ନୂଆଦିଲ୍ଲୀ/ଭୁବନେଶ୍ୱର,୨୯।୪: କର୍ତ୍ତବ୍ୟ ଆଗରେ ସ୍ନେହ ମମତା ତୁଛ। ଏବେ ଏଭଳି ଏକ ଭିଡ଼ିଓ ସୋସିଆଲ ମିଡ଼ିଆରେ ଅପଲୋଡ୍ ହୋଇଛି। ଏହାକୁ ଅପଲୋଡ୍ କରିଛନ୍ତି ଓଡ଼ିଶାର ସିଆଇଡି କ୍ରାଇମ୍ ବ୍ରାଞ୍ଚ୍ ମହାନିରୀକ୍ଷକ ଅରୁଣ ବୋଥ୍ରା। ଏଥିରେ ପିଲାଟି ପିତାଙ୍କ ଗୋଡକୁ ଛନ୍ଦି ଯିବାକୁ ଦେଉନି। ପିତା ଶୀଘ୍ର ଆସିବା ପାଇଁ କହୁଥିଲେ ମଧ୍ୟ ପିଲାଟି ରାହାଧରି କାନ୍ଦୁଛି। ଏହା ଦେଖଣାହାରୀଙ୍କୁ ବେଶ୍ ଭାବାତ୍ମକ କରୁଛି। ପ୍ରାୟ ୧ ମିନିଟ୍ ୨୫ ସେକେଣ୍ଡର ଏହି ଭିଡ଼ିଓ ସୋସିଆଲ୍ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି। ଏଥିରେ ଅରୁଣ ଲେଖିଛନ୍ତି ପୋଲିସ କର୍ମଚାରୀଙ୍କ ପାଇଁ ଏଭଳି ଘଟଣା ଅତି ସମ୍ବେଦନଶୀଳ ପରିବାରକୁ ପଛରେ ଛାଡି ସେମାନେ କର୍ତ୍ତବ୍ୟକୁ ଗୁରୁତ୍ୱ ପ୍ରଦାନ କରିଥାନ୍ତି। କର୍ତ୍ତବ୍ୟ ଆଗରେ ସେମାନଙ୍କ ଲାଗି ସମ୍ପର୍କର ସେତୁ ମଧ୍ୟ ଭାଙ୍ଗିଯାଇଥାଏ। ଏହା କେବଳ ଜଣେ ପୋଲିସ କର୍ମଚାରୀ ହିଁ ମର୍ମେ ମର୍ମେ ଅନୁଭବ କରିପାରିବେ ବୋଲି ସେ କହିଛନ୍ତି।
