ମୁମ୍ବାଇ: କରୋନା ଭାଇରସ୍ ସଂକ୍ରମଣ ବିରୋଧରେ ଚାଲିଥିବା ଯୁଦ୍ଧରେ ସମସ୍ତେ ମିଳିମିଶି ଲଢ଼େଇ କରୁଛନ୍ତି। ବଲିଉଡ୍ ତାରକାମାନେ ମଧ୍ୟ ଏଥିରେ ସହଯୋଗର ହାତ ବଢ଼ାଇଛନ୍ତି। ବଲିଉଡ୍ ଅଭିନେତ୍ରୀ ନିନା ଗୁପ୍ତାଙ୍କ ଝିଅ ମସାବା ଗୁପ୍ତା ନିଜ ହାତରେ ମାସ୍କ ପ୍ରସ୍ତୁତ କରି ପୋଲିସ କର୍ମଚାରୀଙ୍କୁ ପ୍ରଦାନ କରିଛନ୍ତି। ଫ୍ୟାଶନ ଡିଜାଇନର ମସାବା ନିଜ ଇନ୍ଷ୍ଟାଗ୍ରାମ ଆକାଉଣ୍ଟରେ ଏହି ମାସ୍କ ପ୍ରଦାନ ବେଳର ଫଟୋଗୁଡ଼ିକୁ ଶେୟାର କରିଛନ୍ତି। କ୍ୟାପ୍ଶନରେ ଲେଖିଛନ୍ତି ଯେ, ମୁଁ ଏହି ମାସ୍କ ପ୍ରଦାନ କରି ବହୁତ ଖୁସି। ଆଉ ମଧ୍ୟ କହିଛନ୍ତି ଯେ, ମୁଁ ବଲିଉଡ୍ ଅଭିନେତା ଅଭିନେତ୍ରୀଙ୍କ ପାଇଁ ବହୁତ ଡ୍ରେସ୍ ଡିଜାଇନ କରିଛି କିନ୍ତୁ ପୋଲିସ କର୍ମଚାରୀମାନଙ୍କ ପାଇଁ ମୁଁ ମୋ ଜୀବନରେ ପ୍ରଥମ ଥର କିଛି କରିଛି। ଏଥିପାଇଁ ମୁଁ ଖୁସି ଅନୁଭବ କରୁଛି। ଏହାକୁ ମୁଁ ସାରା ଜୀବନ ମନେରଖିବି। କାରଣ ସାରା ଦେଶ ଲକ୍ଡାଉନ୍ରେ ବନ୍ଦ ଥିବାବେଳେ ଆମମାନଙ୍କୁ ସୁରକ୍ଷିତ ରଖିବା ପାଇଁ ନିଃସ୍ବାର୍ଥପର ଭାବେ ପୋଲିସ କର୍ମଚାରୀମାନେ କାର୍ଯ୍ୟ କରିଚାଲିଛନ୍ତି। ଅଭିନେତ୍ରୀ ନିନା ତାଙ୍କ ଇନ୍ଷ୍ଟାଗ୍ରାମ୍ରେ ଲେଖିଛନ୍ତି ଯେ, ମୁଁ ମୋ ଝିଅକୁ ନେଇ ସବୁବେଳେ ଗର୍ବିତ। ସୂଚନାଥାଉ କି, ନିନା ବର୍ତ୍ତମାନ ଲକ୍ଡାଉନ୍ ପାଇଁ ମୁକ୍ତେଶ୍ୱରରେ ସମୟ ବିତାଉଥିବାବେଳେ ତାଙ୍କ ଝିଅ ମସାବା ମୁମ୍ବାଇରେ ଅଛନ୍ତି।