କଟକ ଅଫିସ,୭।୨: କଟକ ରେଳଷ୍ଟେଶନ ନିକଟରେ ବେଧଡକ ଭାବେ ଚାଲିଛି ସେକ୍ସ ର଼୍ୟାକେଟ୍। ଏହି ବେଆଇନ କାର୍ଯ୍ୟ ସମ୍ପର୍କରେ ପୋଲିସକୁ ଅଛପା ନାହିଁ। ପିସିଆର ଭ୍ୟାନ ଏହି ଅଞ୍ଚଳ ଦେଇ ନିୟମିତ ପାଟ୍ରୋଲିଂ କରୁଥିଲେ ମଧ୍ୟ କାର୍ଯ୍ୟାନୁଷ୍ଠାନ ଶୂନ। ଏ ସମ୍ପର୍କରେ ଜାଣି ମଧ୍ୟ ଅନେକ ପୋଲିସ କର୍ମଚାରୀ ଚୁପ୍ ରହିବା ନେଇ ସାଧାରଣରେ ସନ୍ଦେହ ସୃଷ୍ଟି କରିଛି। ସେକ୍ସ ର଼୍ୟାକେଟ୍ ଚାଲିଥିବା ଏହି ସ୍ଥାନ ରେଳଷ୍ଟେଶନ ଠାରୁ ଅତିବେଶିରେ ୫୦ମିଟର ଓ ରେଭେନ୍ଶା ବିଶ୍ୱବିଦ୍ୟାଳୟ ଠାରୁ ୪୦୦ମିଟର ଦୂର ହେବ। ରାତି ୧୦ଟା ପରେ ରେଳଷ୍ଟେଶନ ନିକଟସ୍ଥ ଏହି ସ୍ଥାନରେ ଦେହଜୀବୀ ଓ ଗ୍ରାହକଙ୍କ ଭିଡ଼ ହେଉଛି। ହେଲେ ପୋଲିସ ସେଠାରେ ଚଢାଉ ନ କରିବାରୁ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। କଟକରେ ଚାଲିଥିବା ଏହି ର଼୍ୟାକେଟ୍ରେ ମୋଟ୍ ୩୦ଜଣ ଯୁବତୀ ଥିବା ଜଣାପଡ଼ିଛି।
ବାଂଲାଦେଶ ଲିଙ୍କ୍ ସନ୍ଦେହ
ର଼୍ୟାକେଟରେ ଅନେକ ବାଂଲାଦେଶୀ ଯୁବତୀ କାର୍ଯ୍ୟ କରୁଥିବା ଜଣାପଡ଼ିଛି। ଏମାନେ ଭୁବନେଶ୍ୱରରେ ରୁହନ୍ତି, ସନ୍ଧ୍ୟା ହେଲେ ବସ୍ କିମ୍ବା ଟ୍ରେନ୍ରେ କଟକ ଆସନ୍ତି। ଏମାନଙ୍କ ନେତୃତ୍ୱ ନେଉଥିବା ଯୁବତୀ ଜଣଙ୍କ ଘର ବାଲେଶ୍ୱର ଅଞ୍ଚଳରେ। ପୂର୍ବରୁ ଭୁବନେଶ୍ୱରରେ ଧରା ପଡ଼ିଥିବା ର଼୍ୟାକେଟର ଅନେକ ବାଲାଂଦେଶୀ ଯୁବତୀ ଥିବା ଜଣାପଡିଥିଲା। କଟକରେ ଚାଲିଥିବା ଏହି ର଼୍ୟାକେଟ୍ରେ ମଧ୍ୟ ବାଲାଂଦେଶୀ ଯୁବତୀ ସାମିଲ ଅଛନ୍ତି ବୋଲି ସନ୍ଦେହ କରାଯାଉଛି।
ନିରାପତ୍ତା ଯୋଗାଉଛି ହୋଟେଲ
