ପୋଲିସ ଏନ୍କାଉଣ୍ଟର ପ୍ରସଙ୍ଗ: ଟିକି, ବିଶ୍ୱରଞ୍ଜନଙ୍କ ପରେ କାହା ପାଳି
06 ପୁରୀ ଅଫିସ, ୨୯।୯: ଗତ ୯ତାରିଖରେ ପୋଲିସର ପୃଥକ ଏନ୍କାଉଣ୍ଟରରେ ଆହତ ହୋଇ ଦୁଇ ଦୁର୍ଦ୍ଦାନ୍ତ ଅଭିଯୁକ୍ତ ଟିକି ଓରଫ ସୟାମତ ଖାଁ ଓ ବିଶ୍ୱରଞ୍ଜନ ସାହୁ ଏବେ ପୁରୀ ଜେଲରେ ଅଛନ୍ତି। ଏବେ ପୁଣି ପୋଲିସ ଆଉ କେତେଜଣ ଦୁର୍ଦ୍ଦାନ୍ତ ଅପରାଧୀଙ୍କୁ ଏନ୍କାଉଣ୍ଟର କରିବାକୁ ଯୋଜନା ଚଳାଇଥିବା ଶୁଣିବାକୁ ମିଳୁଛି। ତେଣୁ ଏହି ଦୁଇ ଅପରାଧୀଙ୍କ ପରେ କାହା ପାଳି ପଡ଼ିବ ତାହା ସାଧାରଣରେ ପ୍ରଶ୍ନ ହୋଇଛି।
ସୂଚନା ଅନୁଯାୟୀ, ୨୦୦୪ରେ ଅପରାଧ ଦୁନିଆରେ ପାଦ ଥାପିଥିଲେ ଟିକି। ସେ ନିଜର ଗ୍ୟାଙ୍ଗ ଗଢି ଆପରାଧିକ କାର୍ଯ୍ୟକଳାପ ଜାରି ରଖିତ୍ଥିଲେ। ତାଙ୍କ ନାମରେ ପୁରୀ ସମେତ ଭୁବନେଶ୍ୱର, କଟକ ଓ ଗଞ୍ଜାମ ଜିଲାର ବିଭିନ୍ନ ଥାନାରେ ୨୩ଟି ମାମଲା ରହିଥିବାବେଳେ ସେ ବାଲି ଓ ବନ୍ଧୁକ ଚୋରା ଚାଲାଣରେ ଲିପ୍ତ ଥିଲେ ବୋଲି ଜଣାପଡ଼ିିଛି। ସିପସରୁବାଲି, ବଳିଆପଣ୍ଡା ଅଞ୍ଚଳରୁ ଦୈନିକ ଟନ୍ ଟନ୍ ବାଲି ଚାଲାଣ କରି ଟିକି ଲକ୍ଷାଧିକ ଟଙ୍କା ଆଦାୟ କରୁଥିଲେ। ପୋଲିସକୁ ମୋଟା ଅଙ୍କର ବଟି ଦେଇ ସେ ନିଜ ଅପରାଧ ସାମ୍ରାଜ୍ୟର କାୟା ବିସ୍ତାର କରିଥିଲେ। ପୋଲିସ ଛତ୍ରଛାୟା ତଳେ ସୁରକ୍ଷିତ ରହି ନିଜ ଅପରାଧ ସାମ୍ରାଜ୍ୟ ଗଢିଥିବା ଟିକିଙ୍କ ଏନକାଉଣ୍ଟରକୁ ନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ଅନ୍ୟପଟେ ପୋଲିସର ମୋଷ୍ଟ ୱାଣ୍ଟେଡ ତାଲିକାରେ ରହିଥିବା ଟିକିଙ୍କୁ ଧରିବା ଲାଗି ଦୀର୍ଘଦିନ ଧରି ଜାଲ ବିଛାଯାଇଥିଲା ବୋଲି ଏସ୍ପି ଉମାଶଙ୍କର ଦାଶ କହିଛନ୍ତି। ସେହିପରି ୨୦୧୯ରେ ଅପରାଧ ଦୁନିଆରେ ପାଦ ଦେଇଥିଲେ ବିଶ୍ୱରଞ୍ଜନ। ତାଙ୍କ ନାମରେ ସଦର, ଟାଉନ, ତାଳବଣିଆ ଓ ବାସେଳିସାହି ଥାନାରେ ୫ଟି ମାମଲା ରହିଛି। ସେ ଏକ ଗ୍ୟାଙ୍ଗ ଗଢି ନିଜ କାୟା ବିସ୍ତାର ଲାଗି ଯୋଜନା କରୁଥିବାବେଳେ ପୋଲିସ ଗୁଳିରେ ଆହତ ହୋଇ ଧରାପଡ଼ିଥିଲେ।