ଅମୃ଼ତସର: ଲକ୍ଡାଉନ୍ ସମୟରେ ପୋଲିସ୍ର କାମକୁ ବିଭିନ୍ନ ସ୍ଥାନରେ ପ୍ରଶଂସା ମିଳୁଛି। ଲୋକଙ୍କ ମନ ଜିଣି ସେମାନଙ୍କୁ ଲକ୍ଡାଉନ୍ ନିୟମ ମାନିବାକୁ ପୋଲିସ୍ ବିଭିନ୍ନ ପ୍ରକାର ଉଦ୍ୟମ କରୁଛି। ଠିକ୍ ଏମିତି ଏକ ଭିନ୍ନ ଉଦ୍ୟମ କରି ଏବେ ସମସ୍ତଙ୍କ ପ୍ରିୟ ହୋଇପାରିଛି ପଞ୍ଜାବ ପୋଲିସ୍। ପଞ୍ଜାବର ମନ୍ସା ଅଞ୍ଚଳରେ ପୋଲିସ୍ ଏବେ ସେହି ଅଞ୍ଚଳର ସମସ୍ତ ପିଲାଙ୍କର ପ୍ରଥମ ଜନ୍ମବାର୍ଷିକୀ ପାଳନ କରିବା ପାଇଁ ଆଶ୍ଚର୍ଯ୍ୟଜନକ ଉପହାର ଦେବା ଆରମ୍ଭ କରିଛି। ପୋଲିସର ଏଭଳି ଉଦ୍ୟମ ଲୋକଙ୍କ ମୁହଁରେ ହସ ଫୁଟାଇପାରିଛି ଓ ଲକ୍ଡାଉନ୍ ମାନିବା ପାଇଁ ଉତ୍ସାହିତ କରିଛି। ଏବେ ସବୁଆଡ଼େ ଲକ୍ଡାଉନ୍ ଚାଲିଥିବାରୁ କୌଣସି ସ୍ଥାନରେ କିଛି ଉତ୍ସବ ଆୟୋଜନ କରାଯାଇ ପାରୁନି। ତେଣୁ ପୋଲିସ୍ ଏ ସମୟରେ ସ୍ଥାନୀୟ ଅଞ୍ଚଳରେ ଥିବା ଛୋଟପିଲାଙ୍କୁ ନିଜ ନିଜର ପ୍ରଥମ ଜନ୍ମଉତ୍ସବ ପାଳନ କରିବା ପାଇଁ ସାହାଯ୍ୟ କରୁଛି। ଏଥିପାଇଁ ଏଭଳି ପିଲା ଥିବା ଘରକୁ ହଠାତ୍ ଏକ ଜନ୍ମଦିନ କେକ୍ ଧରି ପହଞ୍ଚି ଯାଉଛି। ଜଣେ ପୋଲିସ୍ କେକ୍ ବଢ଼ାଇ ଦେବାବେଳେ ଅନ୍ୟ ପୋଲିସମାନେ ‘ହାପି ବାର୍ଥ ଡେ’ ଗୀତ ଗାଇ ଅଭିନନ୍ଦନ ଜଣାଉଛନ୍ତି। ପୋଲିସର ଏଭଳି କାମକୁ ପଡ଼ିଶା ଘର ଲୋକେ ନିଜ ନିଜ ବାଲ୍କୋନିରେ ଛିଡ଼ାହୋଇ ଉପଭୋଗ କରୁଛନ୍ତି। ଏଭଳି କରିବା ଫଳରେ ଲୋକଙ୍କ ମନରେ ହଠାତ୍ ଏକ ଭିନ୍ନ ଖୁସି ଦେଖିବାକୁ ମିଳୁଛି।