ଦେହଜୀବୀମାନେ ଷ୍ଟେଶନ ନିକଟରୁ ଗ୍ରାହକଙ୍କ ସହିତ ସହରର ବିଭିନ୍ନ ହୋଟେଲକୁ ଯାଉଛନ୍ତି। ହୋଟେଲଗୁଡ଼ିକ ଏହି ବେଆଇନ କାର୍ଯ୍ୟକୁ ବେଶ୍ ନିରାପତ୍ତା ଯୋଗାଉଛି। ତେବେ ହୋଟେଲ୍ ଠିକ୍ କରିବା ପାଇଁ ଯୋବ୍ରା ଅଞ୍ଚଳର ଜଣେ ଯୁବକ ଦାୟିତ୍ୱରେ ଅଛନ୍ତି। ହୋଟେଲ ସହ ବିଳମ୍ବିତ ରାତିରେ ଫୋନ ଯୋଗେ ଯୋଗାଯୋଗ କରି ରୁମ୍ ବୁକ୍ କରିବା କାର୍ଯ୍ୟ ଏହି ଯୁବକ ଜଣଙ୍କ କରନ୍ତି ବୋଲି ଜଣେ ଦେହଜୀବୀ କହିଛନ୍ତି।
ମୁମ୍ବାଇରୁ ଆସୁଛନ୍ତି ଯୁବତୀ
ଏହି ର଼୍ୟାକେଟର ନେତୃତ୍ୱ ନେଉଥିବା ଯୁବତୀ ଜଣଙ୍କ କହିଥିଲେ, ସମସ୍ତେ ଭୁବନେଶ୍ୱରରେ ଘର ଭଡ଼ା ନେଇ ରହୁଛନ୍ତି। କଟକ ଆସିବା ପରେ କିଏ କେଉଁଆଡେ ଯିବ ତାହା ସ୍ଥିର କରାଯାଉଛି। ତେବେ ଦିନେଦିନେ ମୁମ୍ବାଇର କିଛି ଯୁବତୀ ଏହି ର଼୍ୟାକେଟ୍ରେ ସାମିଲ ହେଉଛନ୍ତି। ଯେଉଁମାନେ ଅଧିକ ଦାମ୍ ନିଅନ୍ତି। ମୁମ୍ବାଇର ଯୁବତୀ ଓଡ଼ିଶା ଆସିଲେ ଦିନକ ପିଛା ୧୨ହଜାର ଟଙ୍କା ନିଅନ୍ତି ବୋଲି ସେ କହିଥିଲେ।
ସବୁ ଜାଣନ୍ତି ପିସିଆର୍ ଷ୍ଟାଫ୍
କିଏ କେତେବେଳେ ଆସୁଛି, କେଉଁଆଡେ ଯାଉଛି ତାହାର ଟିକ୍ିନିଖି ଖବର ମାଲଗୋଦାମ ଥାନାର ପିସିଆର୍ ଷ୍ଟାଫମାନେ ଜାଣନ୍ତି। ବୁଧବାର ବିଳମ୍ବିତ ରାତିରେ ପିସିଆରରେ ଥିବା ଜଣେ ପୋଲିସ କର୍ମଚାରୀଙ୍କୁ ଏ ସମ୍ପର୍କରେ ପଚାରିବାରୁ ସେ କହିଥିଲେ, ଆମେ ଜାଣିଲେ କ’ଣ କରିପାରିବୁ। ସେମାନଙ୍କ ସହ ପାଟିତୁଣ୍ଡ କରି ଲାଭ ନାହିଁ। ସେମାନେ ଯାହା କରୁଛନ୍ତି କରନ୍ତୁ। ଏପରି କି କାର୍ଯ୍ୟାନୁଷ୍ଠାନ ନେବାକୁ କହିବାରୁ ପୋଲିସ କର୍ମଚାରୀଙ୍କ ଉତ୍ତର ଥିଲା, ଏହା ଆମ ଥାନା ଭିତରେ ଆସୁନି। ଯାଅ ଜିଆର୍ପି ଥାନାରେ କୁହ ବୋଲି ପୋଲିସ କର୍ମଚାରୀ ଜଣଙ୍କ କହିଥିଲେ।