କେନ୍ଦ୍ରାପଡା ଅଫିସ୍, ୫ା୪- ପୋଲିସ ମହାନିର୍ଦ୍ଦେଶକ ଅଭୟ ରବିବାର ମଧ୍ୟାହ୍ନରେ କେନ୍ଦ୍ରାପଡା ଜିଲା ଗସ୍ତ କରିଛନ୍ତି । ଏହି ଅବସରରେ ସେ ଜିଲାର ଆଇନ ଶୃଙ୍ଖଳା ସମ୍ପର୍କରେ ସମୀକ୍ଷା ସହ ପୋଲିସ ବାରାକ ଓ ସହରର ମଧ୍ୟରେ ପୋଲିସ ବ୍ୟବସ୍ଥାକୁ ଅନୁଧ୍ୟାନ କରିଥିଲେ । ଏଥିସହ କରୋନା ଭୂତାଣୁ ସଂକ୍ରମଣରୁ ବତ୍ତିବା ପାଇଁ ଜିଲା ପୋଲିସକୁ ସଚେତନ କରିଥିବା ବିଭାଗ ପକ୍ଷରୁ ସୂଚନା ମିଳିଛି । ସମୀକ୍ଷା ସମୟରେ କେନ୍ଦ୍ରାପଡ଼ା ଏସ୍ପି ନୀତିଶେଖର ଓ ଜିଲା ପୋଲିସର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ସୂଚନାଯୋଗ୍ୟଯେ, କରୋନା ଭୂତାଣୁ ସଂକ୍ରମଣ ରୋକିବା ପାଇଁ ସାରା ଦେଶ ୨୧ ଦିନିଆ ତାଲାବନ୍ଦ ହୋଇଛି । ଇତିମଧ୍ୟରେ ଜିଲାକୁ ୫୯୧ ଜଣ ବିଦେଶରୁ ଓ ୮୮୩୮ ଜଣ ରାଜ୍ୟ ବାହାରୁ ଆସିଛନ୍ତି । ଏହି ତାଲାବନ୍ଦ ଆଇନକୁ ଉଲ୍ଲଘଂନ କରିଥିବାରୁ ୫୫ଟି ମାମଲା ରୁଜୁ କରାଯାଇ ୯୨ ଅଭିଯୁକ୍ତଙ୍କ ନାମରେ ମାମଲା ରୁଜୁ ହୋଇଛି । ୪୨ ବାଇକ, ୬ଟି ୪ଚକିଆ ଯାନ ଓ ୨ଟି ଅଟୋ ଜବତ ହୋଇଛି । ଏଥିସହ ମୋଟ ୨୫ ହଜାର ଟଙ୍କା ଜବତ କରାଯାଇଥିବା ସୂଚନା ମିଳିଛି ।