ବ୍ରହ୍ମପୁର ଅଫିସ,୨୪ା୧୦-ଗଞ୍ଜମ ଜିଲା ଅତିରିକ୍ତ ବିଚାର ବିଭାଗୀୟ ମାଜିଷ୍ଟ୍ରେଟ (ଏସିଜେଏମ୍) ବୁଧବାର ପୋଲିସ ଉପରକୁ ଗୁଳିମାଡ ମାମଲାର ବିଚାର କରିଥିଲେ। ପ୍ରମାଣ ଅଭାବରୁ ଅଭିଯୁକ୍ତ ଜିତୁ ଓରଫ ଜିତେନ୍ଦ୍ର ସେଠୀଙ୍କୁ ନିର୍ଦ୍ଦୋଷ ବୋଲି ଏସିଜେଏମ୍ ସରୋଜ କୁମାର ଦାସ ରାୟରେ ଉଲ୍ଲେଖ କରିଛନ୍ତି। ପ୍ରକାଶ ଯେ, ୨୦୧୬ ଏପ୍ରିଲ ୨୯ ତାରିଖ ପୂର୍ବାହ୍ନରେ ଦୁର୍ଦ୍ଦାନ୍ତ ଜିତୁ ଗୋପାଳପୁର ନିକଟସ୍ଥ ଏକ ଝାଉଁ ଜଙ୍ଗଲରେ ଲୁଚିଥିବା ପୋଲିସ ଖବର ପାଇଥିଲା। ଗୋପାଳପୁରର ତତ୍କାଳୀନ ଥାନାଧିକାରୀ ପ୍ରଜ୍ଞା ପରମିତା ଜେନା ଓ ଗୋଳନ୍ଥରା ତତ୍କାଳୀନ ଥାନାଧିକାରୀ ଆଲୋକ କୁମାର ଜେନା ସେଠାରେ ପହଞ୍ଚିଥିଲେ। ପୋଲିସକୁ ଦେଖି ଜିତୁ ତାଙ୍କ ଉପରକୁ ଗୁଳିମାଡ କରିଥିଲେ। ଅନ୍ୟପଟେ ପୋଲିସ ମଧ୍ୟ ଏହାର ପାଲଟା ଜବାବ ଦେଇଥିଲା। ଫଳରେ ଆଲୋକ ଫୁଟାଇଥିବା ୨ ରାଉଣ୍ଡ ଗୁଳି ଜିତୁଙ୍କ ବାମ ଗୋଡ଼ରେ ବାଜିଥିଲା। ପରେ ପୋଲିସ ଜିତୁଙ୍କୁ କାବୁ କରିବା ସହ ତା’ଙ୍କଠାରୁ ବନ୍ଧୁକ ଓ ଗୁଳି ଜବତ କରିଥିଲା। ଗୁରୁତର ଜିତୁଙ୍କୁ ପୋଲିସ ଏମ୍କେସିଜି ମେଡିକାଲରେ ଭର୍ତ୍ତି କରିଥିଲା। ସେ ସୁସ୍ଥ ହେବା ପରେ ଗୋପାଳପୁର ଥାନା କେସ୍ ନଂ. ୩୮/୧୬ରେ ତାଙ୍କୁ କୋର୍ଟ ଚାଲାଣ କରାଯାଇଥିଲା। ପରେ ତଦନ୍ତକାରୀ ଅଧିକାରୀ କୋର୍ଟରେ ଚାର୍ଜଶିଟ ଦାଖଲ କରିଥିଲେ। ମାମଲାର ବିଚାର ଚାଲିଥିବା ବେଳେ ଉଭୟ ଥାନାର ତତ୍କାଳୀନ ଅଧିକାରୀ କୋର୍ଟରେ ତାଙ୍କ ବୟାନ ଦେଇଥିଲେ। ବୁଧବାର ଏହି ମାମଲାର ଶୁଣାଣି ପାଇଁ ଜିତୁଙ୍କୁ ପୋଲିସ କୋର୍ଟରେ ହାଜର କରିଥିଲା। ୧୬ ସାକ୍ଷୀଙ୍କ ବୟାନକୁ ଆଧାର କରି ଉପଯୁକ୍ତ ପ୍ରମାଣ ଅଭାବରୁ ଏସିଜେଏମ୍ ଅଭିଯୁକ୍ତଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ମୁଦାଲାଙ୍କ ପକ୍ଷରୁ ଆଇନଜୀବୀ ମନୋଜ ପାଣିଗ୍ରାହୀ, ମହେନ୍ଦ୍ର ଶତପଥୀ ଓ ସରୋଜ କୁମାର ଗୌଡ଼ ମକଦ୍ଦମା ପରିଚାଳନା କରିଥିଲେ॥