ ଯିବାକୁ ପଡିଥିଲା। ସେଠାରେ ପୋଲିସ କନଷ୍ଟେବଳ ରାଓ ଏନେଇ ଥାନାରେ ଅଭିଯୋଗ କରିଥିଲେ।