ମାଲକାନଗିରି,୨୬ା୫(ସ୍ବ.ପ୍ର.): ମାଲକାନଗିରି ଜିଲା ସୀମାନ୍ତ ଛତିଶଗଡ଼ ରାଜ୍ୟ ବିଜାପୁର ଜିଲା ଭେରମଗଡ଼ ଥାନା ଅନ୍ତର୍ଗତ କେସତାପରା ଗ୍ରାମରେ ଶନିବାର ରାତିରେ ୨୦ରୁ ଊର୍ଦ୍ଧ୍ୱ ମାଓବାଦୀ ଆସି ଜଣେ କଂଗ୍ରେସ କର୍ମୀଙ୍କୁ ହତ୍ୟା କରିଥିବା ଜଣାପଡ଼ିଛି। ମାଓବାଦୀମାନେ କଂଗ୍ରେସ କର୍ମୀଙ୍କ ଘରକୁ ଯାଇ ତାଙ୍କୁ ଜବରଦସ୍ତ ଟାଣି ଆଣି ସର୍ବସମ୍ମୁଖରେ ଓ ସ୍ତ୍ରୀଙ୍କ ଆଗରେ ପୋଲିସ ଇନ୍ଫର୍ମର ଦର୍ଶାଇ ଗଳାକାଟି ହତ୍ୟା କରି ଚାଲିଯାଇଥିଲେ। ଗଲାବେଳେ ମାଓବାଦୀମାନେ ଗ୍ରାମବାସୀଙ୍କୁ ଯିଏ ପୋଲିସ ପାଇଁ କାମ କରିବ ତାକୁ ଏପରି ସଜା ଭୋଗିବାକୁ ପଡ଼ିବ ବୋଲି ଚେତାବନୀ ଦେଇଥିଲେ। ଖବର ପାଇ ରବିବାର ସକାଳୁ ପୋଲିସ ଫୋର୍ସ ଉକ୍ତ ଗ୍ରାମକୁ ଯାଇ ତଦନ୍ତ ଚଳାଇଥିବା ବିଜାପୁର ଏସ୍ପି ଗୋବର୍ଦ୍ଧନ ଠାକୁର ସ୍ପଷ୍ଟ କରିଛନ୍ତି।